Pope cu Tukhal dirhmun in bia a chim zungzal

Editorial Director, Andrea Tornielli nih Mithiang Peter rian chaangtu le Catholic Bupi cawnpiaknak nawlngeihnak (Magisterium) rianṭuannak kong a chimmi. Raltuknak le daihnak, mipeem kong, asiloah artificial intelligence (AI, thluak deu) chan ah minung nih zeitin dah ningcang tein kan nun khawh lai timi kong, Mithiang Peter rian chaangtu Pope cu zeizong vialte ah amah cu thlarau lei hruaitu a si zungzal ko. Rome khua Bishop asi mi Pope cu, “Roman Question,” timi 1929 ah Lateran ah tuahmi Vatican le Italy hi an dang te veve in Uktu nawlngeihnak (sovereign) an ngei tiah hnatlaknak tuah a rak si. Cucaah vawleicung ram a hme bik asi mi Vatican cu Italy i khualipi laifang ah a um i square kilometer cheu (.49 km) lawng asi mi ah uktu zong a si. Pope cu sovereign (siangpahrang) bantukin vawlei cung um Catholic bupi le mi vialte caah rian a ṭuan, bia a chim tikah ramkhel rian a ṭuan ti duhnak asi lo. Pope Paul VI nih October 4, 1965 ah United Nations General Assembly ah bia a  rak chim lio ah hi kong hi ṭha tein a rak fianter cang. “ Nan theih cia bantukin, nan hmai ah a dir i bia a chimmi keimah hi nan mah bantuk in minung ka si ve i ram uk (sovereign) ai-awhtu a si fawn.

 Thlarau lei rianṭuannak ah zalong tein ṭuan khawhnak le amah he aa pehtlai aa naihniam mi ram uk nawlngeitu hna kha zalonnak aamahkhaan awk ah ka ra. Khrih ai-awhtu le a rianṭuantu nih zalonnak tling tein hmuh khawhnak ding caah, kum zabu pakhat hrawng a liam cangmi ah khan Rome khua Bishop le Catholic BupiTuukhal zong nih nawlngeihnak a ngeih ve i hruaitu a si ve ti cu a hmaan ko. Sihmanhsehlaw, amah cu vawlei ramkhel rianṭuantu asi lo. Nanmah he ramkhel lei zuamcawh awk zong ka zuam lo. Zei bia hmanh hal ding kan in ngei hna lo. Mi vialte sinah dawtnak, unau sinak he daihnak caah ṭuan hi kan duhmi asi.