2nd Sunday of Ordinary

Thlarau Rawl laknak -Reading 1, Isaiah 62:1-5/ Responsorial Psalm, Psalms 96:1-2, 2-3, 7-8, 9-10/ Reading 2, First Corinthians 12:4-11/ Gospel, John 2:1-12

1. Bible Cauk pakhatnak Genesis Cauk in a donghnak Cauk Biathlam tiang ah, Nupi ṭhitnak cu Bawipa he kan i pehtlaihnak kha a thukbik dirhmun in hngalhkhawh lennak bantukin langhter a si.

 Minung a serdih hnuah “Minung hi amah lawng um hi a ṭha lo” tiah a ti. Nihin ah, Bawipa nih Hebrew profet lianngan Isaiah hmangin bia a chim i “Ngaknu i tlangval nih ngaknu kha a ṭhit bantukin, nan inn sertu nih an ṭhit lai; cun nupi ṭhi tlangval nih a nupi a ṭhitmi cungah aa lawmh bantukin nan Pathian zong nan cungah aa lawm ve lai,” a ti.

 Hebrew profet hna chung i a dang hmun hna ah, Bawipa nih Biakam Hlun chung i, Israel he i umh dingin bia a kamh hna, ti kan hmuh.

 Tahchunnak ah, Hosea Dal 2 caang 19 ah “Keimah he kan i um lai” tiah a ti.

 Hi nih hin Pathian nih a mi hna cungah dawtnak a thukning a langhter. Amah he naih tein pehtlaihnak ngeihter a kan duh.

 Pathian kha zeitindah kan hmuh? Amah cu a hlatnakpi ah kan hmuh maw? Asiloah thlacamnak thawngin Amah he naihniam tein pehtlaihnak ah na ṭhangcho maw?

2. Kan relmi bible pahnihnak ah, Lamkaltu Paul nih Korin khua Khrihfa hna kha Thiang Thlarau laksawng (Charismatic Gift) tiah auhmi kong kha a cawnpiak hna. Cuhna kha Pumhnak ah ningcang loin hman an sinain, Paul nih ahmasa Khrihfabu hmuhtonnak ah aa telmi an si ti kha a fehter hrimhrim.

Thiang Thlarau, Thluachuah Petu Thumkomh Pathian Pathumnak cu lam tampi in kanmah chan Khrihfa tampi caah thilthup a lo. Hi thil sining hi ka ruah tikah Lamkaltu hna cauk chung i a ummi missionary tuanbia tampi lakah pakhat kha ka hun hngalhter ṭhan.

Lamkaltu Dal 19 cu hi bia hna in aa thawk, “Apollo cu Korin khua a um lio ah, Paul cu ram chungah a tlawng i Efesa khua ah a phan i cuka ahcun zultu cheukhat kha a hmuh hna. Annih cu, “Thiang Thlarau nan co cang maw? Zumtu nan hung si maw?” tiah a hal i, “Thiang Thlarau a um tihmanh kan thei bal lo,” tiah an leh (Lamkaltu 19: 1, 2).

 3. Efesa khua i zultu hna bantukin caan tampi ah kan nunnak kan hmang. Thiang Thlarau a um tihmanh kan hngallo bantukin kan um, asi nain rian a ṭuan rih, laksawng a thlet rih i thlarau theitlai khawhnak ding a kan tuahpiak rih.

Cu Thiang Thlarau lila nih cun, pumpak le mibupi lak i pakhat cio kha Jesuh Khrih muisam ah a kan thlen rih.

Cu Thiang Thlarau lila nih cun miphun vialte kha zultu ah ser dingin a kan auh.

Jesuh cawnpiaknak le Biakam Thar zohfelnak nih Khrihfabu nunnak le rianṭuannak, cun zumtu pakhat cio nunnak le rianṭuannak ah Thiang Thlarau rianṭuannak a biapitnak kha a langhter.

Phunglam, Khrihfabu cawnpiaknak le Catholic Catechism kong hlathlainak nih hi thil sining hi pehzulh tein tuahding a si ti kha a langhter. Voikhat lawng a cangmi thil a silo.

Pentecost puai nih aa tinhmi cu – Khrih Jesuh thihnak in a thawhtertu i a ṭhawnnak he Khrihfabu kha thazaang pek kha a si! Thiang Thlarau nih Bawipa he pehtlaihnak le a Pathian nunnak le rianṭuannak ah i telnak ah a kan hnuh. Cu communion (hawikomhnak) cu Khrihfabu chungah nunpi a si.

Catholic Pathianbia Cawnpiaknak (Catechism) nih “Minung pum caah Thlarau a si bantukin, Thiang Thlarau cu Khrih Pum caah a si, cucu Khrihfabu a si.” tiah St. Augustine bia a lak i, a fehter (CCC #797). Thiang Thlarau cu kan chungah le kanmah hmangin rianṭuan dingin kan sawm cang maw?

 Nihin Missa i Thawngṭha cu Johan Thawngṭha cauk chungin a si i cu nih cun Jesuh i pumsa lei a hmasabik khuaruahharnak a tuahmi kha a ṭial. “A ni thumnak ni ah Galilee ram Kana khua ah nupi ṭhitnak puai a um i cuka ah cun Jesuh a nu cu a um ve; Jesuh zong a zultu hna he nupi ṭhitnak puai ah sawm an si ve. Mitsur zu a dih tikah Jesuh nu nih cun, “Annih cu mitsurzu an ngei tilo” a ti.

Jesuh nih cun, “Maw minu, zeidah na ka ti hnga? Ka caan a phan rih lo,” tiah a ti. A nu nih sinum pawl cu, “Aan chimhmi hna paoh kha tuah u,” tiah a ti hna.

Pathian pennak hmelchunhnak hmasabik a langh lio ah Mary cu nupi ṭhitnak puai ah a rak umve ti cu ruahlo piin thilcang mi a si lo.

 Cun, khuaruahhar thil cu Bawipa Nu i nawlnak kha lehnak thawngin a cangmi a si ti zong a biapi. A Fapa le Khamhtu Jesuh Khrih sinah thla a cam.

 Cun cuka ahcun aa pummi vialte sinah le atu ah a Fapa Jesuh Khrih hnuzulh a duhmi vialte sinah – “A chimhmi paoh tuah u” timi fimnak ruahnak cheuhnak a pek hna. Cu biafang hna chungah cun nunnak sullam hngalh khawhnak tawhfung aa tel.

Thawngṭha cauk ah Mary kong tampi ṭialmi a umlo nain, Jesuh i nu a sinak i pehtlaihnak le a zultu hmasabik a sinak tehte khannak pahnih ahcun a umnak a um zungzal ko. Nazareth khua ah Amah he an um ti kan hngalh i cuka ahcun fimnak le pumrua in a ṭhang (Luka 2).

 Kan caah amah le amah aa pekchanhnak thawngin tlanhnak rian a lim tikah Golgotha ​​i Vailamtahnak ah a rak um. Cuka ahcun kan sualnak vialte man a kan liampiak tikah, hmanungbik thihnak ral kha a tei i anmah (sualnak) ruangah a chuakmi Pathian he i ṭhennak kha a phih.

Adang kan programs zong, You Tube ah ngaikhawh asi. A tang i hmanthlak kha hmeh.

A ngaingai ti ahcun, Bawipa nih “A dih cang” tiah a au hlanah a nu cu a dawtmi a zultu Johan sinah a chiah i a inn ah a luhpi.