St. Hilary (Bishop le Bible Fimthiam)

 St. Hilary (Bishop le Bible fimthiam)

(315-367)

            Kumabu (4) ah a min a rak thangmi Bible lei fimthiam St. Hilary cu mirum chungkhar in AD 315 kum, France ram, Pythia khua ah a chuak. Amah cu milem a biami chungkhar in a rak ṭhanglian mi a si i chungkhar a dirh hnuah Alra an timi fanu pakhat a ngei. Kum 30 a si tikah pathian tampi biaknak, an hruhning kha a rak theih hnuah zeizong vialte sertu Pathian a umnak kong kha a rak hngalh. Ahnubik ahcun a rak kawlmi biatak kha Khrihfa Bible cauk chungah a rak hmuh caah a lung aa thleng i tipilnak a rak ing.

            Mi tampi nih cun St. Hilary kha mi sawhsawh a siko an ti nain Pontia Bishop ah an rak thim. Cu ṭhutdan cu hrial dingin aa zuam ko nain tangdornak cu Bishop rian he aa  tlakmi a si ti kha mi tampi nih zumhnak an ngeihchinnak tu a si ti a hngalh. AD. 353 kum, Bishop cannak a hmuh hnuah a nupi he i sumnak in a rak komh. St. Hilary nih “Bawipa Jesuh cu Pathian a silo” timi zumhnak kha a rak doh i Bawipa Jesuh Pathian a sinak kha fakpiin a rak dirhkamh. Cubangin “Bawipa Jesuh cu Pathian a silo” timi zumhnak kha a rak doh ruangah Rome Siangpahrang Constantus nih AD. 356 kumah ramleng ṭhawlnak dan a rak pek. Cu dan a in chungah Thumkomh Pathian he pehtlaimi Pathian bia cauk ṭha taktak pakhat a rak ṭial. AD. 361 kumah Pontia khua lei a rak kirṭhan i a thih kum 367 tiang Catholic zumhnak kha a rak dirhkamh. St. Hilary cu mi nunnem le mikip he aa komh thiammi a si ko nain Bupi a dohtu ral hna tucu a rak khamh zungzal hna.