Zumhnak nan ngeih ahcun zei paoh nan tuah khawh ko lai

Nihin ni thiang caan ṭha caan sunglawi a kan petu kan biak kan Pathian a min thiang thangṭhat si ko seh. Nihin Pathian bia in thazang lak dingin caan a petu zumtu nan dih lak cungah Bawipa nih a thar in thluachuah in pe ko hna seh. 

(Matthai 17: 14-20) “Mizapi sin kha an phak ṭhan tikah Jesuh sinah cun mipa pakhat a ra i a hmaiah a khuk aa bil i “Bawipa, ka fapa hi ka zaangfahpiak tuah. Amah cu mitlu a si i a tluk tikah hin mei chung le ti chung zongah a tlu tawn. Na zultu pawl sinah ka ratpi nain an damter kho lo” tiah a ti. Jesuh nih cun a leh i, “Nannih cu a zum kho lomi le a palhmi nan si hrimhrim ko. Zei can dah nan sinah ka um awk a si herh lai? Zei can dah kan umpi hna a herh lai? Ngakchiapa cu ka sinah hin ratpi u,” tiah a ti hna. Jesuh nih khuachia cu, chuak, a ti i a chuak i cu caan thawk te cun ngakchiapa cu a dam colh. Cun a zultu pawl kha Jesuh sinah cun anmah lawngin an ra i, “Zeicahdah khuachia kha kan ṭhawl khawh lo?” tiah an hal. Jesuh nih cun, “Nan zumhnak a zat lo caah a si. Hihi va philh hlah u: Anṭam ci tiate hmanh zumhnak nan ngeih ahcun, hi tlang hi, ‘I thawn,’ ti u law aa thawn ko lai. Zei paohpaoh kha nan tuah khawh ko lai. Sihmanhsehlaw hi bantuk cu thlacamnak le rawl ulhnak lawng nih a ṭhawl khawh; zei dang nih cun a ṭhawl kho lo,” tiah a ti.

Nihin thawngṭhabia kan relmi chungin tlangtar ka duhmi “Zumhnak nan ngeih ahcun zei paoh nan tuah khawh ko lai” timi in thazang i lak hna u sih. Nihin cu mithiang Dominic puai ni a si bantukin mithiang Dominic min a la mi vialte “Happy Feast day” tiin nan kut kan tleih hna. Mithiang Dominic cu teima tein Bawipa ram kauhnak caah a rainṭuantu a si. Pathian aa bochan mi, zumhtlak tein a rianṭuanmi a si. Mithiang Dominic nih a chimmi cu “Teinak kan hmuh nak hnga hriamnam a si lo. Zumhnak le thlacamnak a si,” tiah a ti. “Hnipuan ṭhaṭha hruk nak le, rawl thawthaw einak in tangdornak puan i hruk a ṭha deuh” tiah a ti. Mithiang Dominic a hriamnam ṭha bik cu zumhtlak sinak le thlacam nun ngeihnak, tangdor nun ngeihnak a si. 

Nihin voi(1) Bible kan relmi (Habakuk 2:1-4) chungah “Ka mi hna nih ka sinah zeidah an chim lai, ka va hngah lai” tiah a ti. Na chimmi vialte ngeih piak awk ah Bawipa nih na pawngah an hngah ko. 

Psalm chung zongah “Harnak a ingmi hna caah Bawipa cu himnak a si. Nangmah sinah a ra mi cu ahohmah na dawn hna lo.”

Nihin thawngṭhabia chung kan relmi ah a zawmi pa a pa cu Jesuh sinah a ra i ‘a hmai ah a khuk aa bil i, Bawipa ka fapa hi ka zangfah piak tuah. Na zultu pawl sinah ka rat pi nain an damter kho lo,’ tiah a ti. Jesuh nih “ngakchia pa cu ka sinah rat pi ko” tiah a ti. A pa nih Jesuh sin a rat pi i ngakchia pa cu a dam colh. 

Ngakchia pa a damnak cu a pa i a zumhnak a si. Zumhnak cu lung retheihnak chungin a kan luaṭer tu thazang a si. A zultu pawl cu Jesuh sin an ra i “Zeicah dah khuachia kan ṭhawl khawh lo” tiah an hal. Jesuh nih “nan zumhnak a zat lo caah a si” tiah a ti hna. “Zumhnak nan ngeih ahcun zei paoh kha nan tuah khawh ko lai” tiah a ti hna. Sihmanhsehlaw, hi bantuk cu thlacam le rawl ulhnak lawng nih a tuah khawh tiah a ti hna. 

Nihin mithiang Dominic nun zoh in “Bawipa caah zumhtlak mi sinak, thlacam nun ngei mi, tangdor nun ngei mi ka si” ding kha a kan duh piak. Zumhtlak sinak le thlacam nun ngei mi, tangdormi na si ahcun zei paoh na tuah khawh ko lai timi hi nihin thawngṭhabia cu a si. Nan dih lak in Bawipa nih thluachuah in pe ko hna seh. Amen

Thazang petu /- Saya Francis Khua Peng