St. Agnes, Virgin & Martyr

(293-304)

Audio (aw) zong in ngai khawh a si. 👇👇

Tuufa te tiah min pek a simi St. Agnes cu aa dawh ngaimi Rome nungak pakhat a si i, a pum kha Pathian sin aa pechan mi a si bantukin chungkhar ser ding kha a al i a duh lo. Amah a helh i tlangval hna kha ka nungak thiang sinak cu mit in hmuh khawh lomi Vancung i a ummi tlangvalpa ka pek cang tiah a ti hna. A fekmi a biakhiahnak kha thlenter khawh a si lai lo tiah a hngal mi mino tlangval hna nih a hnu bik ahcun amah kha Khrihfa pakhat a si tiah sual an phawt. Kum (12) a tlin, AD (304) kum ah biaceih bawi hmai ah an chuahpi. Biaceih bawi nih nem tein lemsoi in le ṭhihphaih in bia a hal zongah a biakhiahnak cu a thleng hlei lo. Meiphu in hremnak thilri hna hmuhsaknak in a ṭhihphaih zongah St. Agnes nihcun zumhnak ralṭhatnak he fek tein a rak in. Cu lengah nu ṭha lo inn ah an kuat. Amah sualpi dingin aa zuammi tlangval pakhat pa cu a mit a rak caw. A rauh hlan ah a lu an tan i Nomantana lam i lungkua thlan ah an rak vui. Amah kha upat peknak caah cu hmun ahcun AD (350) kum ah Biakinn pakhat an rak sak. St. Agnes nih an thah hlan ah a chimtak mi cu “Ka thi cu nan vainam ah aa neh ko lai nain Jesuh Khrih ka pekchanh mi ka pum cu zeitik hmanh ah nan thurhhnawmh ter kho lai lo” ti a si.

Tuahtawn ningin a puai ni a simi Juanuary (21) ah Rome khua i a Biakinn ahcun Tuu pahnih nih rai an thawi. Cu Tuu pahnih hmul hna kha Palia timi Bishop hna upatnak hngawng-oih ah an tah i St. Peter le St. Paul puai ni a phanh lai zan, St. Peter Biakinnpi biakṭheng cungah an chiah tawn. Cu huham ngei hngawng-oih cu St. Peter le amah a rawltu Pope hna sin in a ra mi nawlngeihnak hmelchunhnak caah Bishop hna kha an pek tawn hna.