Na Herh Taktak mi Na Kawl Cang Maw?

Bawi Khrih ah dawtmi u le nau hna; September 9 ni caah thlarau thazaang i laakṭhan hna usih! Kan Nu Bupi nih a kan timhpiakmi Bible Cathiang hna; 1Corin 7:25-31, Lk 6:20-26 chungin an si. 

Nihin kan Bible Cathiang hna nih a kan cawnpiak duhmi hna cu zeidah an si kan ti ahcun; hmailei caah a herh taktak mi, kan nunnak caah a herh taktak mi caah kawl thiam ding, nun thiam ding kong he pehtlai in a kan cawnpiakmi a si. 

1Corin chungah Paul nih zeitindah a ti; ‘Ka u le ka nau hna; ka chim duhmi cu hihi a si. Caan hi tampi a taang ti lo, zeicahtiah vawlei hi a tu bangin saupi a um ti lai lo’ tiah a ti. Caan saupi um ti lo, vawlei pi hi atu bantukin caan saupi a um ti lai lo e a ti. Dawtmi u le nau hna; kan nun lioah zeidah kan kawl a herh timi te kha nihin ni ah Paul nih a kan cawnpiak duhmi cu a si. Biatak cu zeidah a si? Biatak cu Jesuh Khrih kha a si. Zeicahtiah amah cu kan nunnak, zungzal nunnak kan thlarau khamhtu a si caah amah kha a si. Hi biatak chungah kannih nih kan nun ve ding kha Paul nih Korin cakuat chungin a kan cawnpiak duhmi cu a si. Cucu zeitindah kan nun lai? 

Jesuh Khrih vawlei ah a rat i a rak kan tlanh tikah nuamhnak, mah zalonnak, mah siaremnak, himnak phun in kan sinah a rat a si lo. Harnak a tongmi, khamh a haumi minung hna sinah khan a rak ra i, Jesuh Khrih cu minung ah a rak cang i minung kha a rak kan tlanh. A ministry-rianṭuan lioah mirum hna he lawng kalṭi mi a si lo, mifim mithiam hna he lawng a kalṭi mi a si lo, thil ti kho deuh tu hna he lawng a kalṭi mi a si lo. Zei an rel lomi, mizaw, mi chambau hna sinah khan Bawipa cu a kal i Pathian dawtnak kha a langhter. Vancung Pennak ahcun hitihin thil a si ding a si, hitihin a si lai e timi kha Jesuh Khrih hrimhrim nih Van in a rung ṭum i kan sinah a rung kan cawnpiak. 

Cucaah biatak cu zeidah a si-Jesuh Khrih a si. Caan saupi a um ti lo, hi vawlei zong atu bantukin caan saupi a um ti lai lo e tiah a ti. 

Jesuh Khrih nunzia kan i cawn ding kha Paul nih a kan cawnpiak duhmi cu a si. Vawlei cawnpiak ning le Jesuh cawnpiak ning kan zoh tikah phundang ngaimi a si. Hi vawlei ah taksa sining in nun kan i timh lioah ka renk caah maw, ka pawkhimnak caah maw, ka pawcawmnak caah maw, ka himnak caah maw, ka min thannak hnga ding caah maw tiah heeh tiah zuam a si lioah fahnak kan tonnak hnga lo ding caah, harnak kan tonnak hnga lo ding caah tiin harnak kaltaak in a nuamhnak, himnak, mah siaremnak kha kawl u tiah vawlei nih a cawnpiak lioah Jesuh Khrih nih khatikhan a si lo, vawlei nih a hlawtmi hna kha kal in va khamh ding, va cawnpiak ding, va hnemh ding, thazaang pek ding, bawmh ding le dawtnak langhter ding kha Jesuh nih a kan cawnpiakmi cu a si. 

Luke thawngṭhabia chungah; ‘Jesuh nih a zultu kha a zoh hna i, a thawh hna’ tiah a ti. A zoh hna i a thawh hna. Biapi ngaiin bia a chimh hna tiah kan ti khawh. 

‘Nannih sifak mi hna i lawm u; Pathian Pennak cu nanmah ta a si e tiah a ti. Nannih atu i rawl a ṭammi hna i lawm u; nan paw a khim lai a ti. Nannih atu i a ṭapmi hna i lawm u; nan ni lai tiah a ti. Mi Fapa ruangah mi nih an in huat hna i an in hlawt hna i an in serhsat hna i miṭhalo an in ti hna tika hi lawm ko u; cu ni ahcun i lawm ulaw a laam in laam u; zeicahtiah nan caah Vancung ah laksawng nganpi chiahpiak nan si’ tiah a ti. 

Vawlei thil hmuh ningin a si lo. Bawipa nih pakhat le pakhat i kilven ding, i zohkhenh ding, cun thazaang i pek ding kha a kan cawnpiak mi cu a si. Cucaah caan saupi a um ti lo tiah Paul nih a timi ahhin zeibantuk thil dah kan kawl a herh-Jesuh Khrih cawnpiak ning le Jesuh Khrih kha kan kawl a herh timi kha nihin kan Cathiang nih a langhter mi cu a si. 

Nihin ni ah Mithiang Peter Clever puai ni kha Bupi nih a kan tuahpiak. Amah hi 1581-1654 kar i a rak nungmi Mithiang a si. Amah hi Spain ram ah a rak chuakmi a si i, Jesuit bu chungtel Siangbawi missionary pakhat a rak si. Amah hi Cathagena timi Columbia ram ah mission rian a ṭuanmi a si. Cu hmun ahcun Africa miphun sal taangmi tampi an rak umnak, an chiah hna nak ahkhan mission rian a rak ṭuanmi a si. Amah hi mi thil tik ho, mifim, vawlei hmuh ning, tah ningin cun miṭhawng tiah timi a sinain kha nuamhnak, fimnak, zalonnak kha kaltaak in Bawipa cawnpiakmi biatak kha a kawl tikah mah sal hna he, anmah lakah cun mission rianṭuan in Pathian mithmai hmuh in anmah kha a rak zohkhenhtu, a rak cawmtu, thazaang a rak petu hna Mithiang a si. 

Nihin ni ah Mithiang mi hna lungthin a ngeimi pa zeizatdah kan um? Kan innpa chakthlang, rianṭuan ṭinak hmun ah Mithiang mi hna lungput minung pa zeizat nih dah kan ngeih? I chekhlat ṭhan hna usih. Vawlei nihcun harnak na tong sual lai, zaam a ti lioah Bawipa nih mah lak ahkhan va kal law, va khamh hna, rian va ṭuanpiak hna, Pathian dawtnak kha va langhter tiah a kan fial. Cucaah Jesuh Khrih nih a kan chimhmi cu zeitik hmanh ah a palh lai lo. Nannih harsatnak a tongmi, a sifakmi hna i lawm u; Pathian Pennak cu nanmah ta a si a ti. Pathian caah, Pathian Pennak caah temhnak, fahnak, ningzahnak kan inmi vialte cung ahhin Bawipa nih i lawm ko u; Vancung Pennak cu nanmah ta a si tiah a kan chimhmi bia hi a lak a si lo. A si taktak mi a si. 

Lunglawm tein Pathian rianṭuan hna usih, lunglawm tein Jesuh hnu zul hna usih, lunglawm tein Khrihfa kan sinak ah pakhat le pakhat i bawm hna usihlaw Jesuh Khrih muihmai kha pakhat le pakhat cungah langhter khawh i zuam hna usih, hmuh khawh i zuam hna usih. A ngaitu nan dihlak in Bawipa nih thluachuah in pe ko hna seh!  

Thazaang petu /- Fr. Fidelis Maung Sein