Epiphany (Langhternak) Puaipi
January 4, 2024 (Is. 60:1-6/ Psm. 7:1-2,7-8,10-13/ Eph. 3:2-3,5-6/ Mt. 2:1-12)
Khrihfabu nih Bawipa i Epiphany puai a tuah bantukin, u le nau hna, i lawm ko u! Lawmhnak nganpi he kan i lawm, zeicahtiah hi puai i a biapi bikmi thawngpang cu Jesuh Khrih cu vawlei Khamhtu a sinak langhternak a si— thimmi Israel miphun ca lawng siloin minung vialte caah a si. Hi biatak cu nihin kan relmi bible vialte ah a hung lang.
A pahnihnak kan relmi bible ah, Mithiang Paul nih khamhnak caah Pathian aa telmi timhtuahnak biathli kha a phuan. Judah a si lomi Jeṭial mi hna cu “Thawngṭha thawngin Khrih Jesuh biakamnak ah rocotu, pumkhat chungtel le hawikom” an si ti kha a kan theihter ṭhan. Mah nih hin Jesuh i dawtnak le khamhnak cu amah a kawlmi paoh sinah pekchanh a si i thleidannak um loin pek a si ti kha a fehter.
Thawngtha chungah, Magi (Mifim) hna tuanbia kha kan theih. Nichuahlei in a rami hna nih Jenṭial mi hna kha an aiawh hna i kan dihlak in an kan aiawh tinak a si. Magi hna i khualtlawnnak nih kanmah thlarau nunnak caah thukpiin hmuhnak a kan pek:
Arfi cu Lamhruaitu ah
Mifim hna kha a chuak tharmi Siangpahrang sinah a hruaitu arfi nih Pathian ceunak Jesuh sinah a kan hruai tikha a aiawh. Arfi nih Magi pawl kha Khrih leiah a hruai hna bantukin kannih zong midang caah ceunak kan si kho ve. Rianṭuannak, zawnruahnak, ngaihthiamnak le zaangfahnak kan tuahnak thawngin Khrih i dawtnak kan langhternak thawngin midang kha Amah he ton awkah kan hruai khawh hna.
Mifim hna i an lungthawhnak
Magi pawl cu vancung siangpahrang kawlnak ah an lung a dong lo. An hnangamnak kha an hlawt i lamhruaitu arfi kha an zulh zungzal caah caan saupi, ṭih a nungmi khualtlawnnak kha an in. An khualtlawnnak nih kanmah i zumhnak biakkhualtlawnnak (pilgrime) a langhter. Kanmah le kanmah hitin, i hal awkah auh kan si: Pathian kawlnak le dawtnak ah kan i zuam ve maw? Vawlei nih a kan buaitertu thil hna kha hlawt in kan thinlung, kan ruahnak le kan thlarau kha Amah sinah pek kan duh maw? Mifim hna bantukin, kan zumhnak khualtlawnnak cu a fawi zungzal lai lo. Harnak, lunghrinnak le tlamtlin lonak hmanh kan tong men lai. Asinain Bawipa bia he hnemh hna u sih: “Na thinphang hlah, na sinah ka um ko.”
Jesuh sinah laksawng pekchanhnak
A donghnak ah mifim hna nih Jesuh sin an phak tikah, an biak i sui, zihmui le lawbaan meikhu laksawng mansung an pek. An pekchanhmi laksawng hna kong kan ruah tikah, Jesuh sinah zeidah, hi Epiphany ah kan pek khawh lai ti ruah awkah sawm kan si? Amah sunparnak caah kan caan, kan thiamnak, kan thilri le kan zaangfahnak tuahsernak hna kha kan pek khawh men.
Tonnak in thlennak
Jesuh he an i ton hnuah, Magi pawl cu lamdang in an chuak, an nunnak ah thlennak nganpi a langhter. Khrih he an i tonnak thawngin an khualtlawnnak cu a thleng. Cubantuk cun, Jesuh he kan i tonnak nih a kan thlen awk a si, nunning hlun kaltak in zumhnak, dawtnak le dinnak nunnak thar cohlan awkah a kan hruai awk a si.
Bawipa i Epiphany puai nih Pathian khamhnak cu mi vialte caah a si ti kha a kan theihter. Hi puai kan tuah lio ah, Vawlei Ceunak a simi Jesuh Khrih sinah midang lam a hruaitu arfi bantuk si dingin kan biakamnak kha tharchuah hna u sih.