Khrih nih rawlṭaammi hna kha an paw a khimter

Khrih nih changreu le nga a karhter i minung tampi rawl a danghnak biathuk kha kan ruahṭhan tik ah Bawipe Jesuh he aa tongmi cu thlarau thazaang an hmuhnak kong Pope nih mipi sin ah thazaang peknak a ngeih hna. Khrih nih rawlṭaammi hna kha an paw a khimter hna tiah Zarhpini i Angelus thlacamnak ah Pope nih mipi sin ah cawnpiaknak le tha peknak a tuah. Changreu le nga in minung a thong in rawl a dangtu Khrih cu sifak miharsa hna kan herh ning in a kan zohkhenhtu le a vel laksawng in a kan cawmhlawmtu a si tiah ati. Bawipa nih mizapi kha a zaang an fak i zeibantuk in minung thong nga renglo kha rawl a danghnak kong a chimh hna.

 Bawipa nih hi vawlei ah a dawtnak le a zaangfahnak he khamhnak a kan pek i mitcaw kha khua a hmuhter hna i kan caah khuaruahhar thil lianngan kha a kan tuah piak. Cu lawng si loin vancung ram a nai cang tiah thawngṭha a kan thanh. Bawipa nih kan paw a kan khimter pinah kan herhmi nak tam deuh in a kan pek. Minung hna nih kan herhmi pek awk le kan rawlṭaamnak in kan paw khimter awk ah Bawipa nih a rian a tlawlh bal lo. Vawlei thilri ah kan ri i ti haal rawlṭaam i kan ummi hmanh kan theih ti lo mi hi thlarau lei zawtnak asi tiah Pope nih a ti. Lungthin puarthaunak he a khat mi le a rocar mi kan thinlung ral hi do hna usih! Bawipa Jesuh nih van kha a zoh i changreu kha a cheu i mizapi a peknak hna kong kha ruat ṭhan usih.