Cardinal Parolin: Raltuknak vialte donghter dingah uknak leng tiang kal a hau i tlukruannak a dawntu vialte kha doh dih a herh
Gaza, Ukraine le Iran ah mipi nih harnak an tong. Kyiv nih mah le mah i runvennak nawl a ngei i daihnak lam ser khawhnak dingah cun minung pakhat cio i covo le sining man ngeihternak lei ah kir ṭhan a herh tiah Vatican Zung ah Secretary of State asi mi Cardinal Parolin nih a ti. October 4 ah Italian thawngzamhnak (la Repubblica) nih New York hrambunh UN General Assembly i a kalnak in a rak phanmi Cardinal Pietro Parolin (Holy See’s Secretary of State) sin ah biahalnak an tuah. Cardinal nih a chimmi cu, “vawleicung hmun tampi ah buainak le buainak le raldohnak donghternak ding ahcun hramhram in uknak le tlukruanlonak hna kha donghter a herh,” tiah a nolh ṭhan. Vawilei cung hmun tampi ah buainak a chuah tik ah zapi buainak tiang a phan. Cucu UN zung ah ngaihchia ngai in hmuh khawh asi. Sihmanhsehlaw, hi UN meeting tonpumhnak nih thil ṭha pakhat a chuahter i cucu UN i aa telmi ram vialte hna nih UN phunghram zulhphung (upadi) kha zulh awk hrimhrim a herh tiah atu le atu an aupi mi hi asi tiah Cardinal Parolin nih a hmuhton ning le a ruahnak a chim.
Pope Leo XIV nih (Magnifica humanitas) cauk ah a langhter bantukin, vawlei cung ram vialte ah, minung limhang le nuhrin covo kha ṭha tein kilvennak le zohkhenhnak a cohlangtu le a ṭuanchuaktu ramkhel hna le uktu hna caah cun hi thil hi a cang kho mi asi ko tiah fianternak a tuah. Pakhat le pakhat zumhawk tlaklo sinak hi harnak le buainak chuahnak hrampi an si i aa thleng lengmangmi thil sining he aa tlakmi kar hlannak lawng nih vawlei cung ram komh UN saduhthah le tinh ning in rian hma a kal kho lai tiah a chim chap. Iran in Gaza tiang, le Persian Gulf dirhmun kong ah Cardinal nih a lungretheihnak a langhter i, a bik in sualnak ngeilo mipi cungah a tlungmi intuarnak harnak cungah a ngaihchiatnak le a thinphannak a langhter.
Cu bantukin harnak le lungretheihnak lak ah, Latin Patriarchate tuahmi sianginn ah minung thongkhat hrawng cacawn khawhṭhannak an tuahmi cu khuaruahhar asi cucu Catholic Bupi nih mivialte sinah a pek duhmi ruahchannak hmelchunnak asi tiah a ti. Cupin ah, Ukraine ah khuasik caan a phan cang lai i mipi sin ah bawmhchanh pek awk a herhnak kong le ram ramkhat nih mah le mah i runvennak covo cu hlawt khawh asi lo tiah a chim. Cucaah Europe ramkomh hna nih caansau a nguhmi daihnak rianṭuan chuaknak dingah a thar in thazaang chuah le biakamnak he ṭuanṭi a herh tiah Cardinal Parolin nih a ti.