Nicea Council 1700 kum tlinnak

Pope Leo XIV nih Lamkaltu Khualtlawnnak i Turkiye ram  a tlawn hlan ah Nicea Council 1700 kum tlinnak ah ruahchannak he  Bupi zumhnak rianṭuannak ah lungtho tein tharchuah ṭhan awk ah thazaang peknak ca a kuat.  

Türkiye ah ka Lamkaltu Khualtlawnnak caah timhtuahnak ka ngeih lio ah, hi Cakuat nih hin zumhnak rian nan ṭuannak ah  lungthawhnak tharchuah ṭhan dingin thazaang pek kan duh hna. Kum zabu tampi chung, hi zumhnak a hmunmi, kan zumhnak phuannak hi zumtu hna nih an ngeihmi rothil a si. Cun a thar in phuan le hngalhthiam a phu. Cu caah, International Theological Commission nih a biapi tukmi cauk pakhat an hmuh. Jesuh Khrih, Pathian Fapa, Khamhtu. Nicaea Ecumenical Council kum 1700 tlinnak puai ah hi cauk hi ka chimnak a ruang cu Nicaea Council a biapitnak le aa pehtlaihnak kong hlathlainak caah man a ngeimi hmuhnak a pek caah a si. Biaknak le Bupi lei lawng si loin nunphung le zatlang lei zongah a si.Kan ruahchannak Khrih kong he pehtlai in pekchanhmi hi kum thiang ah hin, 325 ah Pathian Fapa Jesuh Khrih zumhnak kong an thanhmi Nicaea Council pakhatnak kum 1700 tlinnak puai zong kan tuah ve ti hi aa tlakmi a si. Hihi Khrihfa zumhnak thinlung cu a si. Nihin tiang zongah, Zarhpi Ni  paoh ah, Khrihfa vialte pumkhat ah a kan komhtu  zumhnak biakam kha kan chim. Hi kan nunnak caan har ah hin, lungretheihnak le ṭihphannak tampi, ral le thahnawnnak hrocernak,  rawhralnak, sualnak le tlukruanlonak , le kan unau thong tampi nih an inmi rawlṭam tihalnak le sifahharnak lakah, hi zumhnak nih hin ruahchannak a kan pek.

. Nicaea Council chan lio i an rak tonmi harnak hi atu lio i kan tanmi harnak nak in a hmetuai hlei lo. AD 325 caan lio Khrihfa hremnak nih a chuahpimi hma cu a thar rih “Pathian Fapa Jesuh Khrih thawngṭha hramthawknak”, hi biafang hna he Mithiang Mark nih a Thawngṭha cu a thawk, a bia dihlak kha Jesuh Khrih Pathian fapa sinak fehternak ah a tawinak in a chim. Cu bantuk cun, Lamkaltu Paul zong nih kan caah a thimi le a tho ṭhanmi a Fapa kong he pehtlai in  thawngṭha chim awkah kawh a si ti kha a hngalh. A ngaingai ti ahcun, Jesuh cu profet hna biakamnak caah Pathian nih a fekmi “a si” a ti. Jesuh Khrih cu minung cannak a lak hlan ah Pathian sin ah Bia in a rak um. Zeizong vialte amah thawng in ser an si. Mithiang Johan Thawngṭha bia hramthawknak nih a chim bantukin “minung ah a cang i kan lakah a um”. Amah chungah Pathian cu kan innpa ah a cang, kan unau pakhatkhat cungah kan tuahmi paoh cu amah cungah kan tuah ve .

Cucaah hi rian kan ṭuannak ah hin Thiang Thlarau nih a kan umpi i lam a kan hruai nakhnga sawm hna u sih. Pathian Thiang Thlarau, zumtu hna tuanbia lam ah na hruai hna. Zumhnak Hmelchunhnak hna thazaang na kan pek caah le Pa he aa pehtlaimi Pathian Fapa Jesuh Khrih ah kan khamhnak phuannak lawmhnak kan lungthin chungah na kan thawhter caah kan i lawm. Amah lo cun zeihmanh kan tuah kho lai lo. Zungzal a hmunmi Pathian Thlarau, Khrihfabu zumhnak kha chankhat hnu chankhat in tharter ko. A thuk deuh nakhnga le thanh khawhnak ding caah a herhmi thil ah kir zungzal awkah kan bawm ko. Vawlei cung i kan tehte khannak cu pakpalawng a si nakhnga lo, kan zumhnak kha nunter ṭhan awkah, ruahchannak in ceuter ṭhan awk le dawtnak in kan alhter awkah Thiang Thlarau, na velngeihnak mei kha rak thlah ko tuah. Ra ko, Pathian hnemtu, remnak hrampi, zumtu hna thinlung le ruahnak fonh hna. Ra law hawikomhnak dawhnak tem khawhnak nawl kan pe ko. Ra law, Pa le Fapa dawtnak, Khrihfa vialte hna kha tuurun pakhat ah kan pum ko. Zulh awk lam kha kan hmuhsak law, na fimnak thawngin Khrih ah pumkhat kan siter ṭhan ko. Amen.