Fa Ngeihning Phungphai
- Fa pawi, ngeih tikah i zohkhenh ningcang (2)
Nau a ttha tein a chuah hnu lawngah zuhoi an rak tuah donhmi kha an phongh i cuka ah a ummi nih an ei cio. Nau an i tthen in pa si kun ni 15, nu si kun ni 12 a si tiang a nu kha innleng ah a chuak lai lo. Ihnak ah a it lai i a ke kha i cante le rem tein a thluan lai i a chiah lai. Cu lo ahcun a ke aa tawisau lai i a ruh aa kammi hna kha an i fonh tikah an i rem lai lo. A it tthiuttheo ko lai. A va zong khual lamhla le lo ah a riak in a umkal lai lo. A nu nih nau i a lai kha a tlongh tiang a hnukhang kun, cawek car kangdap kun, a lai ah an surh, an thuh lai. Naukun a thian tikah nau ngeihnak i an hmanmi thilpuan vialte kha tikhor, tiva he an i naih ahcun a naihnak bik hmun tibantuk ah an kalpi lai i an suk hna lai. Cu thil an suk ni lawngin a kun a thiang ti khawh a si. Cucu ‘kunthian’ kan ti. Fater an ngeih tikah ‘hneihnet’ an tuah lai. Inn kha zankhat an hrenh lai. Cu zan cu a lengmi nih innchung ummi hna kha an chawnbia hna lai lo. Arhli sen in ruahring an tuahpiak lai.
Pu Hnawm Mang nih a fianh ning ahcun ruahringmerh timi cu nau a chuah khan rua no corhka kutdong tia kha an sah. Cu rua cu an merh i ‘ai hlah, ttap hlah, cang hlah’ tiah thla an cam hnu ah mei cungah an chiah. Cu ruahring an merhmi cu ni 7 a tlin tikah khualeng ah an hlonh tawn. Cu ‘hringmerh’ asiloah ‘hneihnet’ an tuah duhnak a sullam cu, mah fate kha an ngandam seh, rem tein um seh ti kha an duhnak a si. Cu hringmerh an tuahnak arhli sa cu a va lawng nih a ei lai i a ei hlei cu khualeng ah a thlet lai. A va nih mah sa a ei chung vialte kha a nupi cu thla a cam lai. A va nih a mak cangmi le a va nih a thih hnu ah a chuakmi fate (posthumous child) a chuah lio ah, hneihnet an tuah a si ahcun an thahmi sa co ahohmanh nih ei loin khualeng ah an thlet dih ko lai.
Cu hnu ah ni tlawmpal ah naurai an tuahpiak tthan lai. Fater caah tuahpiak a si. A hmasa ah arpi sen in an tuah lai i a hnu ah arpi nak in an tuah tthan lai. Naurai tuah cu nupitak he an tuah mi a si ahcun an nuva in an ei tti lai. Nupichun he an tuahmi a si ahcun a nupi nih thla a cam lai i a va lawng nih a ei ko lai. Fa pahnihnak an ngeih i arhmanh an tuahpiak ahcun a u pa, fater kha thlacamnak le einak ah aa tel ve lai i pathumnak caah an tuahmi a si ahcun a ule pahnih zong an i tel ve lai. Zei bantukin fa an ngeih hna zongah pate a chuah ahcun phuntungtu ti a si i nute a chuah ahcun arsathahtu tiah lawmh saih a si ko. Nu nih ttiattum lo i an um tikah thih le nun karlak ah um a si caah an thlantlang kha i lamh in fahrin a si ruangah ‘Nupi pawpi phawh, pasal ramhran’ ti tiangin phung an thluknak zong hi a si.