January 28, 2025 caah ruahawk cheuhnak
1st Reading Hebrew 10:1-10/ Gospel Mark 3:31-35
1. Hebrew cakuat chungin hika zawn ah kan theih bantukin cawtum le meheh thisen nih sualnak a la kho lo. Asinain Jesuh Khrih Thisen, Kalvari tlang i Vailamtah biakṭheng cungah mah lungtho tein pekchanhmi nih cun a tuahkhawh i a tuah.
Jesuh Thisen nih kan thlacamnak ruahnak a kan put…piak
Hihi Mithiang Johan Thawngṭha ah Jesuh nih vailamtahnak cungah a donghnak thaw a chuah hnuah, kan hmuh.
“Ralkap pakhat nih a hnak ah fei in a chunh i thi le ti kha an chuak” (John 19:33).
Mithiang John Chrysostom nih voikhat cu hitin a rak fianter:
“Khrih cu a thih ko nain vailamtahnak cungah aa thlai rih lioah ralkap pakhat a ra i a hnak ah fei in a chunh i cuka ahcun ti le thisen a thlet colh” tiah Thawngṭha nih a ṭial.
“Atu hi, ti cu tipil innak le a thiangmi Eucharist (Bawipa ThiSa) i thisen hmelchunhnak a si. Ralkap pa nih Bawipa i a hnak kha fei in a chunh, biakinn thiang vampang a hrawh, cun rothil cu ka hmuh i keimah ta ah ka ser.”
“A hnak in ti le thi a luang”. “Ka dawtmi hna, hi biathli hi ruat loin philh hlah u; a dang sullam thuhmi a ngei rih, cucu kan fianter lai. Ti le thi nih tipil innak le a thiangmi Bawipa Thisa (Eucharist) kha a langhter tiah ka ti.
Hi sacrament pahnih chungin tipil innak in, Thiang Thlarau thawngin hrinṭhannak le tharchuahnak a petu thianhnak ti, cun a thiangmi Eucharist in” Khrihfabu cu a chuak:
Jesuh Thisen nih Sualnak in a kan thianhter lawng si loin, Bawipa Thisa kan cohlan i, a Thiang Thlarau rawl kan ei caan paoh ah a pum he pek a si.
Zeitluk in dah Holy Communion (Bawipa Thisa) kan cohlan tawn?
Jesuh Khrih le a khamhnak, a minung sinak thawngin Pathian, A Bia kan nunpi i a Lam kan kal tikah a nu, a unau kan si.
Tipil kan innak thawngin kan dihlak in Pathian innchungkhar taktak ah sawm kan si. Pathian duhnak le Bia nawlngaihnak kan i thim tikah; Pa Pathian, Fapa Pathian le Thiang Thlarau Pathian he zungzal pehtlaihnak ah kan lut. Pathian i “chungkhar” chungtel kan si taktak; Bawipa caah ” a nu, a far le a nau” ah kan cang. Jesuh thawngin, Thumkomh Pathian he “pehtlaihnak” ah kan lut.
Hihi kan zum maw?