SUALRHAM TIMI CU ZEIDAH A SI?
Pathian nih minung kha amah mui in a ser i amah hawikawmhnak chungah khan a chiah. Sermi minung nih amah hrawikomhnak chungah cun lungtho tein Pathian tanga hi dawr a hau. Chia le ṭha hngalhnak thingthei einak nih mah kong cu a langhter. “Zeicahtiah mah thingthei hi nan ei ni ah nan thi lai,” (Gen 2:7). Minung cu Pathian sermi a si bangin Pathian kha bochannak le hngalhtheihnak le upatnak kha a ngeih hrimhrim awk a si. Minung nih Pathian kha aa hngatchan i sernak phung le luatnak hmanning kha a ukmi ziaza tahnak kha a zulh a hau. Minung cu khuachia nih a tukfawrh; a lungthin chungah Pathian bochannak kha a thihter i a luatnak kha a ping in a hmanter. Pathian bia kha a ngai lo. Mah hi minung sual hmasatnak chungah a ummi cu a si (Cf; Gen. 3:1-11, Rom 5:19). A hnuah a rami sualnak vialte cu Pathian bia ngaihlonak le a ṭhatnak cungah bochannak ngeihlonak hi an si dih.
Mah sualnak ruangah Adam le Eve cu a hramthawk in an rak ngeihmi thiannak vel kha an rak thlau cawlh. (Cf. Rom 3:23). Cu tikah a sermi hna kha a nahchuah hna tiin an rak hmuhmi Pathian kha an hun ṭih cang. (Cf. Gen 3:5-10). Dinnak hram ruangah rem tein an rak um tawnmi kha atu cu a rawk cang; thlarau nih pumsa a uk tawnmi kha a si ti lo, pa le nu i kawmhnak cu remlonak ah a cang i sualduhnak le ukduhnak in a lang cang. (Cf. Gen 3:7-16). Sermi thil hna he rualremnak cu a cat cang, hmuhkhawhmi thil hna hi ral ah an cang dih. (Cf. Gen 3:17-19). Minung ruangah sermi thil hna cu, “a rawk kho mi” til ah an cang dih. (Rom 8:21). Hmanungbik ah minung cu nawlngaihlo ruangah leidip ah an cang ṭhan. (Gen 3:19, cf: 2:17). Thihnak cu minung tuanbia ah a lut. (Rom 5:12).
Mah sualnak hnu cun vawlei cungah sualnak cu a karh chin. Kain nih Abel cu a thah i cu hnu cun sualnak cu a tam chin lengmang. Israel tuanbia chung zongah Pathian he biakamnak cung zumhtlak loin umnak le Moses nawlbia buarnak in a lang. Khrih a thih hnu hmanh in sualnak cu Khrihfa mi hna lak hmanhah relchawk loin a lu a tun ko. (Cf; Gen 4:3-15, 6:5-12, Rom 1:18-12, ICor 1:6, Biathlam 2:3). Mi vialte Adam sualnak cu in eh dih a si. Mithiang Paul nih hi bangin a chim, “Mi pakhat nawlngeih lonak thawngin mi vialte cu mi sual an si dih, mi pakhat thawngin sualnak cu hi vawlei ah a ra i sualnak in thihnak cu a ra; thihnak cu mi vialte cungah a tlung, zeicahtiah mi vialte cu an sual dih” (Rom 5:12, 19). Lamkaltu nih minung sualnak le khamhnak kha hi bantuk in a cuai a thlai. “Mi pakhat sulank nih vawlei mi vialte kha sualphawtnak ah a hruai hna bangin mi pakhat dinnak a tuahmi nih mi vialte kha sualluatnak le nunnak ah a hruai hna, (Rom 5:18).
Mithiang Paul cawnpiaknak kha zulh in Bupi nih minung cungah a tlungmi thatlonak vialte le thihnak hi Adam sualnak locun theihthiam khawh a si lo tiah a cawnpiak zungzal. Adam sualnak cu mi vialte nih an ngeih di hi cucu thlarau thihnak a si. Mah cu sualhram kan ti. Cucaah Bupi nih pumpak sualnak zeihmanh a tuah kho rih loi ngakchiasem hmanh kha sualnak hram in luatte awk ah tipil a pek hna.
Sualhram kong cawnpiaknak hi Khrih khamhnak he aa naih ngaingai in pehtlaihnak a ngei. Sualhram ruangah minung cungah uknak nawl kha Satan nih a hmuhpah. Sualhram cu thihnak ah a chan khotu pa tangah sal cannak a si. Satan sal cannak a si ko. Sualhram le mi i pumpak sualnak kha fonh in St. Johan nih “Vawlei sualnak” tiah a ti. (Jn 1:29). Hi vawleipi hi Satan ṭhawnnak chungah a um caah minung kan nunnak cu raldohnak a si. (IJn 5:19, cf. IPeter 5:8).