Bawipa nih Thil Ṭha duah Ding in a Auh mi Kan Si
Nihin caan zongah atu bantukin a biathiang in thazaang i lak ṭi ṭhan dingah caan ṭha, caan sunglawi a kan serpiaktu kan Pathian a minthiang ka thangṭhat. RVA a ngaitu, zumtu nan dihlak Bawipa nih thluachuahnak in pe ko hna seh.
Nihin Pathian bia kan relmi chungin, Gospel chungah kan Bawipa Jesuh Khrih nih Samaria miṭhapa kong cawnpiaknak a tuahmi kha kan theih i, cu chungah a tlangtar in chim ka duhmi cu zumtu vialte hi Bawipa nih thilṭha tuah dingah a kan auhmi kha kan si timi kha a si. Voikhat cu phungbia cawnpiaktu saya pakhat kha Jesuh sinah a ra i, “Bawipa, zungzal nunnak ka co khawhnak hnga zeidah kan tuah lai,” a ti. Jesuh nih a lehmi cu, “Nawlbia chungah zeitindah aa ṭial i, zeitindah na rel ning a si,” a ti. Mipa nih aa thawh i zeitindah a chim tiah cun, “Bawipa, na Pathian cu na lungthin dihlak, na nunnak dihlak, na thazaang dihlak in na dawt lai i, na innpa cu nangmah naa dawt bantukin na dawt lai,” ti kha a chim. Jesuh nih a timi cu, “Cucu va tuah law na nung lai,” a ti. “Innpa dawtnak cu zeidah a si,” tiah mipa nih cun a hal ṭhan i, Jesuh nih a chimmi cu, a lehmi cu hi tahchunhnak hi a chim. “Voikhat cu, mipa pakhat cu khual a tlawng i lampi ah damiah nih an taih,” a ti.
Tlangbawipa pakhat nih a hmuh i a hrial, a ti. Cun Levi mipa pakhat a sinah a va kal ṭhan i a hrial ṭhan. Cun a pathumnak pa cu Samaria pa a si, a ti. A va kal i a hmuh tikah a zaangfah i a bawmh, khual riahbuk ah a kalpi i ṭha tein zohkhenh dingah a chim tak,” a ti. Hihi a tawinak kan chim ahcun Jesuh nih mipa sinah a hal ṭhan i, “Mah hna pathum chungah hin aho hi dah a innpa a dawmi cu a si? a ti tikah hin mipa nih a lehmi cu, “Damiah nih an taihmi pa a zaangfahtu kha a si,” a ti. Hika zawnah zeidah kan hmuh kawh tiah cun, a pakhatnak ah a langmi cu Jesuh a si, a pahnihnak ah a langmi cu bia a haltu phungbia cawnpiaktu a si, a pathumnak i a langmi pa cu tlangbawipa a si. Cun a palinak i a langmi pa cu Levi mipa a si. Cun a panganak cu Samaria miṭhapa a si. Hi vialte panga lakah hin nihin caan ah kan Bawipa Jesuh Khrih nih a langhter khunmi pa cu Samaria miṭhapa hi a si.
Dawtnak kan timi cu mi vialte nih kan duh i, mi vialte nih kan herhmi a si. Asinain dawtnak hi mikip nih tuah khawh a si lo, dawtnak rian timi hi. Zeitindah dawtnak rian an ṭuan khawh kan ti ahcun, a pakhatnak i kan hmuh khawhmi cu Pathian dawtnak an theih hmasa. Pathian dawtnak thei hmasa loin midang dawt khawh a si lo. Pathian dawtnak kan theih hnu ah khan midang cungah zawnruahnak ngeih khawh a si. Cun Pathian dawtnak kan theih hnu lawngah khan midang zong kha cu Pathian dawtnak cu an theih khawhnak ding caah, an i fian khawhnak ding caah va chim khawh a si. Bia dangin kan chim ahcun kanmah le kanmah kan i thlen hmasat lo ahcun midang nun thlen khawh a si lo timi zong kha hmuh k hawh a si.
Hika zawnte ah zeiruang ah dah tlangbawipa le Levi mipa nih an hrialtak? Dawtnak an ngeih lo ruangah a si. Zeiruang ah dawtnak an ngeih lo? Atu kan chim bantukin Pathian dawtnak an theih lo ruangah a si ti kha kan hmuh khawhmi cu a si. Cun a pahnihnak ah zeidah a kan cawnpiak tiah cun Samaria miṭhapa, damah nih an ṭiahmi pa cungah dawtnak a langhtertu Sasmaria mipa hi kan zoh tikah Pathian zumtu zong a si lo. A cunglei i a hrialtu hna kha Pathian rianṭuantu, Pathian mi hna an si. Hika zawn ah zeidah a kan cawnpiak tiah cun, rianṭha ṭuan hi zumtu kan dihlak caah kan ṭuanvo pakhat a si timi kha a langhtermi cu a si. Pathian rian a ṭuanmi lawng nih dawtnak langhter ding a si lo. Mi vialte hi, zumtu vialte hi dawtnak rianṭuan dingah Bawipa nih a kan auhmi cu kan si timi kha a langhtermi cu a si.
Cun a pahnihnak a kan cawnpiakmi cu zeidah a si kan ti ahcun, a caan ahcun tuu hnuk lawng kha kan din tawn i a rawkmi, a pialmi, hma a pumi tuu kha kan hrial tawn i a hma kan men piak tawn lo timi kha kan hmuh khawh. Cucaah cun hika zawnte ah innpa dawtnak kan timi cu nifatin kan tonmi minung vialte hi kan innpa cu an si. Kan tonmi vialte cungah dawtnak langhter ding hi kan Bawipa nih a kan cawnpiakmi cu a si. Mi cungah dawtnak kan langhter khawhnak ding caah Pathian dawtnak kan theih a herh bantukin kanmah le kanmah kha kan i dawt hmasa a hau. Knamah le kanmah kan i dawt hmasa loin midang cungah dawtnak langhter khawh a si.
Kanmah le naihniammi kan innchungkhar ah dawtnak kan langhter lo ahcun midang cung zongah dawtnak langhter khawh a si lo. Kan chuahpi kan unau cungah dawtnak rian kan ṭuan lo ahcun midang cung zongah dawtnak rian ṭuan khawh a si lo. Nihin caah ah dawtmi u le nau vialte hna nihin thawngṭha nih a kan cawnpiakmi cu Pathian nih dawtnak rian ṭuan dingah a kan auhmi kan si, zungzal nunnak co ding lawng hi Bawipa nih a kan auhmi a si lo. Vawlei kan nun lio hrimhrim ah hin mithiang si dingin a kan auh i, dawtnak rian ṭuan dingah Bawipa nih a kan auhmi kan si timi kha chim ka duh.
Thazaang petu /- Saya Simon Hram Ling