A dikmi dawtnak cu ningkel lo umnak in a luat.

A hman le hmanlo hmuhkhawh lo nak cu mitcaw bantuk asi. Chungkhar a ngei cangmi kha duhnak, ngeih duhnak cu a dikmi dawtnak asi lo. Duhfah tuk nak men asi. A ruang cu ahman le hman lo thleidan khawh lo tiang i muihnak nih a khuhchilh caah asi. A dikmi dawtnak cu duhfah dawtnak he aa thleidan hringhran. Mirum fapa nih misifak mi nu aṭhit cu duhnak mitcaw asilo.

A si a fah ah siseh, arum ah siseh, minung vialte hi aa khat (tluk) dih. Man a ngeihnak a hmuh piak caah a ṭhitmi asi.

Duhfahnak cu thi le sa in a ra mi asi. A dikmi dawtnak cu thluak le thin lung in a ra an ti.Chungkhar um ko bu in ningkel lo in umnak zong duhfah nak mitcaw duhnak asi ko.

(2 Samuel 11:2-18) ah, David Siangpahrang le Bathsheba tuanbia kan rel ah cun a dikmi dawtnak le duhfahnak bianabia pakhat kan thleidang khawh. David Siangpahrangpa cu miding asi ko nain Bathsheba cungah palhnak pahnih a rak tuah. Nikhat ah, David Siangpahrang cu a ihkun in atho i inn cung thlalang awng in khua a cuan lio ah aa dawh ngaimi minu pakhat ti aa kholh liomi nu kha a hmuh tikah a lung ah a cam peng. Cu mi nu kong kha a hlat tikah amah cung ah a dingfelmi ralbawi (bohmu)Uriah nupi asi kha a hngalh. Sihmanhsehlaw va ngeimi nu asi ko buin Bethsheba a laak i a vapa Uriah kha thihnak (hmun) ah arak kuat.

Hi thil sining ah hin David Siangpahrang pa i Bathsheba a thinlung ah a am peng nak hi a dikmi dawtnak kan ti kho lai maw? Vangeimi nupi kha laak cu sualnak asi ti a hmulomi kha a dikmi dawtnak kan ti kho lai maw? Bathsheba laak khawhnak caah a va pa (Uriah) kha thi seh tiah khua akhan mi cu a dikmi dawtnak kan ti lai maw? Cu thil sinning ah David Siangpahrang athil tuahmi cu duhfahnak ruangah asi, thilttha lo tuahnak asi, tiah Bible ah roca attial. Mitcaw dawtnak asi tiah zawmtaih in a mawh phurh.

David Siangpahrang hrimhrim nih misual ka si, tiah a sual aa ngaihchih. A dang zohchunhnak pakhat ka chim rih lai. American ram Crolona ramkulh, Union khua mi nu Susan Smith cu va ngeimi asi i fa pahnih angei cangmi nu asi. Sihmanhsehlaw mah nu nih padang (Findali) an timi pa kha a duh than. Findali nih amah nu fapa hnih khattuanvo ka la kholo, ngakchia hna ruangah kan tthit lailo, ati i mah nu cu Findali he atthen khawh lo caah a fale pahnih kha motor cung a chuan hna i tidil pakhat chungah thilak in a thlak hna. 1996 – Kum July (23) ni ah biaceih zung nih a sual tiah sual an phawt i ngakchia pahnih thahnak thihhlan lo thong an thlak tiah Mekazin ah ka rak rel.

Dawtmi caah sualnak ngeilo a chungchuak ngakchia pahnih kha a thahmi cu dawtnak kan ti kho lai maw? A hman le hman lo, a chia le attha hmanh athleidan khawhlo nak cu a dikmi dawtnak asi lo. Duhfahnak lawng lawng asi. Chungkhar ah dinfellonak kha duhdawtnak asi, kan ti lai maw?

Dawtnak taktak angeimi cu chungkhar dinfelnak kha a hngalh. A kil veng. Duhfahnak tu cu dawtnak taktak asi lo. Mitcaw dawtnak menmen asi. Mitcaw dawtnak cu palhnak tampi a tuahter ttheo.

Duhfahnak bianabia pakhat cu David Siangpahrang i a fapa hrut (Amnon) sining kha langhter ka duh. Amnon cu Tamar an timi nute tthit a duh ruangah raw lei khawh lo tiang in arak ing. Tamar nih a duh nalo in arak ihpi hnu ah cun khahlan i kan dawttuk tiah a rak ti tawnmi nak let tampi in arak huat tthan. (cf. 2 Samuel 1:16). Duhfahnak cu caansau a nguh lo. zeicah tiah dawtnak taktak asi lo caah asi. Cucaah dawtnak dik le mitcaw dawtnak (duhfahnak) kha thleidan thiam lawngah minung cu huham an ser khawh lai i ningkel lo apalh tawnmi duhfahnak lungthin kha a uk khawh akilven khawh lo. Chungkhar ngeicia mi hna zong nih mitcaw dawtnak phun kha hrialawk asi. Duhfahnak cu ningkel lo in umnak hrampi asi, kan ti khawh.