Pathian fialmi rianṭuan nak ah Harnak ton khawh a si 

Minung hi kan nunnak ah harsatnak le fahnak kan ton tik caan, ah chia ṭha tleidan thiamnak kan ngei deuh tawn. Hmailei nun ning cang he pehtlai zongin kan fim deuh tawn. Minung cu ahohmanh harnak a tong lomi kan um lo. Mah le hmunhma, sining cio in harnak te te hi kan tong cio, kan ngei cio tawn.

Khrihfa kan sinak zongah cuti ṭhiamṭhiam cun a si ve. A cheu cu harnak a tei cangmi an um bantukin a cheu cu a tong cuahmah mi zong an um. Cun a cheu cu a tong ding mi zong an um rih fawn. 

Nihin zarhpi (19)nak kan relmi thawngṭhabia kan zoh tik zongah zultu hna harnak an ton kan hmuh khawh. Jesuh nih ahmai in varal khat lei ah kal chung dingin a fial hna tikah, ti cungah thlichia hrannak in harnak an tong timi kan hmuh khawh. (Matthai 14:22) chungah: “Jesuh nih mizapi kha a tlunter hna lioah khan, a zultu kha lawng in rili khaṭelei kamah khan, a hmaiah a rak kalter hna” tiah a ti. 

Aho paoh hi varal khat lei ah a kal mi, khual a tlawngmi lawng te kan si. Khual kan tlawn, kan kal lio ah hin thlichia bantuk aa dang cio mi harnak hi kan ton hrimhrim ko hna lai. Zultu hna nih rili cung i an tonmi harnak in thazang i lak hna u sih. Harsatnak kan ton tikah hin fimnak kan ngeih deuh ding zong a herh. Zultu hna nih an tonmi harnak chungin Jesuh Pathian a si nak kha an cohlaan thiam. 

Jesuh cawnpiak mi le a fial mi rian kan ṭuan ruangah harnak kan tong hrimhrim khawh ko timi kha thieh ding a si. Pathian cawnpiak nak le a nawlbia kan zulh ruangah harnak kan tong ti lai lo tiah rauh ding a si lo. Zultu hna nih Jesuh chim bantuk tein an zulh ko. Sihmahsehlaw, ti cung an um lio ah harnak thlichia an tong taktak. Pathian rian kan ṭuan tik zongah harnak kan tong ko lai. Soisel nak zong kan tong ko lai. 

Kan nunnak lam a remhtu harnak zong a um kho. Profet Jonah nun ning kan zoh tik zongah Pathian nih a fial mi rianṭuan duh loin a zam tikah Bawipa Pathian nih thihnak tiang phanhter in a cawnpiak lo. Harnak, muihnak chungin Bawipa a hngalh khawh ṭhan dingin a cawnpiak. Kan nunnak ah kan tonmi harnak hi ruah ṭhan in Bawipa nih zei dah a kan duh piak mi a si hnga tiin ruah thiam ding a si.

Cun Bawipa bia le cawnpiak nak, a nawlbia kan zulh ruangah harnak kan ton tik zongah Bawipa nih a hnu zul ṭha, a tlingmi Khrihfa si ter a kan duh piak caah a si timi zong cohlaan thiam ding a si. Kan ṭhacho nak hnga ding caah Bawipa nih harnak tete in a kan cawnpiak khawh tawn. Harnak ton hnu lawngah Jesuh kha “Ka Bawipa le ka Pathian a si” timi cohlaan thiamnak thinlung a um tawn. Ahohmanh nih a kan tuahpiak khawh lomi Bawipa sin lawngin teinak a um kho timi fimnak a kan ngeih ter khawh tawn. 

Zultu hna zong Bawipa nih a kawh hna i nifatin kum thum chung a cawnpiak ko hna. Duhsah in Pathian a si nak kha a cawnpiak hna. Rili cungah harnak an ton lio ah ṭihphan nak in an khat ko hna. Sihmanhsehlaw zultu hna nih Bawipa kan khamh ko tiah an ti i Bawipa nih thilchia le rili kha a daihter tik hnu lawngah “Nangmah cu Pathian Fapa na si hrimhrim”(Matt 14:33) tiah an ti khawh.

Dawtmi u le nau hna, harnak kan ton tikah Bawipa sinah bawmhnak hal ding, thlacam ding philh lo ding a si kha thei zungzal ko u sih. Harsatnak kan tonmi chungin Bawipa nih a kan khamh khawh taktak ko timi zong zum ko hna u sih. 

Thazang petu /- Fr. Fidelis Maung Sein