Pathian Um Duhnak Biakinn Kan Si a Herh
Bible relding: Ezekiel 47:8-9, 12; Psalm 45; John 2:13-22
Nihin cu Lateran Basilica Biakinn pi Pathian sin ap-pekchanhnak puai ni Bupi nih a kan tuah piak. Hi Biakinn pi zong hi Pope hna hmun ṭhutnak Cathedral pakhat zong a si. Hi puai tuahnak nih a kan cawnpiak duh mi cu thing le lungin sak mi inn sawhsawh si loin Jesuh Khrih a zumtu phu hna, a pumpi, a Bupi puai a si nak tu kha a langhter mi a si.
Nihin kan rel mi cathiang hna chungin ruah ding pathum in thazaang i lak hna u sih.
- Pathian nih nunnak le damnak kha a mi hna a pek zungzal ko hna.
Voi(1) Bible thiang kan relmi Ezekiel chungah tiva pakhat cu Biakinn chungin a hung luang ee a ti. Cu tiva nih a panh nak paoh ah nunnak, damnak le theipar ṭha phunphun hna an kho, an tlai ee a ti.
Pathian kan kan thinlung chungah hmunhma kan pek tik caan paoh ah, a veel nih a tonghnak paoh ah nun thlennak a um. Kannih Khrihfa mi hna cu midang hna cungah ruahchannak, daihnak, ngaihthiamnak le dawtnak a phortu kan si timi kha kan theih ding a si.
- Kan lungthin cu Pathian Biakinn thiang a si ding a si.
Nihin thawngṭhabia chungah Jesuh cu Jerusalem Biakinn chung a luh tikah cu Biakinn cu chaw dawrnak le zuarnak ah an thlen kha a hmuh tikah a thin hung i a ṭhawl dih hna ee a ti. Jesuh nih Biakinn thiang cu chawdawrnak si loin, thlacamnak hmun a si nak kha a cawnpiak hna.
Nihin biahalnak kan i tuah hnga dingmi cu: zeibantuk Biakinn dah kan si ve? A caan ah cun kan thin lungchungah huatnak, nahchuahnak, mah zawn lawng ruahnak, vawlei chawva duh tuk nak in a khat tawn. Hi thil hna le sining hna nih kan chungah Pathian kha hmunhma a pe kho lo. Jesuh nih Jerusalem Biakinn a thianh bangin kan thinlung chung i a thurhnawm mi vialte kha thianh ve ding le, thlacamnak le a thiang mi in a khat mi rimhmui hmunhma ah kan thlen ve ding a si.
- Jesuh Khrih cu Bupi a hrampi a si.
Jesuh nih “Hi Biakinn hi hrawk u law nithum chungah ka dirh ṭhan lai” tiah a ti. Jesuh nih a pum thiang kong a chim duhnak a si. Thihnak in ka tho ṭhan lai tiah a ti nak a si.
Jesuh Khrih cu kan zumhnak hrampi le Bupi a hrampi a si. Mi in hmuh khawh mi Biakinn hna hi an i dawh ngai ko men hna lai. Sihmanhsehlaw, a nung mi Bupi, Biakinn pi kan timi cu Jesuh Khrih cawnpiak ning in a zul mi hna le a nung mi hna kha an si deuh.
Jesuh Khrih a cohlang i kan lungthin chungah hmunhma a pe kho zungzal tu, cun Jesuh cawnpiak nak hna kha a tak in a zultu le midang hna nih kan mah hna thawngin Jesuh Khrih kan pawngah a um ko timi an hngalh khawhnak hnga ding caah nunzia dawh in nun khawh i zuam ding a si.
Thazaang petu /- Fr. Fidelis Maung Sein