Rianṭuannak le Thlacamnak

Bible relding: Galatians 1:13-24; Psalm 138(139): 1-3,13-15; Luke 10:38-42

Nihin kan relmi cathiang hna nih an kan sawmmi cu: zeitin dah Pathian nih a kan kawh, zeitin dah a kan theih, cun zeidah biapi taktak ah chiah in thim ding an si timi kong an si.

Voi(1) Bible relnak ah Paul nih Khrih he an i ton hlan le an i ton hnu a sining kong a chi. Hlaan ah cun Khrihfa mi hna hremtu pakhat a rak si nak, an pupa hna cawnpiak nak hna fel tein a zulmi a sinak, sihmanhsehlaw Pathian nih a kawh hnu ahcun a nu paw chungin hrin a si hlan ah Khrih thawngṭhabia phuang tu si dingin kawh a si nak hna kong a chim.

Paul sining nih a langhter mi cu kan hnu lei caan hna kan rak sinak hna kha zoh in Pathian kawh mi kan si lo. A caan ah kan rak palh kho, thazaang dernak tampi kan rak ngei kho, a palh mi biakhiah nak zong tampi a rak tuah kho mi kan si men lai. Sihmanhsehlaw, Paul nun nak nih a kan cawnpiak mi cu, hlaan ah Khrihfa hna le Pathian bupi a rak hremtu hmanh kha a bupi caah mission rianṭuan tu si ding in a ko ṭhan tu a si timi kha a si.

Pathian nih a tling cikcek mi hna lawng kha a rianṭuan tu ding ah a thim hna lo. Mi sawhsawh a simi le palhnak tampi a rak tuah tu hna, theih hngalhnak tlawm te lawng a ngeimi hna hmah kha a kawh hna i a rianṭuan ding ah a thim ko hna. Cun a thluachuah in a thuam hna i a thlen ko hna. 

Psalm hla ṭialtu pa nih: Maw Bawipa, nangmah nih kan ka theih dih cikcek ko tiah a ti.

Pathian nih kan zeizong vialte cu a theih dih taktak ko. Kan ruahnak, kan harsatnak, hmai lei caah kan i ruahchannak, kan zaangdernak, kan chim thiam lomi tiang in a kan theih dih taktak ko. Cucaah Psalm hla ṭialtu pa nih: Maw Bawipa, nangmah nih na ka thieh dih cikcek ko tiah a timi hi a si. 

A caan ah midang hna nih a kan philh ko men lai, asiloah a kan theih palhnak zong a um ko men lai. Sihmahsehlaw, Pathian hmai ah cun philh kan si bal lo. A veel thluachuah thawngin khuaruahhar in a kan thlen khawh timi kha kan theih ding a si.

Thawngṭhabia chungah Martha le Mary hna kong nihin ah kan rel. 

Bawipa nih a len hna lio ah Martha cu eidin chuah khinnak in buai ngai in a um lio ah Mary tu cu Jesuh ke tang ah dai tein a um i a cawnpiak nak kha ṭha tein a ngaih hna. Martha cu a lungsau kho ti loin hi tin a ti: “Bawipa, kan nau nih keimah lawng zeizong te tuah dingin a ka rinh lai maw, keimah lawng nih maw rian hna hi ka ṭuan lai” tiin a ti tikah Jesuh nih: “Martha, Martha, thil tam tuk kong ah na lungre a thei i na ing a puang. Sihmanhsehlaw, a herh taktak mi cu pakhat lawng a si ko. Mary nih ahmaanmi thil cu aa thim cang i cucu ahohmanh nih an chut lai lo” tiah a ti.

A caan ah cun kan ca zong ah ṭih a nung ngai mi a si. Midang hna caah ṭhatnak rianṭuan timi hi a ṭha tuk mi le a herh tuk mi a si ko. Sihmahsehlaw, Martha bangin Jesuh he um ṭinak caan ṭha kan ngeih ding mi kha kan liam ter sual maw timi hi a si. Midang hna cu kan bawmh khawh ngai ko hna lai, thil ṭha phunphun zong kan tuah ko men lai. Sihmahsehlaw, rian kan ṭuan pah in Bawipa Jesuh he caan hman ṭi ding kha philh lo ding a herh. Zeicah tiah cun thil ti khawhnak hna a kan petu taktak cu Bawipa Pathian a si caah a si. 

Kan rian lak ah Pathian sin thlacam ding philh lo ding a herh. Pathian nih a kan theih dih taktak ko. A thluachuah in a kan thuam mi a kan umpi mi kan si. Amah sinah lawmhnak bia, thlacam ding le caan hman ding philh lo ding a herh. 

Thazaang petu /- Fr. Fidelis Maung Sein