“BAWIPA” TIMI SULLAM FIANTERNAK
Biakam Hlun kha Greek holh in an vun leh tikah Pathian nih Moses sinah a phuanmi Hebre min ‘YHWH’ (YAHWEH) kha BAWIPA (KYRIOS) tiah an rak hman. Cu caan thawk cun Bawipa timi cu Israel Pathian min ah a rak cang. Biakamnak Thar ah “Bawipa” cu Pathian le Fapa Jesuh min ah an rak hman. (ICor. 2:8).
Jesuh nih mah kha Farasi mi hna he bia an i alnak, (Ps. 110) a sullam kha khuh nawn in amah kha aa sawh ter. Sihmanhsehlaw a zultu hna sinah cun fiang tein a chim. (Mt. 22:41-46, Lam. 2:34-36, Heb. 1:13, Jn. 13:13). Phung a chim lioah Pathian, Uktu, a sinak kha thilnung, zawtfah, khuachia, thihnak le sualnak hna cung rian a ṭuannak khan a hmuhsak.
Thawngṭhabia chungah atu le atu Jesuh kha “Bawipa” tiah an ti. Mah min hi amah kha bawmhnak hal awk le damnak duh ah a rak fuhmi hna nih upatnak le bochannak in an hmanmi a si. (Mt. 8:2, 14:30, 15:22). Thiang Thlarau fawrhnak in “Bawipa” a timi hna caah cun Jesuh Khrih, Pathian a sinak biathuk an hngalhnak kha a si. (Lk. 1:43, 2:11). A thoṭhan mi Jesuh he tonnak ahcun “Ka Bawipa le ka Pathian” ti a si. “Bawipa a si” timi biafang hi Khrihfa mi zumhnak le dawtnak phung ah a rak tang. (Jn. 20:28, 21:7).
Jesuh kha Pathian min “Bawipa” tiah vun auhnak in hmasa Khrihfa mi zumhnak phuannak ah Pathian he lawng aa tlakmi zumhnak, ṭhawnnak, upatnak le thangṭhatnak vialte cu Jesuh he zong aa tlak ko, ti kha a fehter. Zeicahtiah amah cu Pathian mui a si. (Lam. 2:34-36, Rom. 9:5, Tit. 2:13, Biat. 5:13, Phil. 2:6). Pathian nih Jesuh kha thihnak in a thawhternak le sunparnak ah a hlawrhnak in “Bawi” a si kha a langhter. (Rom. 10:9, ICor. 12:3, Phil. 2:9-11).
Khrihfa tuanbia a hramthawk in Khrih cu vawlei le tuanbia cungah nawlngeitu a si ti tikah minung cu vawlei nawlngeihnak tanga hi dawr dih awk a si lo, Pa Pathian le Bawipa Jesuh Khrih tang lawngah i dawr awk a si tin theihthiam a si. Ceaser cu Bawi a si lo. Messiah lawng Bawi a si, an ti. (Biat. 11:15, Mk. 12:17, Lam. 5:29). Bupi nih minung tuanbia a tawhfung, a lai muru le a tinhnak cu Bawipa Khrih cung lawngah a hmuh khawh tiah a zumh.
Khrih thlacamnak cu “Bawipa” min auhnak nih a danter ngaingai. Hramthawhnak ah “Nan sinah Bawipa um ko seh” ti a si i, a donghnak ah “Kan Bawipa Khrih min in” ti a si. Asiloah zumhnak le ruahchannak he (Maranatha) “Kan Bawipa, ra ko cang” a ti. Asiloah (Maranatha) “Ra tuah, Bawipa” Amen. “Ra tuah, Bawipa Jesuh” a ti. (ICor. 16:22, Biat. 22:20).