Pathian Hnu Zul tak kan si Maw?
Bible relding: Titus 2:1-8, 11-14; Psalm 36; Luke 17:7-10
Nihin kan relmi cathiang hna nih Pathian rian thiang kan ṭuannak ah nawl ngaihnak le tangdornak lungthin le dawtnak he ṭuan dingin a kan sawm.
- Kan nunzia nih midang lam ṭha a hmuhsak ding a herh.
Voi(1) Bible relnak ah Paul nih Titus sin cakuat a ṭial mi ah fimnak he um ding, zumhnak tlak nun zia in nun ding in a forh. Khrihfa hna kan nunnak zong ah kan biachimnak in siseh, kan tuahsernak in siseh Pathian mi hna kan si kha a langhter a herh ve. St. Leo puai ni Bupi a kan tuahpiak bangin St. Leo zong hi Pathian rian thiang a ṭuannak ah ral ṭha ngai in le, lungfim tein, cun zumh tlak tein rian a rak ṭuan mi a si.
Nifatin kan nunnak ah khuaruahhar thil tampi kan tuah khawh len lo hmanh ah kan tuah kel mi thil hna tein khan midang hna caah lam ṭha a hmuhsak tu le dawtnak a langhter kho tu, cun midang hna kha Pathian he a naihter chin kho tu kan si ding a herh.
- Pathian veel nih zeitin dah thianghlim tein kan nun khawh lai timi a kan cawnpiak.
Paul nih Pathia veel kan sinah zeitin dah pek kan si i cu veel thawngin zeitin dah vawlei taksa duhnak hna kha kal tak khawh ding le sual nak hna kha hrial khawh ding a si timi a kan cawnpiak. Pathian veel cu laksawng bantuk menmen in pek kan si lo. Cu veel thawngin kan nunnak ah zeitin dah thlennak kan ngeih lai timi kha a si. Kan bia, kan ruahnak, kan tuahsernak hna nih Bawipa bia hna kha an langhter kho hna maw?
- Thangṭhat nak co ding si loin, Pathian kha tangdornak lungthin he a rian kan ṭuan piak ding a si.
Gospel chungah Jesuh nih sin um a simi hna nih an tuah hnga ding mi kong a kan cawnpiak. A tuah hnga ding mi cu a Bawipa duhnak kha a tuah ding a si a ti. “Kannih cu sal santlailo kan si, kan tuah awk hnga rian a simi lawng pek kan tuah ko cu,” tiah va ti u” tiah a ti (Luke 17:10).
Jesuh nih hitin a ti tikah Pathian rian kan ṭuan man zeihmanh a um lo a ti nak a si lo. A kan cawnpiak duh mi cu Pathian rian kan ṭuannak ah hin thangṭhatnak co ding, laksawng co ding, mi nih kan thangṭhat hna seh tiin ṭuan ding a si lo. Zei thil kan tuah paoh ah hin Pathian cungah lawmhnak ngeih ding tu a si deuh. Pathian nih ka thangṭhat deuh seh timi si loin Pathian dawtnak le a veel laksawng hna cungah lunglawmhnak he kan leh mi a si deuh.
Thazaang petu /- Fr. Fidelis Maung Sein