Pumsa ngandamnak nakin thlarau damnak, sual ngaithiam si hi a biapi deuh

Nihin kan nu Bupi nih a kan thim piakmi thawngṭhabia chungin kan zoh tikah hin a sunglawi tukmi mi thinlung a laatuk mi tuanbia pakhat, thing pakhat a cangmi hi kan hmuh khawhmi a si. Cucu zeidah a si tiah cun pumsa lei in a zawtmi a zengmi pa a tho kho lomi pa pakhat a hawikom pali hna nih khan Bawipa Jesuh Khrih sinah an rak phanh pinak kong hi a si. Mizengpa le a hawikom pali hna an zumhnak hi nihin ah hrawm ṭi kan duh hna. 

Kan Bawipa Jesuh Khrih Kapernaum khua i inn pakhat ah a um lioah a si i thawngṭha a chim timi kha mipi nih an theih tikah mi vialte cu an ra i kan Bawipa Jesuh Khrih sinah an rak i pum cio. An tamtuk hringhran i iin chung lawng siloin innka hmai tiang hmanhah khan dirnak um loin an um. Cuti mibupi nih kan Bawipa Jesuh Khrih bia an ngaih cuahmah lioah khan a lenglei in ruah lo pi in thil pakhat a cangmi zeidah a si? Hawikom ṭha pali hna nih hin a cawlcang kho ti lomi, a zengmi pa pakhat an hawipa kha kan Bawipa Jesuh Khrih sinah an rak panhpi nak kong hi a si i nihin ah na mithlam ah vun cuanter hmanh law, hi zawtnak a ngeimi pa hi a nunnak ah aa nuam lai lo, a tho kho lomi, leng zong a chuak kho lomi, a eidin dingmi a dangdang thil sining vialte lakah midang bawmhnak thawng lawnglawng in a nung mi a si. Asinain thluachuah a hmuhmi cu zeidah a si tiah cun, amah a dawtukmi hawikom pali a ngeihmi hi a si. Hi hawikom pali hna nih hin kan Bawipa Jesuh Khrih nih mizaw a damter hna ti thawng an theih tikah hin kan hawipa hi kan Bawipa Jesuh Khrih sinah kan phanhpi a si ahcun a dam hrimhrim lai ti zumhnak hi an rak ngei. 

Cucaah an thazaang chuah in khua a lum lioah hran in an hawipa cu an phurh i kan Bawipa Jesuh Khrih sinah an kal pi. An zonh tikah hin cu pa hi a rit lai, a fawi lai lo a si. Lam pi ah an tha a ba lai, an thlan a chuak lai. Asinain kha vialte kha an zumhnak nih a ṭhawnter hna i kan Bawipa Jesuh Khrih thengte hmuh dingin an phan. Cu an phanh tikah cun zeidah an ton ti a si ahcun inn chungah mi an khat. Kalnak lam an ngei ti lo, a um ti lo, an i tlum ti lo. Kan kian uh, kan kian u, mizaw kan phur an ti hmanh ah mitampi an chah tuk caah luhnak hmanh a um ti lo. Mi cheukhat cu si u sih law, kan thazaang he kan ra cang, kan i zuam cang luhnak lam a um ti lo, kan tuah khawh tawk kan tuah cang tlung ṭhan ko usih kan ti men ko lai. Hi hawikom pali hna an lung a dong maw, a dong hlei lo. Kan Bawipa ton dingah harnak an ton tikah an kir hlei lo. Kan Bawipa Jesuh Khrih sin phakpi dingah hin lam a pih hmanh ah hin zeitluk in dah zumhnak an ngeih, lam an kawl. 

Pakhat an hmuh i cucu inn cungah kai in phurh/ṭhumh  ding a si. Hawikom pali hna cu an hawipa ih khun he cun inn cungah cun an kaipi riangmang i kan Bawipa Jesuh Khrih umnak thengte zawng ah a cung inn tlang cu an phawh. Jesuh nih mi a cawnpiak cuahmah lio i inn cungin vaivut a vun tla i inntlang an vun kau tikah innchung ummi mibu kha an khuaruah a har tuk lai. Asinain cuti inntlang aa kau dih hnu ah an hawipa ihkhun cu hri in an thlai i kan Bawipa Jesuh Khrih hmai thengte ahcun an ṭhumh. 

Zumhnak i cawlcanghnak cu ṭihnak ngei loin zumhnak taktak in thil a ti ngammi hawikom an si ti kan hmuh khawhmi a si. Cucaah kan Bawipa Jesuh Khrih nih cu tluk in a fekmi zumhnak ṭhawnnak a ngeimi hawikom pali hna a hmuh hna tikah a lung a hmui tuk. Cucaah mizaw pa cu zeitin, “Ka fapa, na lung dong hlah. Na sualnak cu ngaithiam na si cang” tiah a ti. Cu mizaw pa cu kan Bawipa Jesuh Khrih nih damnak hmuh a duh ti kha a hmuh tikah a damter. Zeicahtiah Jesuh nih minung i kan ngeihmi harsatnak nganbik hi pumsa zawtfahnak si loin thlarau dam lonak, sualnak thihnak a si ti a hngalh caah a si. Kan Bawipa Jesuh Khrih nih tahchunhnak ṭha bik a kan pekmi a si. Pumsa ngandamnak nakin thlarau damnak, sual ngaithiamnak a biapi deuhmi a si ti hi kan Bawipa Jesuh Khrih nih a kan cawnpiakmi tahchunhnak a kan pekmi a si. 

Cuka i a ummi biaknak hruaitu pawl hna nih an hmuh tikah aho nih dah sualnak cu a ngaithiam khawh? Pathian lawnglawng nih a ngaithiam khawh tiah an lung chungin an zai, an ruat. Kan Bawipa Jesuh Khrih nih an ruahnak vialte kha a hmuh tikah hin zei a ti, “Mi Fapa nih vawlei cungah sual ngaithiamnak nawl a ngei ti kha hngalhter kan duh hna” a ti i, “tho law, na ihkhun kha i put law inn ah va ṭin” a ti. Cu vialte kha mizeng pa nih cun a tuah tikah mi vialte, a hmumi paoh cu an khuaruah a har i Pathian cu an thangṭhat.

Dawtmi u le nau hna, hi mizengpa le kan Bawipa Jesuh Khrih, hawikom pali hna nih a kan cawnpiakmi thil pathum in tlangtar ka duhmi cu zeidah a si: 

(1) kan ngeihmi harnak nakin kan zumhnak a ngan deuh a herh timi hi nihin a kan hmuhsakmi a kan canwpiakmi a si. Hawikom pali hna bantukin lamphittu a um hmanh ah Pathian sinah phaknak lam kan kawl zungzal a herh ti hi pakhatnak ah thazaang pek kan duh hna. 

(2) Hawikom ṭha kan si a herh. Kan pawngkam ah a bami, a zawmi le harnak a tongmi an um maw. Cucu pumsa zawtnak men si loin thlarau lungdong in a ummi zong an si kho. Anmah kha kan Bawipa Jesuh Khrih sinah a phakpi tu zumhtlak hawikom ṭha kan si a herh. 

(3) Jesuh Khrih ṭhawnnak. Kan Bawipa Jesuh Khrih hi kan pumsa zawtnak menmen lawng a damter khotu a si lo. Kan thinlung a dongh lioah nunnak thar a kan petu, kan sualnak vialte a kan ngaithiam khotu kan Bawipa Jesuh Khrih a si. 

Cucaah Jesuh Khrih, Pathian ṭhawnnak kha i bochan hna usih. Nihin ah nang le kei zong midang hna caah thluachuahnak lam, Jesuh Khrih sin hruaitu hawikom kan sinak ding ah hin Pathian nih a thar in thluachuah kan pe cio ko seh. Amen

Thangzang petu /- Saya William