Pope Leo 14: Hliamhma a thlopbol i dinfel lo nak a dotu ramkhelnak nih ruahchannak a pek

1965 kum ah chuahmi cauk “Lunglawmhnak le Ruahchannak” (Gaudium et Spes) chung kha chirhchan in, Cawn nithumni i mipi he i tonnak ah, Pope Leo 14 nih, zumtu Khrihfa hna kha daihnak ser awk ah chawlehthalnak (ecnomic) le ramkhel rian ah zeitindah i tel awk asi timi kong he pehtlai in biachimnak a ngei. Khrihfa zumhnak le Catholic bupi nih ziaza phunglam cawnpiaknak ah, chawlehthalnak le ramkhel rian ah i telnak thawngin daihnak sernak lam pakhat a si kho, tiah Pope Leo XIV nih November 4, 2026 ah Vatican i mithiang Peter Biakinnpi tual ah mipi sin ah a chim. Mipi nih an intuarmi hliamhma hna kha a thlopbol, a damter i le dinfel lonak kha a ralchantu ramkhel hna cu hmailei caah ruahchannak hrampi a petu an si, tiah a ti. Pope Francis nih a rak chim bal bantuk in, raltuknak cu ramkhel hna le minung vialte caah sunghnak le zawtlaknak, ningzahnak le ngaihchiatnak le ṭhatlonak thazaang ṭhawnnak hmaiah khukbilh in ṭah aihraamnak asi tiah Pope Leo 14 nih a chim chap. Catholic Khrihfa hna nih Catholic an sinak kha an nun ziaza le an zumhnak ah langhter in ramkhel lei ah siseh, chawlehthlanak rian ah siseh, minung caah ṭhathnemnak a chuahpi si awk ah khuaruah thiamnak (criteria for discernment) kong a cawnpiak hna. Mino hna nih zohchunh awk tlak nusal ṭha pasalṭha hna an ziaza kha i cawn in Khrihfa chungkhar hna le Khrihfa zatlang nunphung ah nunzia dawh in a ṭhanglianmi an si khawhnak hnga cawnpiak awk an si tiah Pope nih a ti.

 Chawlehthalnak (economic) he pehthlai in vawlei cung daihnak caah dawnkhaantu asi mi ṭihnung ral cu, tlukruannak le dinfelnak a umlo nak, asi lo ah, Pathian sermi thil (creation) kha upatlonak ah hrambunh mi rumnak le chawlehthalnak ṭhanchonak asi tiah Vatican Council 2 nak i Bishop le siangbawi hna nih an rak chimmi kha Pope nih a langhter ṭhan. Vatican Council 2 i cauk pakhat asi mi “Gaudium et Spes” chung ah, fimthiamnak lei ṭhanchonak lawng a za lo i chawlehthlanak (economic) ṭhanchonak cu minung caah ṭhathnemnak a chuah zungzaltu le minung rianṭuannak le minung uknak kut tang ah a um zungzal awk a si tiah Khrihfa lungthin hmuhning kha a langhter. Sifak santlai lo a derthawmmi hna le ralzaam mipeem hna kha thlei dannak um lo tein a zohkhenh a bawmchantu awk ah a hlan nak in thazaang chuah le ṭan laak a herhnak kong a chim chap. Ramkhel hna nih chikkhat caan khat ca lawng ah rianṭuan si loin caansau a hmunmi nuhrin covo le minung limhang upat kilven awk ah zulhphung sernak a biapi ah chiahnak lam lei a kal awk asi tiah a ti. Ramkhel rianṭuantu hna le Bupi hi hmunkhat te ah ṭhatnak rianṭuanṭi khawh asi. Ramkhel lei rianṭuantu hna le Catholic Bupi cu anmah te cio in an rian le an sinak ah nawlngeihnak an ngei cio, sihmanhsehlaw, an pahnih in mivialte caah ṭhatnak le zatlang mibupi caah rian a ṭuanmi an si tiah Pope Leo 14 nih a ti.