Thlarau Lamhruaitu Mitfim
Dawtmi u le nau hna nihin August (4) ah hin thlarau tirawl kan i hrawm awk hnga ding caah bia tlangpi ka tar duhmi cu “Thlarau lamhruaitu mitfim” timi hi a si lai. Hihi kan chim tikah kan rel hnga dingmi, kan i charhchan dingmi cu (Mt. 15:1-2, 10-14) tiang kha a si lai i, cu chungah cun Farasi mi hna nih khan mitcaw lamhruaitu an si bantukin khan “Na Lamkaltu hna hi rawl an ei tikah kan phung bantukin khan kut ṭawl loin rawl an ei” tiah Jesuh kha an chimh tikah, Jesuh nih zei a ti hna tiah cun, “Mitcaw nih mitcaw kha lam a hruai a si ahcun an pahnih in khur chungah an tlai lai” timi kha a chim.
Cucaah dawtmi u le nau hna, nihin kan cathiang nih hin hi Farasi mi hna he a lomi mitcaw lamhruaitu hna kong hi a kan chimh tikah kannih kan khua, kan ram, kan peng ah hin “Lam a kan hruaitu hna hi mitcaw lamhruaitu a si maw, mitfim lamhruaitu dah an si?”timi hi tuaktan kha kan herh ngaingai.
Nihin ah August (4) ah hin kan Bupi nih Mithiang John Mary Vianney timi puaini hi a rak tuah. Amah kong hi kan ruah tikah cun amah hi pupa phung ningin khan Siangbawi cannak dingah ca a rak cawng kho lo, ca a rak zul kho lo. Theology a rak zul kho lo, Psylosopy kha a rak cawng kho lo caah inn ah an rak tlunter ko nain khan anih cu a Siangbawi pa nih khan Thlarau lei ah aa zuam ning, thla a cam kho ning, Pathian bia a ṭihzah ning kha a theih tikah amah nih siangbawi cannak dingah a herhmi Nu Mary kong le thlarau lamhruainak kong hi a rak cawnpiak tikah khan ahmat ṭhaṭha in khan a rak zulh khawh i ca a rak awng ti si. Kha tikah Bishop pa nih Ordination a rak pek tikah hi thlarau tampi an rawknak, Parish hlun, Parish Siangbawi zong a um ti lonak khua ah khan a rak chiah tikah khan kha thlarau lei in a rak rawk dih cikcekmi khua ah khan a va luh tikah thlacamnak he, rawl ulhnak he khan rianṭuan hram kha a rak i thawk tikah cun Satan tukforhnak le hnahnawhnak tampi zong kha a tuar. Cu a tuar lioah cun teinak tampi zong kha a rak hmuh i thlarau tampi zong kha a rak lak ṭhan khawh hna. A thlacamnak le a rawl ulhnak le aa zuamnak thawngin thlarau tampi kha a rak lak hna tikah khan Satan tukforhnak kha a rak ṭhawng chinchin.
Sihmanhsehlaw Satan ṭhawnnak hi a ṭhawng chinchin ko nain khan a sung pe maw tikah ah a pe lo. A nunnak a dongh tiang rawl ulhnak he, thlacamnak he khan rian a rak ṭuan tikah thlarau tampi cu Jesuh Khrih sinah a rak hruai hna timi kha kan theih. Cucaah amah cu hi vawlei cungah hin theology a cawng kho lo, Psylosophy a cawng kho lo, ca kha hawi bantukin a thiam lo nain thlarau tampi cu Jesuh Khrih sinah a rak hruai hna.
Cucaah amah cu Parish tlawngbawi tampi hna caah zohchunh awk tlak, Parish siangbawi vialte hna i zohchunh awk le lamhruaitu mithiang ah Bupi nih a rak chiah. Cucaah dawtmi u le nau hna nihin August (4), Mithiang John Mary Vianney puaini ah hin kannih vialte nih kannih kan tlangbawi, kan Pastor zong hi thlarau mitfim maw, thlarau mitcaw dah a si? Thlarau mitcaw a si sual a si ahcun Mithiang John Mary Vianney nih bantukin khan thlarau mitfim a si khawh nakhnga le thlarau tampi kha Jesuh Khrih sinah a hruaitu a ratpi ṭhan khotu tuukhal ṭha, tuukhal mitfim an si khawh nak ding cah zongah khan kannih vialte nih thlacam usih.
Cun tlangbawi hna lawng si loin khan a dangdang Pathian rianṭuantu vialte hna zong hi thlacamnak in, rawl ulhnak in, Pathian bia zulhnak in thlarau tampi kha lamhruaitu, cawnpiaktu ṭha an si khawh nakhnga ding cah khan thlacam piak hna usih law timi hi nihin ah forh kan duh hna.
Thazang petu /- Fr. Abraham Hrang Hit