Khamhnak kan sung kho maw?

Nihin ni i Khrihfa Bupi nih rel dingin cathiang a kan timhpiakmi (Mt. 10:16-23) an si i, a tawinak tein (Mt. 10:22) kha kan vun char lai. “Mikip nih nannih cu keimah ruangah an in huat hna lai, sihmanhsehlaw a dongh tiangin aa tlaih pengmi cu khamhnak nan hmuh lai” tiah a kan ti. 

Duhdawtmi nu le pa, u le nau hna khamhnak kan sung kho maw? ti kha tlangtar ah kan duh. Nihin ah Khrihfa aa timi hna nih kan buaipi bikmi cu, khamhnak hi a tlau kho lo, zeicah kan ti a si ahcun kanmah kan tuahṭuannak ruangah si lo. Kanmah ṭhatnak ruangah si loin amah he zungzal pennak chungah um ṭi dingin khaukhih cia kan si caah, Van lei vawlei ser hlanin kannih cu thiam cia kan si caah khamhnak hi a tlau kho lo, kan ṭhatnak ruangah khamh kan si lo i kan sualnak ruangah hell kan tla kho lo, khamhnak a tlau kho lo, tiah a timi hna tampi vawlei cungah um a si. Asiahcun duhdawtmi nu le pa, u le nau hna nihin kan relmi thawngṭha chungah a timi cu, “Nannih cu cenghngia hrang rual lakah thlahmi tuu bantuk nan si, rul bantuk in va fim ulaw ṭhuro bantuk in nan nun va nem u” tiah a kan ti. 

Dawtmi nu le pa, u le nau hna “mikip nih keimah ruangah an in huat hna lai i mi hmaiah an in chuahpi hna lai i an in tuk, an in velh hna lai. Sihmanhsehlaw va ralring u” a ti. Jesuh Khrih nih i ralring u a timi kha tuknak le biaceihnak an luat nakhnga ding caah i phahrelhnak bia va chim u a ti duhnak a si lo. Nan fimnak bia nih an luatter hna lai ti kha a chimduhnak a si lo/biachim nan thiam ruangah nan luat ṭhan lai ti kha a chimduhnak a si lo. ‘Va ralring u’ a timi cu harnak nih an in den hna tikah biaceihnak nan ton tikah keimah ka thawngṭha a simi keimah biatak in biatak lo ah lihbia nan chim sual lai i biatak dotu nan si sual lai” ti tu kha ‘va ralring u’ tiah a kan tinak a si. Vawlei cung tampi Khrih ka zumh a timi hna nih harnak tampi nih a vun den hna tikah minung tampi nih Khrih Jesuh cu an kaltak i biatak dotu ah an nun an hman kha vawlei cungah tampi hmuh khawh a si. 

Nihin ni ah Lamkaltu hna nih an i bochanmi, an rianṭuan bawmtu dingin an zumh bakmi/ thiangthlarau he a khatmi, bawmtu Deacon (7) an thimmi hna chungah aa telmi Antioch khuami Jential mi a simi Nicholas kong kha tlawmpal zoh kan duh. (Biat. 2:6) chungah, kan Bawipa Jesuh Khrih nih Lamkaltu Johan thong a tlak lioah langhnak a hmuhsak i Efesa khuami hna sinah ca ṭial tuah a timi chungah, “Efesa khua hi kong ah hin kan thangṭhat. Nicholas a zultu hna kha keimah nih ka huat bantuk in na rak huat ve” tiah Efesa khua Khrihfa cu Jesuh Khrih nih a thangṭhatnak kong kha kan hmuh khawh. Jesuh Khrih nih huat kan timi cu khamhnak co lo kha a si ko. 

Nicholas a nunning hi zeitindah a ti? A hramthawk ahcun thiangthlarau he a khatmi a si i, bochan awk tlak a si ko natein khamhnak kan hmuhmi hi kanmah kan tuahṭuannak ah si loin, thilṭha kan tuahnak ruangah si loin amah veel zaangfahnak in a si caah vawlei cung, van lei vawlei ser hlan pi ah amah mi si dingin khaukhih cia dingmi kan si, kan sualnak ruangah hell kan tla ti lai lo, kan thinlung chungin Jesuh Khrih cu kan khamtu a si tiin kan cohlan a si ahcun a za timi thinlung put a ngeih tikah cun lam a pial i cu thin lungput he cun khoika dah a kal kan ti ahcun Jesibal, siasal a biami nu sinah a kal i a biaknak a simi Baal biaknak ah a taksa pum le a zultu pawl cu an kal tawn. Baal biaknak cu zeidah a si kan ti ahcun a tawi fiannak in kan chim a si ahcun Baal tlangbawi nu pawl an um i cucu hlawhhlang an si i hurduh cuainak biaknak kan ti khawh. Cucu siasal biaknak a si. Cucu Jesuh Khrih nih ka huat e, tiah a ti. Jesuh Khrih huat cu khamhnak co lo kha a si ko. 

St. Felicity le a fapa (7) hna kong i an zumhnak kong tlawmpalte an tuanbia vun zoh ṭhan hna usih. A.D (kumzabu 02) nak ah a raku mmi St. Felicity kan timi hi fapa (7) a ngeih hna i an nu/hringtu St. Felicity le a fapa (7) hna cu Martha in kan Bawipa Jesuh Khrih a khamhnak thawngṭha ruangah Rome Siangpahrang i thahnak le hremnak in an nunnak a liam. St. Felicity cu a pasal a thih hnuah a nunnak cu thlacamnak le rawl ulhnak le mi cung i ṭhatnak tuahnak in a nunnak cu a hman dih tikah a nunning kha zohchunh awk a tlak i a pawngkam i a ummi vialte siasal a biatu vialte Rome biaknak a biatu vialte nih an hmuh tikah Jesuh Khrih cu an cohlan i an zumh ve cio kha Siangpahrang pa nih a theih tikah Siangpahrang pa nih cun Felicity cu a tlaihter hna i a hremter hna. A biaknak a hlawt ter, Jesuh Khrih a hlawt ter, thawngṭha in pialter a timh. Sihmanhsehlaw Felicity nih a duh lo. Amah cu an tlaih an velh i, amah hi kan tlaih a si ahcun a fapa le vialte hna zong hi kanmah Rome cozah biaknak i siasal biaknak ah an ra ve ko lai, tiah zumhnak an ngei. Hringtu an nu (St. Felicity) a thih hlante ah a fapa (7) hna cu bia ro a vuih tak hna. “Ka fale vancung khi nan van cau in zoh u, kan Bawipa Jesuh Khrih le a mithiang vialte hna nih nanmah cu an in ruahchan hna. Pathian cungah siseh, minung vialte cungah siseh fel tein um i zuam u. Pathian nawl zulh khawh i zuam uh. Pathian kha daw u law, nan zumhnak ruangah ralṭha takin zumhnak ral doh uh” tiah a fapa (7) hna cu bia a cah tak hna i hringtu an nu Felicity cu a thi i, a thih khawh hnuah a fapa (7) hna cu Rome biaknak, siasal biaknak nih khan an lemsoi kho hna natein an pasarih ningte khan an duh lo i, a pakhatnak Januarius, Felix, Philip hna cu an thih hlan lo fung in an tuk hna. 

A fapa (4) nak Silvanus an timi cu tiva kaba siangpi in a hnulei bingtelet in thi lak an nam. A panganak, a paruhnak le a paserihnak Alexander, Vitalis, and Martialis hna cu Khrih Jesuh an hlawt duh lo ruangah an hngawng an tan hna. Hrungtu an nu le a fapa (7) hna cu kan Bawipa Jesuh Khrih a thawngṭha/ biatak kha an chanchung an nunnak a dongh tiang an dir pi a si. Kan Bawipa Jesuh Khrih nih a kan timi cu ‘a dongh tiangin aa tlaih peng mi cu khamhnak nan hmuh lai’ tiah a ti. 

Judah Iscariot Jesuh nih a thimmi a si. Sihmanhsehlaw Jesuh Khrih zuartu a si, khamhnak a co lo. A nunnak in biatak thawngṭha kan Bawipa Jesuh Khrih kha a nunnak dongh tiang a dir pi lo. Nicholas, a hramthawk ah thiangthlarau in a khatmi sihmanhseh, Pathian nih a thimmi kan timi sihmahsehlaw, a nunnak a donghnak lei ahcun siasal biaknak ah a nunnak a hman, Jesuh Khrih huatmi ah aa cang. 

Asiahcun duhdawtmi u le nau, nu le pa hna Khrih kan zumh i biatak thawngṭha kan dirpinak ah hin zeitluk harnak hmanh nih kan dong ko hmanhsehlaw, kan nunnak a dongh tiangin Jesuh Khrih i bochan in a biatak thawngṭha hi dirpi peng ding hi Jesuh Khrih nih a kan duhsakmi a si. Cu hnu lawnglawng ah khamhnak kan hmu lai timi kha nihin ni ah Jesuh Khrih nih a kan cawnpiak duhmi a si. Nan zapi cungah Pathian nih thluachuah bomalza in ṭhumh thlak ko hna seh.

Thazang petu /- Saya Canute Bawi Kam