Lamserh

Audio (aw) zongin ngai khawh a si. 👇👇👇

Lamserh

Chin mi hna nih lamserh cu mithi caah a sunglawi taktak in tuah mi puai ngan a si i, Chin nunphung ah phunglam pakhat in chiah mi a si. Minung pakhat a thih tikah pa a si ahcun tantak mi a nupi nih kum thum chung a zuun a ngaih lai. Mithi cu va a ngeimi a si ahcun, a va nih ngahringdawi a tuahpiak lai. A thimi kum thum chungah pa cu a chungle nih pualthawh tuahpiak a si. Mizaraan le a hopoah lungdonh tucu an tuahpiak dih hna. Lungdonh cu philh lonak caah tuah mi a si. Lung aa donh kho nih cun lamserh zong an ser lawlaw. Cheukhat mi-ngei deuh nihcun an nun lioah sunglawi ngaiin lung an i donh i an hla le an tuanbia kha hmaihngal ngaiin ca ah an khenh/ttial. Cheukhat khua hna ahcun mithi a thlan cungah inn fate an sakpiak hna i mithi a nun lioah a tawnghtham mi thilri tete, banhla, cauk, kedan, chai, tolhtang tibantuk kha an chiahpiak hna. Pa a si ahcun zureu kha thawl chungah rawn in cu innte chung ahcun an chiah fawn. Ei hnga dingah banhla le futhluan zong an chiahchih tawn. Mithi nih an thlarau in an hlam tawn tiah ruahnak a um caah a si.

Mi pakhat a thih tikah a ruak cu ttuang lai ah chiah a si i, mithi a lulei cu inncar lei chiah in an ihter lai. Asiloah milian le misikho a si ahcun zau nawn in an chiah lai. Mithi a lu cungah a ngeih mi thil mansung, thilttha deuh kha bantlang sih in an thlai lai. Darchawn nuva kha an tum lai i pa pakhat le nu pahnih nih an tummi aw ning tein an lam lai. Mah an laam mi cu conglaizawnh ti a si. Mithi laam tinak a si. Cu mithi laam cu a thimi conglawmhnak caah le a tangmi chungkhar hnemhnak caah a si i a ruak an vui hlan tiang chun he zan he laampiak a si. Conglai a zawntu pa nih puan (cawngnak/conlo-tonlo) puan aa aih lai i siangkhan meithal he a laam lai, nu pahnih nih puan an i aih veve lai i hawle an i putpah le thlirpah in pa cu an khalh lai. Innka in miruak tiang, miruak in innka tiang an i thawn lengmang lai i zan khuadei tiang an laam lai.

Cu hnu kum thum hrawng a rauh ah lamserh cu tuah a si. Sia, naa, vok an thah lai i khuami vialte sawm dih lengah khua chingchan rualchan cingla zong kawh dih a si. Lamserh cu nithum a rau i a dihheu mi zong a tam. Cu nithum cu ruak hngah ni, serhte ni le serhpi ni tiah auh a si. Serhte ni le serhpi ni ah paih zong an ser lai.

Lamserh an thawk hlan deuh, zarhkhat chung cu a zanfatin ruakhatlak an tuah i mithi an phuahnak hla vialte kha an cawn pah, an sak pah lai. Ruakha tlaknak ding ahcun maupum/ruapum a tthami le a lanmi (a dingmi) lamhnih tluk sau in pum 30-40 an i damh. Tlaknak hmun ahcun thingluang ka-hnih ah an khan. Kaphnih in nu/pa kha an tthutter hna. A tthumi nu/pa hna nihcun mau/rua ah chiah mi kha an i tlaih, voihnih an tengh i voihnih an khawn. “Tumtum rekrek, tumtum rekrek” tiah khawn a si. Tumtum ti ahkhan an vun i kau i rekrek ti ahkhan an i cip. Ruakha a tlatu nihkhan Lai thilthuam aa ttamh i khatlei in khatlei tiang chuaklak in aa cip le aa kau hun zoh in a ke kha a thlak i zoh dawh ngaiin a um caah a zohtu nih mit-ttheh hmanh philh khawh dengmi laam a si.

Lamserhtu nihkhan chang tampi an den i an i ring. Chang, banhla le futhluan kha zan i ruakhatlak a zoh mi hna kha phawt a si. Zupu zong tampi dah a si. A nikhat in a nithum nak tiang mithi kha rawl hunh hmasa lengmang hnu ah mizapi rawl ei a si.

Lamserh a nikhatnak Ruak hngah ni ah sa thah ding vialte an thah dih. Zanlei khua a hung muih in mi vialte an rak chuak dih. Tlangval nungak leen can thawk hrawng ahkhan “mithi an tlung cang” tiah an hung au i thlakkhatte ah an zapi cun an ttap dih. Chungkhat pawl le mithi ngai pawl an tam deuh. Cu dih cun zu an dah, zapi nih an din i ruakhatlak hram an hun thawk.

Ruakhatlak ahcun pa nih bihthlalang a kut in aa put, a liang ah meithal kha aa put pah in ruakha cu a tlak. Nu pahnihthum nih maimawzal kha an lu ah an i bei, futhluan an i put, hawle an i put i nu le pa khalh bantuk khin an tlak i zoh aa dawh ngaingai. Ruakha cu nu le pa lakthlak in an khawn cio. Ruakha a khawngtu an hnulei veve kaphnih ah ngaknu tlangval tampi kha kaphnih ah an i tthen i, cu hna cu khatlei le khatlei hla an i leh. Capo kha an thlak i an i leh, an pawng i mizapi cu capo sam pah bantuk a si i heh tiah an ni an khek, hla an sa i zan khuadei an i nuam. Cun sangsang tangah baleo rual le darkhuang an thlai hna i sumsel le darchawn he an tum i laam an thiah mi pa nih conglaizawnh laam in laamdot dotthum laam a si ve. Cuticun zan khuadeite conglaizawnh laam le ruakhatlak cu an laam i khua a dei lai fingrei a hung cah hnik ahkhan, rua ka-sarih chung ahkhan a dang rua ka-sarih kha a tanphei in an tthuanh. Cucu “khariat” tiah an ti. Cu bantukin khatlei i ka-sarih cungah an thuanh. Cu khariat tlak cu a har ngaingai caah a hohmanh nih tlak khawh a si ti lo. Tlak khawh lo ahcun thihnak a si tiin an zumh caah uico an tlaih i ruakha cungah an paih/thlah. Cu hnu cun khua zong a dei i ruakhatlak cu ngol a si. Mah ni kha serhte ni ah relh a si.

Nihnih nak cu serhpi ni an ti i khuami zapi an hung chuak dih. Khua cheukhat ahcun serhte ni an ti. Thing an thiah mi hna an ra lut i sarlaam an lam hmasa. Cu an laam dih hnu in zapi i tel in an laam cio. Cu hnu ah cu mizapi cu an i tlai lai i dirlam pawlawtlawh a si. Zan khuadei tiang Laihla sak le lam a si. Paih zong ser a si. A nithumnak cu thikal ni ti a si. Mithi vialte an kal ni, an ttin ni ti duhnak a si. Khua cheukhat ahcun serhpi ni an ti i, hi ni ahhin paih cu an tuah tthiamtthiam. Laam a um ti lo. Khuami vialte nih an tthuttopi hna i mithi hla an sa, zu an ding pah. Zanlei sang ahcun an vuinak thlan ah an kal i tlawnpal an laam, meithal an thlah, zu an i kenmi kha an ding hna i thlanlung an phun, cucun a dih.