MIZAPI HMAI AH JESUH A NUNNAK BIATHUK HNA

Jesuh Tipil Innak

Zapi hmaiah Jesuh a umnak cu Jordan tiva ah Johan nih tipil a peknak in aa thawk. (Lk. 3:33, Lam. 3:22). Johan nih, “Sual ngaihthiamnak caah lungthlen tipilnak” kong kha a chim. (Lk. 3:3). Misual tampi, ngunkhuai khawltu hna le ralkap hna, Farasi hna, Sadusi hna le hlawhhlangnu hna cu Johan sinah tipil in awkah an ra. (Lk. 3:10-14, Mt. 3:7, 21:32). Cun, Jesuh a hung lang. Tipil petu cu aa laklawh; sihmanhsehlaw Jesuh nih a hnek i tipilnak kha a pek ve. Cun Thiangthlarau cu thuro mui in a rung lang i van in aw pakhat nih a chim; “Mah hi ka dawmi ka Fapa a si,” tiah a ti. (Mt. 3:13-17). Mah hi Jesuh cu Israel mi nih an hngahmi Messiah le Pathian Fapa in a langhnak (Epifani) cu a si.

Jesuh tipil a innak cu temhnak a ingmi Pathian sal, tiin rianṭuan hram a thawknak a si. Amah nih amah kha misual hna he rel chih a duh. Amah cu Pathian Tuufa, hi vawlei sualnak a kalpitu a si. (Jn. 1:29, Is. 53:12). A thi in tipilnak a hmuh chungnak a si. (Mk. 10:38, Lk. 12:50).

Amah nih Pathian duhnak kha a tuah cang i cuticun dinnak vialte kha tlinh hram a thawk. Kan sualnak vialte kha hnawh piak awkah thihnak tipil kha in awkah a hna a tla. (Mt. 3:15, 26:39). Pa aw nih a Fapa cungah a lung tlindihnak kha a langhter. (Lk. 3:22, Is. 42:1). A pawi cangka in Jesuh nih a rak ngeihmi Thlarau cu a cungah aa din. (Jn. 1:32-33, Is. 11:2). Jesuh cu mi vialte caah Thlarau hrampi a si lai. Tipil a innak ah vancung cu aa hung. (Mt. 3:16). Vancung cu Adam sualnak nih a khar cangmi a si. Ti hna cu Jesuh le Thlarau ṭumnak nih a thianter cang. Cucu sertharnak kha a chim duhmi a si.

Tipilnak thawngin Khrihfa cu Sacrament phungah Jesuh Khrih he i lawh a si. Jesuh cu tipil innak in a thihnak le a thawhṭhannak kha a hmuhchung cang. Khrihfa zong mah le mah i niamternak le lungthlennak ah luh ve a si i Jesuh he thawhṭhan awkah ti chungah a pilmi kan si. Fapa chungah dawtbik fa si awk caah ti le thlarau in hrin le “nunnak thar ah nun” a hau. (Rom. 6:4).

Jesuh tukfawrhnak

Johan sinin tipil a in khawh cangka thetse rawnah Jesuh cu thlacam in a um. Thlarau nih Jesuh kha ramcar chungah a hruai i cuka ah ni (40) chung raw lei loin aum. Amah cu sahrang hna he an um i vancungmi nih an rak zoh. (Mk. 1:12-13). Mah can a donghnak ah Satan nih voithum tiang a tukfawrh. Pathian kha hneksak awkah a fial, Jeush nih a leh ṭhan. Paradais i Adam tukfawrhnak le thetse rawn i Israel tukfawrhnak kha a bil ṭhan i, cun Satan nih “caan ṭha a hmuh hlan tiang” a chuah tak. (Lk. 4:13).

Thawngṭhabia a ṭialmi hna nih mah thil a cangmi hi khamhnak sullam in an sawh ter. Jesuh cu Adam thar a si i fek tein a dir zungzal. Adam hlun cu tukfawrhnak ah a tla, an ti. Jesuh nih Israel auhnak kha ṭha tein a tlinter. Thetse rawn chungah kum (40) chung Pathian thin a huntermi hna bang si loin Khrih cu Pathian duhnak kha a dihlak in a ngai dihmi Pathian sal, a sinak kha aa phuan. Hika zawnah Jesuh cu Satan teitu a si. Amah nih miṭhawng mi kha an chuhciami thil chuh awkah a ṭemṭawn khotu a si. (Ps. 95:10, Mk. 3:27). Jesuh tukfawrhnak a teinak nih temhinnak a tei lainak kha a hmuhsak chung i Fa nih a sangbik Pa a dawtnak kha a hmuhsak.

Jesuh tukfawrh innak nih Pathian Fapa Messiah a sining kha a langhter i cucu Satan nih a ti ning le minung nih siter an duhning he aa ralchan. (Mt. 16:21-23). Cuticun Khrih nih Satan kha a kan tei piak. “Zeicahtiah kannih nih kan derthawmnak ah a kan zaangfah khawh lomi tlangbawi ngan kha kan ngei lo, zeizong te ah kanmah bantuk tein hneksaknak kha a in nain a sual lo. (Heb. 4:15). Lent caan chungah ni (40) chung ulhnak tuahnak in Bupi cu kum fatein Khrih ramcar chung ulhnak biathuk he aa kawp zungzal.