Kan hnu zarh ah Democratic Republic of Congo nichuahlei ah lungmeihol khur a cimh ruangah zahnih leng a thimi hna caah Pope nih thla a cam piak hna. Cun Mozambique le Portugal ah thlichia hran ruangah nunnak a liam mi hna ca zongah thla a cam piak ve hna. DR Congo ram nichuahlei, Kivu pengkulh ah a ummi lungmeihol bantuk(coltan)khur cawhnak hmunpi cu kan hnu cawn nithum ni ah khan a cim. Cu hmun (Rubaya lungmeihol cawhnak)ah a cangmi ruangah a tlawmbik minung 200 nunnak a liam tiah chaklei Kivu peng uktu nih a chim.
Zarhpi ni i Angelus thlacam lio ah, Pope Leo nih harnak a tongmi hna le an chungkhar hna ngaihchiatnak a tuarpinak le thla a campiaknak kong a langhter i, "Bawipa nih harnak a tongmi hna cu intuar khawhnak thazaang pek ko hna seh," tiah a ti.
M23 hriamtlai nih hruaitu i an thim mi hna nih, Goma in meng 50 hrawng a hlatnak Rubaya pawng ah a ummi kut in sermi lungmeihol cawhnak kha caan karlak ah an ngolter hna.
DR Congo cozah nih cun harnak a tongmi chungkhar cungah an ngaihchiatnak an langhter i an mah he lungthin khat tein an ngaihchiatnak an i hrawmnak kong an langhter nain M23 hriamtlai hna cu phungning loin pengkulh chung ah an lutchuak i an duh poah in leichung chuak thil hna kha an lak tiah sual an phawt hna.
DR Congo cu lungmeihol bantuk(coltan) a tambik a chuahnak a si i cu thil (coltan) cu smartphone, computer le vanlawng engine sernak caah hmanmi thir an i tel.
Angelus thlacamnak ah Mozambique, Portugal le Italy ram hna ah a cangmi tilian ruang i harnaktongmi hna caah Pope nih thla a cam piak hna.Kan hnu zarh chung ah hin Mozambique ram ah thlichia fak ngai in a hrang i minung 150 nunnak a liam i cu ruahpi le tilian ruangah minung tinghra hrawng hartong dirhmun ah an um tiah Vatican News nih a langhter. Portugal ram laifang ah (Kristin) thlichia nih suimilam pakhat ah meng 202 tiang a den hna caah a tlawmbik minung 6 nunnak a liam.
