Khrih Jesuh cu a kan Khamhtu Bawi a si
Nihin kan rel hnga dingmi (Mt. 16:24-28) tiang a si. “Cun Jesuh nih a zultu cu a thawh hna i, “Ahohmanh nih zulh nan ka duh ahcun, nanmah le nanmah nan i philh i nan vailamtahnak nan i put i nan ka zulh a herh. Zeicahtiah ahohmanh, mah nunnak hmuhnak a duhmi cu a nunnak kha a sung lai i keimah ruangah a nunnak a sungmi cu a nunnak a hmumi a si lai. Mi nih hin vawlei pumpi hi co hmanh seh law, a nunnak a sungh ṭung ahcun zeital a miak hnga maw? A miak lai lo. A nunnak kha zeihmanh in a caw ṭhan kho lai lo. Mi Fapa hi ka Pa sunparnak in tuan ah ka vancungmi hna he ka ra lai i mi vialte kha an rian ṭuan ning cio in laksawng ka pek hna lai. Hihi philh hlah u. Mi Fapa cu Siangpahrang bantukin ka rat nan ka hmuh hlan cu a thi lo dingmi hika ah hin nan um,” tiah a ti hna.
Vailam tahnak cu thlarau lam a si i, taksa lam nih a huat i a doh. Vailamtah cu kan khamhnak a si i, Khrih Jesuh cu a kan khamhtu bawi a si. Vailamtah cu van lam a si i, Khrih Jesuh nih a kan dawtnak hmual a langhternak hmun a si. Vailamtah cu taksa mi zumlotu hna caah an fih bikmi le an huat bikmi a si nain Khrih Jesuh dawtnak a hngal i, a zum i a hnu zulmi kannih hna caah cun kan i hmaihngalpimi le kan i porhlawtnak a si. Vawlei thil ah porthlawt pi awk le hmaihngal pi awk zeihmanh kan ngei lo. A ruang cu kan ngeihmi sui, ngun chawva hna nih hin zungzal nunnak a caw kho lo. Nihin kan relmi thawngṭhabia chungah (Mt. 16:26) chungah, “Mi nih hin vawlei pumpi hi co hmanh seh law, a nunnak a sungh ṭung ahcun zeital a miak hnga maw? A miak lai lo. A nunnak kha zeihmanh in a caw ṭhan kho lai lo” tiah kan Bawipa Jesuh Khrih nih fiang tein a kan chimh.
U le nau hna, na ngeihmi zeitluk in dah a tam? Zeitlukhmanh tam seh law, zungzal nunnak a caw kho lo ti kha kan i fian a herh. Sui le Ngun, chawva zeitluk in dah naa khon cang, zeitluk in dah taksa thil na kawl cang, zeitluk in dah na ṭuan cang? Kawl, hawl le ṭuan ding hi Bawipa nih a kan duhsak ko. Sihmanhsehlaw thlarau karhlannak ram tiang philh tak in rum duhtuk ruangah na nun, nan caan, na zeizong vialte hlinh in vawlei sui ngun chawva na kawl maw? Na kawlnak ah hint ah thil dik, thil hmaan, Pathian zoh bute le Pathian duhning tein thilthiang nunthiang in vawlei thil na kawl maw? Pathian thangṭhatnak caan um lo tiangin le thlacamnak caan um lo tiangin vawlei suingun chawva na kawl a si ahcun cucu Khrih nih an puttermi vailam kha chiah in vawlei kal ningin na kal peng rih ti kha a fiang.
Rum duh ruang i Pathian duh lo ningin vawleimi nih sui le ngun an kawl lioah nang le kei nih cun thlarau thilṭha kha kawl i zuam ko usih law, cucu Pathian dung ningte a si kha i fiang ko usih. Nahchuahnak bia, mi ṭhalonak kong an ni ceih i vawlei bia lawngin vawlei mi nih an khah lioah nang le kei nih cun Pathian dawtnak kong phuang usih law, khamhnak caah thlacam peng ko usih. Taksa rumnak an kawl lioah thlarau laksawng le thlarau rumnak kawl ko usih. Kan zumhnak hneksak kan si i, kan vailamtah a rih tikah Khrih Jesuh sinah i din usih law thazaang a kan pek ko lai. Sawmtu, hnemtu Jesuh Khrih kan ngei. Kan tha chia hlah usih. Kan zumhnak ruangah temhnak kan in tikah vancung in sui luchin nih a kan hngah ko ti kha hngalh in tha nuam tein kan vailamtung cu put i zuam ko hna usih.
Nihin ni hi Mithiang Cajetan a puaini a si bantukin a kong tlawmpal tein kan vun langhter lai. Amah hi 1480 kum ah a chuahmi a si i, 1547 kum ah a nunnak a dongmi a si i a kum hi (60) fai vawlei nunnak a hmang ta. Amah hi mifim cathiam a si i, mirum chungkhar in hrinmi fa a si. Kum (24) a si ah Canon law upadi Doctor buaih a hmumi a si i Khrihfa Bupi nih rak bochan ngaimi a si. (1516) kum ah Siangbawi Ordination a rak hmumi a si. Sihmanhsehlaw Pathian a duhmi, Pathian aa tlaihchanmi a si bantukin a rumnak le a ngeihmi vialte hna cu a hlawt tak, a chiah tak dih i amah a chuahnak khua a simi Vicenza an timi khua ah vawlei in a zaw, a fakmi vialte hna hramh nakhnga ding caah siizung nganpi a sak i thlarau karhlannak ram ah thlarau le Sacramentu in mizaw mifak pawl hna cu a hruai hna i cuticun an nunnak cu khamh aa timmi a si.
Duhdawtmi u le nau, nu le pa hna cu a si ahcun nang le kei vawlei mi kan si caah hin kan taksa kan nunnak hnga ding caah kan kawl a hau ko, kan ṭuan a hau ko. Sihmanhsehlaw kan philh awk lo hnga dingmi cu cu vialte nih na ngeihmi na fimnak, na thiamnak , na ngeihmi sui ngun chawva zeizong vialte nih hin thlarau nunnak caah vancung nunnak na thlarau khamhnak caah a caw kho lo ti cu kan i fian a herh i kan thlarau nunnak i a caw kho tu cu Khrih Jesuh thisen lawnglawng a si. Na ngeihmi vialte nakin nangmah na nunnak kha hi vawlei cung vialte, thil mansung vialte nakin na nunnak kha a sunglawi deuh i a man a khung deuhmi a si ti kha philh loin vawlei taksa ruangah hi vawlei kan nunnak hi kan thlarau hi hell ah tlak loin Khrih pekmi vailamtung cu thanuam tein put in karhlan i zuam ko hna usih.
Thazang petu /- Saya Canute Bawi Kam