Mithiang Peter le Paul puaini ah Archbishhop thar hna kha tuukhal ṭha si awk ah Pope nih a sawm hna
Rome khua a zohkhnehtu Mithiang pahnih asimi Peter le Paul hna cu tlamtlinlonak tampi rak ngei ve ko hna hmanhsehlaw cu an tlinlonak kha Thawngṭha phuannak le Bawipa caah tehte khaantu an sinak kha thazaang ah i lak dingin Pope nih zumtu hna kha avsawm hna. Cun an pallium a hmumi Metropolitan Archbishop thar hna zong Bawipa i zohchunh awk le an sinah chiahmi zumtu hna caah Tukhal Ṭha si awkah a sawm hna. Mithiang Peter le Paul hna nunning i zoh in, kanmah hna zong nih zeibantukin dah lungrualnak le siannak he dawtnak rian kan ṭuan khawh lai tiah i zohchunh ding kan si tiah St.Peter le Paul puaini Missa raithawinak ah a chim. Missa raithawinak tuah lio ah Archbishop thar hna caah pallium thluachua peknak a tuah. Pallium cu Archbishop hna nih an i hrukmi tuuhmul in tahmi puanthaan asi.
Mithiang Peter le Paul cu Catholic Bupi caah sutung (pilar) pahnih an si. Peter cu Jesuh nih a tuurun zohkhenhtu ah a thim, Paul cu Jentail mi hna caah Lamkaltu ah a thim ti kha ruahṭhan in hi suttungpi pahnih cu Bupi nih a upat hna tiah a chim chap.
Pope Leo nih Mithiang Peter zuk lei ah a hun i mer i, “a hmasa bik (Pope Peter) nih ṭhencheunak le lung i ruallonak caan hmanh ah khan lungrualnak le hawikomhnak a rak ser tiah a hngalhter. Peter zong a tlamtling dih ve lo, Bawipa Jesuh an tlaih zan ah a Bawipa kha a hlawt bal. A hnu ah aa ngaichih i mitthli tla in a ṭap. Paul zong nih Peter cu a tuahsernak cheukhat aa kalh ruangah a mawhchiat bal ve. Asinain Peter nih a palhnak a cohlan i lungdonglo tein Thawngṭha a phuan. Khrih tuurun kha a pumh, Khrih le a Bupi caah a lu tiang hmanh a hloh. Hika Rome ah a tuar, kan i pumhnak hmun he aa hlat lo. Bawipa nih a pekmi rian kha a cohlan, Khrih tuurun hna an aw kha a ngaih, thazaang a peknak hna i lam a hruai hna
Peter nunzia i zohchunh in Khrihfa hna cu lungrualnak sertu si awkah a sawm hna i, Pathian kha an nunnak ah a biapi bik ah chiah in kan unau hna he naihniam tein um awk le an sining le an herhmi kha biapi ah chiah i pakhat le pakhat dawtnak he nun ṭi awk ah a forh hna.