Pope Leo XIV: Chungkhar hna zong Bupi Rianṭuannak ah lungtho Tein i Tel ve hna Seh
Amoris Laetitia a chuahnak kum (10) tlinnak philhlonak meeting a dih ah Pope Leo XIV nih meeting tuahsernak a phi chuak hna kha ka zohṭhan lai tiah a chim. Cu lengah innchungkhar hna cu Diocese hna nunnak le mission rianṭuannak ah a zungzal in aa telmi an sinak lai amah pumpak nih ruahchannak a ngeihnak kong kha a hleiin a langhter.
Pope Leo XIV nih mipi sinah a kut a thlir lio (Photo Credit: Vatican news)
“Nan theih bantukin tu hrawng cu nanmah he ka um kho lo. Nan thlacamnak hna le hmunkhat i nan cawlcanghnak hna cungah a hleiin ka lung aa lawm. Nan hmuhtonmi pakhat le pakhat nan i ruahnak le ṭha tein nan i ngaihpiaknak hna cu Bupi pumpi caah thluachuah sung taktak a si.”
Pope Leo XIV nih Pope Francis i innchungkhar he pehtlaimi Synodal tonpumhnak capar a simi Amoris Laetitia a chuahnak kum (10) tlinnak meeting i a donghnak caan hmannak ah a biacah cu a cunglei bia in a hram a thawk.
Nithum ni zingka ah Cardinal Luis Antonio Tagle, Cardinal hna College hruaitu nih Pope aiawh in October 7-14 tiang an tuahmi meeting a donghnak ah Missa Raithawinak a tuah.
A biacah chungah; an lunglawmhnak, an tonmi harnak hna le an ruahchannak hna a hrawmtu innchungkhar hna cungah Pope nih a lunglawmhnak a langhter. Cu lengah Nichuahlei Catholic Bupi hruaitu hna le Bishop hna tonpumhnak i hruaitu hna zong kha hi meeting caah hlankan in an timhtuahnak le caan pek in an i telnak cungah Pope nih a lunglawmhnak bia a chim.
“Nan tuahsernak le nan ceihmainak a phi nan chuahmi cu ka zohṭhan lai i a caan a rem tikah ka ruahnak le ka hmuhning ka langhter te lai” tiah Pope nih meeting a kaimi hna kha fiang tein a chimh hna.
Cun, a chim rihmi cu “nanmah pumpak nih nan hmuhtonmi le nan comi thluachuah hna hi nan Bishop hna tonpumhnak le Diocese hna sinah atu ah phawtzamh cio dingin forh kan duh hna. Cu lengah Amoris Laetitia ah aa telmi chimhhrinnak hna kha hrambunh in chungkhar hna he hmunkhat in Khrih Thawngṭhabia kha pehzulh in phuang chin uh” tiah a cah hna.
A bik in Pope nih “Chungkhar hna cu nan Diocese nunnak le mission rianṭuannak ah a zungzal in aa telmi an sinak hnga le nan hmailei lamthluan ah tlangtlakpiak thiamtu an sinak lai kaa ruahchan ko” tiah a ti.
Meeting a kaimi vialte kha anmah le an umnak hmun cio an phak tikah an pawngkam i a ummi minung hna kha ‘Pope cu nanmah he hmunkhat in thlarau lei in nan pawngah a um zungzal. Cun nanmah kha thazaang an pek zungzal hna’ tiah chimh dingin Pope nih a forhfial hna.
“Nanmah pumpak cio kha Nazareth khua in a thiangmi innchungkhar i bawmhchanhnak tangah ap buin nan caah thla ka cam bantukin keimah zong thla nan ka campiak ve nakhnga kan nawl hna” tiah Pope Leo nih a chim hnu ah thluachuah a pek hna.
Source: Vatican News