Digital Communication nih biatak le minung limhang upatnak rian a ṭuan awk asi

Catholic Bupi chungin digital pehtlaihnak lei rianṭuanmi hna sinah biatak kawlnak (truth), minung limhang upatnak, daihnak caah le Pathian sermi thil vialte kha zohkhenh kilvenak he rianṭuan awk ah Pope nih bia a cah hna. Cu cakuat cu Pope ai-awh in Cardinal Pietro Parolin nih min a thut i Rwanda ram Kigali khua ah tuahmi Signis World conference ah an kuat. Digital communication (pehtlainak) rianṭuantu hna tonpumhnak he pehtlai in, hi digital pehtlaihnak thilri le thiamnak hna nih minung caah ṭhanchonak a chuahpitu le thazaang petu asi lai aa ruahchannak kong a langhter. Digital kan chan i kan umtuning kan zoh tik ah, internet le digital thiamsang rianṭuannak nih kan lungput, kan nunphung le kan sining vialte kha a uk dih cang.

 Pope nih cauk a chuahmi “Magnifica Humanitas,”  i aa telmi chung kha chirhchan in online in kan i pehtlaihmi hi thawngpang i peknak le i chawnhbiaknak lawng si loin minung nih vawlei hi zeibantuk in kan hmuh i, kan ziaza le kan nunphung zong online nih a sersiam dih. Rualrem tein nunṭi, khuasak a thiammi nunphung ser awk le Pawngkam ṭhatnak le kilven zohkhenhnak caah Digital Communication cu ṭha tein ṭuanchuak ding in Pope nih forfialnak le thazaang peknak a ngeih hna. Pathian sermi thil vialte cungah rualremnak le daihnak in zohkhenh kilvennak nih Khrih thawngṭha nih an kan pekmi daihnak nunphung ah a kan hruai lai tiah thazaang a pek hna. Conference ah a ra mi  vialte hna cu Bupi i nu, Bawinu Mary i thlacam piaknak ah a ap hna i an rianṭuannak ah theipar ṭha an tlai khawhnak hnga thla kan cam piak hna tiah a ti. Bawipa nih fimnak le ṭhawnnak in pe ko hna seh tiah thluachuah peknak in a donghter.