Hakha ah ngakchia (26) voikhatnak Bawipa Thisa an hmu i, (85) Thiangthlarau thazaang an hmu
Hakha Diocese, Hakha, St. Joseph’s Cathedral Parish ah Mithiang dihlak hna puai ni (Nov 1) ah ‘voikhatnak Bawipa Thisa hmuhnak le Thiangthlarau thazaang peknak’ an tuah. Cu puai an tuah hlan Oct 26-31 ni tiang ngakchia Pathian bia cawnnak zong an ngei. Cu ngakchia Pathian bia cawnnak ah ngakchia (280) hrawng an i tel kho. Cu hna chungah Catholic Khrihfa ngakchia hna lawng si loin Protestant ngakchia dang zong an i tel ve. Cu cawnpiaknak cu Hakha Diocese i Pontifical Missionary Childhood Association (MCA) hruaitu Sr. Gabriella Om Pai (SJA) le a rianttuan hawi hna nih an hruai hna. Cu puai ah ngakchia (26) cu voikhatnak Bawipa Thisa an hmu i (85) nih Thiangthlarau thazang an hmuh. Cu Missa Raithawinak cu Hakha Diocese hruaitu Bishop Lucius Hre Kung nih a hruai hna. A phunchimnak ah; Mithiang dihlak hna puai cu Bupi Calendar chung i min aa telmi hna lawng siloin Vancung ram ah zungzal nunnak a hmu cangmi vialte kha upat conglawmhnak puai a si. Matt 5:1-12 chung i Jesuh Khrih nih a kan cawnpiak mi thianhlimnak timi cu vawlei tahnak le hmuh ningin a si lo tiah a chim chap. Ngakchia hna kha; ‘nan i hrukmi thilthuam rang tete bantuk hin nan nunnak zong vawlei mithmuh lawngah a thiangmi siloin Pathian hmaika ah aa dawh mi le a thianghlimmi nan si ter lai’ a ti hna. ‘Voikhatnak Bawipa Thisa hmuh le Thiangthlarau Thazaang hmuhnak cu nikhat ca puai tuahnak le biaknak lei cawnpiaknak a donghnak a si lo, hi hna cu ngakchia hna zumhnak lamthluan ah a biapi mi hramthawknak a si’ a ti. Cucaah Bawipa Thisa le Thiangthlarau thazaang an hmuhnak thawngin thlarau leiah tthang lian in Pathian nawl ningin a nungmi si ding a forhfial hna. Bishop nihcun ‘nihin i nan hmuhmi Sacrament hna hi chikkhat ca lawng siloin nan nunnak dihlak caah a si. Nannih cu Mithiang hna bantukin nun dingah kawh auhnak a hmu mi nan si’ tiah a ti. Bawipa Thisa cohlannak le Thiangthlarau thazaang hmuhnak cu puai pakhat men siloin Catholic zumhnak ah pehzulh in tthan lianh dingah i thawknak a si.