ADVENT ZARHNI PAKHATNAK (KUM A)

November 30

Bible: Is 2:1-5; Rom 13:11-14a; Matt 24:35-44

Kan nunnak ah timhtuahnak phunphun kan ngei, zeicahtiah mi pakhatkhat a ra lai asiloah kan nunnak ah thil pakhatkhat a cang lai ti kan hngak. Mah timhtuahnak caah tangka le thazaang tampi kan hman. Tahchunhnak ah, puai timhtuahnak, kanmah rianṭuannak caah asiloah kanmah pumpak ṭhitumnak le nau chuahnak caah timhtuahnak tbk an si. A dang pakhat cu inndang i ṭhialnak caah asiloah innthar saknak caah asiloah pension laknak caah timhtuahnak le a dang tampi an si. Hi thil hna hi a ra laimi le a cang dingmi kongah kan i lawmtuk. Asinain Pathian Pennak chungah kan lut khawhnak hnga kanmah le kanmah thihnak caah zeitluk in dah kan i timhtuah?. A ngaingai ti ahcun nihin ah nan sinah ka hrawmmi a hrampi cu hihi a silo. Lamdik ah kan um maw umlo ti kan ruah khawhnak hnga caah ka chimmi a si.

Dawtmi ulenau hna, nihin cu Advent zarhkhatnak a si. Kan  theih bantukin Advent timi cu “ra” tinak a si. Nihin kan thawngṭha ah, kanmah leiin ralrinnak le timhtuahnak kong a kan chim.

Nilo timi mi pakhat kong tuanbia pakhat a um. Pathian nih a ka chawnh ti kha a mang ah a manh zungzal. Zankhat cu a mang ah Pathian nih a chawnh i: “Nilo, pumpak in ton kan duh,” tiah a ti.

Nilo cu a lung a thotuk i Pathian sinah hitin a hal: “Cu caan cu zeitik ah dah a si lai, ka Bawipa?” Pathian nih: “Thaizing zaanlei suimilam paruk ah” tiah a leh. Cucaah Nilo nih zeizong vialte a timhtuah – rawl, a inn, angki thar a cawkmi le a dangdang. Zanlei suimilam paruk ah, zeizong vialte timhcia tein a um i Pathian kha a hngak nain Pathian cu culio ahcun a hung langlo. Suimilam pasarih zongah Pathian cu a hung lang hlei lo.

Zanlei suimilam pariat ah, mihal (bagger) pakhat nih a innka a kingh i rawl eiawk a hal nain zeihmanh a pe lo. A halmi pa cu abiapi tukmi minung (VIP) pakhat ka hngak tiah a chimh i ka in nuamhter (entertain) kho lo tiah a chimh. “Ka lam in chuak cang!” tiah Nilo nih mihalpa cu a hlauh. Cucaah mihalpa cu ngaihchia le rawlṭam buin a kal.

Zanlei suimilam pakua ah, mipa pakhat nih a fapa a zaw caah bawmhnak a hal i a innka a kingh ṭhan. Asinain Nilo nih cun: “Tangka ka ngei lo, ka hman cang, zeicahtiah a biapi tukmi minung pakhat ka hngak, ka Pathian,” tiah a ti. Cucaah mipa cu zeihmanh i put loin inn ah a tlung.

Zanlei suimilam pahra a ih hlan tiang Pathian a ra tilo. Cucaah a hngak kho tilo i a it. Pathian nih a mang ah a chawnh. Nilo cu a thin a hung i Pathian sinah hitin a ti: “Ka Bawipa, zeicahdah na langh lo, kan hngak ko, na caah zeizong vialte ka timhtuah dih. Na muisam hmanh ka hmu lo,” tiah a ti.

Pathian nih “Ka tuah ko. Ka biakamnak cu ka tlinter. Na innka a kinghmi mihal pa kha na philh cang maw? Keimah ka si. Mipa nih bawmhnak an halmi kha na philh cang maw? Keimah ka si ṭhan nain na ka thlah. Nan ka hngal lo. Na ka duh lo” tiah a leh.

Hawi dawt hna, zeidah kan hngah rih? Zei caah dah kan i timhtuah? Zeidah kan kawl? Khuaruahhar thil kan kawl maw? Khrih chuah lai kan hngah ahcun, Khrih cu a luancia kum thonghnih ah khan a rak chuak cang. Amah cu kan Khamhtu le kan unau zong a si. Thiang Thlarau kan lakah a umlai caan kan hngah ahcun kan chungah a um cang nain kan nunnak ah a umnak le a rian kan hngal lo. Khrihfabu chuah lai can kan hngah ahcun Khrihfabu cu kan lakah a um cang. Zumhnak kan hngah ahcun Pathian nih zeizong vialte a kan pek cang. Zeidah kan hngah rih? Zarhpi ni fatin, Missa kan kai, thla kan cam i novena kan tuah. Khrih pum cu kan co i Khrih cu kan chungah aa tel. Asinain Missa kan dih hnu cun kan nunzia hlun ah kan kirthan. Pathian nih kan sinin a zohmi cu nunning aa thlengmi, lamthar le nunnak thar a si. Midang ahleiin mi niam hna ah Khrih muisam kan hmuh khawhnak nunnak a si. Khrih nih a chim bantukin: “Na unau hmebik cungah nan tuahmi cu keimah cungah nan tuahmi a si.” Hi thlenmi nunning hi atu lawng si loin, Atu Le Zungzal caah a si awk a si.

Hi ka hrawmnak donghter awkah, tuanbia pakhat in hrawmh ka duh hna. Saya pakhat nih a zultu hna sinah biahalnak a tuahmi kong a si. Hitin a ti: “Zeitindah ni dang a ra lai ti kha kan hngalh khawh lai?” A zultu hna nih hitin an leh: “Zeicahtiah tuzan cu zanlei a si cang caah thaizing cu ni dang a rat lainak hmelchunhnak a si.

“A si lo, ni a hung chuah tikah, cucu ni dang a rat lainak hmelchunhnak a si,” tiah zultu dang hna nih an leh.

Bawipa nih a leh hna: “Ka dawtmi zultu hna, a dikmi lehnak nan hmu lo. Muihnak chungah na um chung paoh cu na nunnak ah ni dang a um ti lai lo.”

Hihi ahmaan ko ka hawile dawt hna, midang cungah Khrih mui kan hmuh lo chung paoh cu muihnak chungah kan um ko lai. Nangmah thawngin midang sinah Khrih mui na langhter lo chung paoh cu thaizing a um ti lai lo i kan nunnak ah a ra dingmi ni dang zong a um ti lai lo.

Hi kong hi ruatṭhan dingin kan nawl. A ratṭhan tikah ralring deuh in kan um khawhnak hnga le kan i hlauh rih khawhnak hnga a hngahnak vel kha a kan peknak hnga Pathian sinah thlacam ve hna u sih