ZEICAHDAH PATHIAN FAPA CU MINUNG A SI?

Minung cannak a lak caah minung thlarau, minung fimnak le minung duhnak he pumsa kha a ngei. Mah vialte cu Pathian Fapa ta ah a cang dih. Minung sinak in a simi le a tuahmi vialte cu thumkawmh Pathian pakhat chungah a si dih.

Khrih Thlarau le a minung hngalhnak

Laodicaea khua in Apohinarius nih, “Khrih chungah BIA nih zaka a rawlh,” a ti. Hi palhnak kong ah Bupi nih, zungzal in a hmunmi Fapa nih minung Thlarau kha a lak,” tiah a ti. Pathian Fapa nih a lakmi minung Thlarau cu minung hngalhnak taktak kha a ngei. Cu a si caah Pathian Fapa cu minung a rak can tikah fimnak le pum in a thang i Pathian hmai le minung hmaiah mithmai ṭha kha a hmuh” (Lk. 2:52). Hmuhtonnak lawngin cawn khawhmi hna kha a rak kawl a hau ve. (Mt. 6:38, 8:27, Jn. 11:34 ect). Mah hi amah lila zeihmanh lo ah aa can ter i, “sal sinak kha a lak,” timi cu a si. (Phil. 2:7).

Sihmanhsehlaw cankhatte ah Pathian Fapa nih a minung hngalhnak ah a Pathian sinak kha a langhter. (St. Gregory the Great) “Pathian Fapa minung sinak nih amah tein si loin BIA he aa kawmhnak in a hngalh i Pathian thil a simi vialte kha a langhter.” (St. Maximus the Confessor). Mah bantuk hi Pathian Fapa nih Pathian kong a hngalh ning cu a si. (Mk. 14:36, Mt. 11:27, Jn. 1:18, 8:55 etc). A minung hngalhnak chungah Fapa nih, Pathian lawng nih a phuan khawhmi minung lungthli ruahnak vialte kha a hngalh dih. (Mk. 2:8, Jn. 2:25, 6:61 etc).

Minung a cangmi BIA chungah Pathian fimnak kha a kawmh chih caah Khrih nih a rat hnawhchan mi phuan awk thil vialte kha a minung hngalhnak chungah a hngalh dih hna. (Mk. 8:31, 9:31, 10:33-34, 14:18-20, 26-30). Ka hngal lo” a timi zong hi, phuan awkah thlah ka si lo, tiah a ti duhnak a si. (Cf. Mk. 13:32, Lk. 1:7).

Khrih A Minung Duhnak

Cu bantukin (AD. 681) a voiruknak Constantinople Council III ah Bupi nih, “Khrih cu Pathian duhnak le minung duhnak tiin rianṭuannak phunhnih a ngeimi a si,” tiah a phuan. Annih cu pakhat le pakhat anni ral lo. Sihmanhsehlaw kanmah khamhnak caah Pa Pathian le Thiang Thlarau he a rak thlek ciami kha a Pa nawlngaihnak in minung a cangmi BIA nih a minung sining tein a duh ve,”. Khrih a minung sinak nih a Pathian sinak kha a do lo, a ral fawn lo. Sihmanhsehlaw a Pathian duhnak ah khan a pek dih.”

Khrih Pum Taktak

Bia nih minung cannak taktak kha a lak tikah minung a si caah Khrih pum cu a thi khomi a si. Cucaah Khrih hmai kha suai khawh a si. Cucaah Nicaea khua ah a voihnihnak an tuahmi a voisarihnak Council (787 A.D) ah Bupi nih a thiang hmanthlak le zuk hi ngeih khawh a si ko, tiah a ti.

Cun Bupi nih a zungzal in Khrih pum ah hmuh khawh lomi Pathian cu hmuh khawhmi in aa tuah i Pathian dawtnak kha a kan theihter, tiah a phuan. Khrih minung pum kha amah ta ah a ser cu zeitluk tiangin dah ti ahcun, a muisam thiang an suai tikah zumtu hna nih amah kha an upat khawh.

Minung A Cangmi BIA I Lungthin.

Jesuh nih kannih kha a kan hngalh i a kan dawt caah a nunnak, a lung retheihnak le a temh innak vialte le amah pum hrimhrim kha kannih pakhat cio caah a pek. “Pathian Fapa nih a ka dawt i ka caah a pum kha a pek”. (Gal. 2:20). Amah nih kannih vialte kha a minung lungthin in a kan dawt. Cu a si caah kan sualnak le kanmah khamhnak caah fei in chunhmi Jesuh lungthin thiang cu Khamhtu nih a Pa le minung vialte a kan dawt ti hngalhnak le hmelchunhnak nganbik a si. (Jn. 19:34).