Pope nih Ulh caan ah ‘dai tein um khawhnak hmun’ ser khawh ding caah nan smartphone pawl kha phit hna u tiah a ti

Pope Leo XIV nih Catholic pawl cu Lent chung ah dai tein um le thlacam khawhnak hmun ser khawhnak ding caah an cellphone pawl phih dingin a forh hna. Cu pin ah, Ukaraine ral thawhnak a kum linak a naih cang bangin, Ukraine ah kahdaihnak tuah colh ding zongin a chimh hna.

“Television, radio le cellphone pawl kha caan tlawmpal chung phih in dai tein umnak hmun ser hna u sih,” tiah Pope nih Angelus biachimnak ah a chim. “Pathian bia kha ruat hna usih, sacrament hna kha naih hna usih law, kan lungthin chungin a kan chawntu Thiang Thlarau aw kha ngai hna u sih. Cun, kan innchungkhar, rianṭuannak hmun le kan phu (community) chung hna ah pakhat le pakhat bia i ngai hna u sih.”

Pope nih zumtu hna kha Lent cu “thlacamnak, rawl ulhnak le pekchanhnak” hna caah hmuhsaktu “ceunak lam” an si tiin cohlaan awk ah a sawm hna. “Hi tuahsernak hna nih hin Pathian he riantuan ṭinak khawhnak a thar in a ser khawh.” Cun, “Dawtnak hrampi a simi Pathian sin kan phak hlaan ah, minung-kan sualnak hma hna kha a thianh khawh i, a damter khawh” tiah a ti.

Leo nih Lent-ulh caan cu “a harmi khualtlawnnak” a si tiah a ti i, “lungdonghnak hna zong fawi tein ton khawh a si. Cun, kapkhat lei zong ah “Mah rumnak, minthannak le nawlngeihnak ti bantuk mah zawnruahnak lam kawlnak zong fawi tuk in a ngeih ter khawh caah ṭih a nung ngaimi zong a si” tiah ralrin nak bia a chim.  Tukforhnak hna cu, “biatak lawmhnak caan ah minung nih kan i thimmi (thil-tuahsernak) aiawhtu men an si,” tiah a ti i a donghnak ah minung kha “lungtlinlonak, le zeihmanh a ngei lomi sining” ah a phakter khawh hna tiah a ti.

Mithiang Paul VI cawnpiaknak biatlang cherchih in, sual ngaihchihnak nih “kan minung sinak kha a sifahter hlei lo. A rumter, a thianter i a ṭhawnter chin heli ah, zumtu hna kha Pathian sinah dawtnak lungthin he i pekchanh khawhnak tu kha a ngeihter” tiah a ti. 

Pope nih cun a pawngkam ummi hna zohkhenh ding zong a forh hna: “Amah lawng a ummi hna caah caan pe hna u sih. A hleiin tar, sifak le mizaw hna kha zohkhenh hna u sih,” tiah a ti. “Cun a herh lomi thil hna cung nan phaisa hman sawh loin, nunnak caah a herh taktak mi hna kha nan hrawmh khawh hna lai” tiah a chimchap. 

Angelus a dih hnu ah, Pope Leo nih kum li tiang ral thawhnak a tong cang mi Ukraine kong he pehtlai in a chim. “Remdaihnak tuah ding caah caan tawn zungzal ding a si lo. Daihnak cu kan lungthin chung ah hmunh ter in kulrang in a fekmi biakhiahnak tuah ding a si cang,” tiah a ti.

“Vawleicung mi vialte hmai ah a cangmi ngaihchiatnak thil sining cungah ka lungthin chungin a chuakmi ruahnak cu a um peng. Fahnak a ingmi tampi an um. Minung nunnak le chungkhar tampi an rawk. Chim khawh lomi fahnak le rawhralnak tampi an um!” tiah a ti i “Raltuknak paoh cu minung chungkhar dihlak hna cungah hliamhma chuahtertu an si,” tiah a chimchap.

Pope nih, “Hriamnam hna cu dai tein um hna sehlaw, bomb puahnak hna zong ngol hna seh!” tiah a ti i daihnak lam sial awkah biaruahnak kha fehter awk zongah a forhfial hna. “Ukraine ram i ral a domi mipi” le ral ruangah harnak a tongmi vialte caah thlacam a sawm hna i, “caan saupi kan hngahmi daihnak laksawng cu kan caan ah hin a tling te ko lai” tiah a ti.  

“Kan Lenten khualtlawnnak cu hneksaknak caan hna ah a fale a bawm zungzaltu a thiang mi kan nu, Mary sinah kan ap u sih,”a tiin Zumtu hna Lenten-Ulh caan khualtlawnnak kha Mary sinah apnak in Angelus cu a donghter.