Vawlei Ṭha Ah A Tlami Thlaici  Kan Si Maw?

Nihin ni i Khrihfa Bupi nih a kan timhpiakmi (Jer. 3:14-17, Mt. 13:18-23) tiang hi an si. Cucaah hi bianabia sullam hi ngai tuah u, “Lamkam i a tlami thlaici cu vancung pennak kong kha a theih cu a theih i a sullam a hngal ṭung lomi kha an si. An chung i tuhmi thlaici cu miṭhalo pa nih khan a chuah dih. Lung tamnak hmun i a tlami thlaici cu vancung pennak kha a theih cangka in lungtho ngaiin a cohlangmi kha an si, sihmanhsehlaw an chungah hram a thlak lo caah saupi an rau lo. Cu kong hi harnak le hremnak a hun ton tikah an i ngol zau.Hling lak i a tlami thlaici cu vancung pennak kong kha a theih cu a theih i, sihmanhsehlaw vawlei cung tintuknak kong i lungretheihnak le chaw le va duhnak nih cu bia cu a thah i thei a tlai lomi hna kha an si. Cun vawlei ṭhatnak hmun i a tlami thlaici cu vancung pennak kong kha a theih i a sullam zong a hngalmi kha an si. Thei kha an tlai i a cheu cu a let (100) in, a cheu cu a let (60) in, a cheu cu a let (30) in an karh” tiah a ti. 

Duhdawtmi u le nau, nu le pa hna “Lamhril i a tlami thlaici cu Pathian bia kha a sullam a hngal lo. Satan pa nih a chuh dih e” tiah a ti. Pathian bia kan pemh lo nakhnga ding caah, Pathian bia kan hngalh khawh lo nakhnga ding caah, Pathian bia kan duh khawh lo nakhnga ding caah hnahnawhnak a petu pa hi ‘Satan’ a si peng. Khamhnak thawngṭha an theih lai i, khamhnak an co sual lai, tiah a phang pengtu hi kan ralpa Satan pa a si peng. A pahnihnak ah lungtamnak ah a tlami thlaici cu lungtho ngaiin Pathian bia cu a cohlan nain a hram a thuh lo caah ni nih a vun linh i a car zau e, tiah a ti. A zumhnak he pehtlai in harnak a ton tikah (asiloah) hremnak a ton tikah a zumhnak kha a hlawt tawn e, tiah a ti. 

Asiahcun duhdawtmi u le nau, nu le pa hna nihin ni ah kan khua le kan ram ah um kho cio loin kaa zakip ah ralzam dirhmun in kan dir maw? Bawipa bia le Pathian bia an thahnak hnga ding caah harsatnak na tong maw? na dirhmun a herh lai ti cu a fiang, sihmanhsehlaw lungtamnak hmun i a tlami thlaici bantuk men in si ding kha kan Bawipa Jesuh nih a duh hrimhrim lo. Na zumhnak kha na nunnak dongh tiangin na dirpi ding kha amah he i pehtlai in, amah sinah kun in nanmah lawng si lo. Na chungkhar in cucu zumhnak nun in nun ding kha kan Bawipa Jesuh Khrih nih a kan duh sak. 

Hling lak i a tlami thlaici cu a kheu cu a kheu natein hling nih a zelh caah a theih ṭha a tlai kho bal lo, tiah a ti. A chimduhnak cu vawlei cung khuasak tintuknak le lungretheihnak le chawva duhtuk ruangah cu a theihmi Pathian bia cu a chungah a nung lo e, ti kha a chimduhnak a si. Vawlei khuasak tintuknak ruangah, rum duhtuknak ruangah na tiktu caan, na ruahnak, na thazaang vialte vawlei thisa na hnim, phum dih maw? Hawi dang hna chungkhar in Bawipa thangṭhatnak lei i an kal lioah nang na bau maw? na chungkhar an bau maw? Pathian thangṭhat kho lo tiangin hmanh loin vawlei sui ngun chawva na kawl maw? 

Duhdawtmi u le nau, nu le pa hna cu bantuk si ding kha Bawipa nih a kan duhsak lo. Vawlei thil mithmuh khawhmi zeizong vialte hi zungzal a hmun lo, kan i kalpi kho lo dingmi thil a si ti kha kan i fian a herh. 

A palinak ah vawlei ṭhatnak i a tlami thlaici cu Pathian bia a sullam zong kha an hngalh i theih an tlai i a cheukhat cu let (100), a cheukhat cu let (60), a cheukhat cu let (30) in an karh, tiah a ti. Duhdawtmi u le nau, nu le pa hna hihi kan Bawipa Jesuh Khrih nih a duhmi a si i an thei kha a let (100) le (60) le (30) in a karh tiah a chim duhnak cu zeidah a si kan ti ahcun (Tim. 3:13) ah, “rianṭha a ṭuanmi Khrihfa upa hna cu hmaizahnak an hmuh i Khrih Jesuh an zumhnak kong kha ralṭha ngaiin an chim ngam. 

An theihmi bia kha an mah ca lawngah chia loin Khrih thawngṭha kha ralṭha tak in an chim ngam” tiah a ti. (Lam. 26:18) chungah, “Nanmah nih an mit kha nan dei ter hna lai i, muihnak in ceunak ah, Satan pennak in Pathian pennak chungah nan nun ter hna lai” tiah a ti. Duhdawtmi nu le pa hna kan Bawipa Jesuh Khrih nih a kan fialmi cu cuu a si i, cu bantuk dirhmun i a dirmi hna cu vawlei ṭhatnak i a tlami thlaici kha an si. An zumhnak kha mi nih an rak ei cio i, an zumhnak le Khrih dawtnak kha mi sinah ralṭha tak in an phuan i Lamkaltu hna siseh, a chanchan in kan Khrihfa Bupi tuanbia chungah kan hmuh khawhmi hna cu Khrih thawngṭha kha an phuan i mi vialte khamhnak co hna seh ti a duhtu Pa Pathian lung an tlinh. 

Duhdawtmi u le nau, nu le pa hna ralzam dirhmun in a dirmi maw? ral kan zammi hi thil ṭha lo kan ti ko natein a chia dih lo ti kha kan theih a herh. Ral kan zamnak, kan phaknak hmun le hma kipah hin zumhnak fakin dir in vawlei ṭhatnak i a tlami thlaici bantukin kan zumhnak kha phawtzamh in, Pathian dawtnak kha mi va hngalhter ding kha Missionary ṭuannak caan ṭha Bawipa nih a kan pek ti kha thilṭha leiin hmuh khawh le cuanh khawh i zuam hna usih. Khrihfa Bupi hrem a rak si lioah khan a kaa zakip ah an kal cio hna i ralzam in an tli cio hna, sihmanhsehlaw zumtu ṭha hna cu an phaknak hmunhma ah Missionary an tuah (Pathian thawngṭha) an phuan caah da kaw nihin ni ah kan Kawl rampi ah hin, kan hmun kan hma cio ah hin cu Khrih thawngṭha cu a rak phan i Khrih kan zumhnak cu a si. 

Duhdawtmi u le nau, nu le pa hna ral kan zammi hi a chia dih lo. A hman zia kan thiam a si ahcun vawlei ṭhatnak i a tlami thlaici bantukin na zumhnak (Khrih dawtnak na hngalhmi) vialte kha mi caah na phuan i mi nih khamhnak an hmuh a si ahcun vancung ah na laksawng a ngan ti kha zumhnak in na rak theih thiam nakhnga forhfial kan duh hna. Cucaah cun lamhril i a tlami thlaici kan Bawipa Jesuh Khrih nih a duhmi a si lo. Lung tamnak i a tlami zong a duhmi a si lo. Hling lak i a tlami thlaici zong kan Bawpa Jesuh Khrih nih a duhmi a si lo i, vawlei ṭhatnak i a tlakmi thlaici kan si awk kha a si. Kan phaknak hmunkip cio ah kan chung i a tlami Pathian bia cu phawtzamh khawh i zuam cio hna usih. Nan dihlak cungah Pathian nih thluachuah in pe ko hna seh. Amen

Thazang petu /- Saya Canute Bawi Kam