Dawtnak lungthin in Pathian rianṭuan ding a si
Khrih ah dawtmi u le nau hna, July nikhat kan phanṭhan cang hna. July 1, cacawn nithum ni caah Bupi nih a kan timhpiak mi Bible Cathiang hna cu; Amos 5:14-15,21-24, Salm 49, Matt 8:28-34 hna chung hin an si. Amos 5:14 kha ka vun rel lai; ‘Nan nunnak hnga, chiatnak si loin ṭhatnak tu kha kawl u; cuti a si ahcun kanmah leiah a um nan ti bangin Bawipa, ralkapbu Pathian cu nan sinah fek tein a um lai’. Amos nih ṭhatnak kawl ding le dinnak kawl dingin nihin kan relmi kan Bible Cathiang chungin a cawnpiaknak kha kan hmuh.
Nihin ni ah Khrihfa a simi kannih vialte hna kan i pumhnak ah, thla kan camnak ah, cun pakhat le pakhat kan i ton i Pathian kan thangṭhatnak hmun kan Biakinn pipi hna, dawh taktak in an si kho men. Cun hla kan sakmi te hna, a sullam a bia, dawh ngaiin tuah mi an si men lai. Kan tuahsernak, Pathian kan biak ningcang, tuahser ning kan program te hna, dawh ngai le tling ngaiin a si men lai. Sihmanhsehlaw, hi kan tuahsernak, biaknak, Pathian kan biaknak ah kan ngeih hnga dingmi, Bawipa Pathian nih a kan duhpiak mi, dawtnak kan ngeih lo a si ahcun, dinnak thinlung kan ngeih lo a si ahcun, cun, mah le mah kan i tlak lo timi Pathian hmai ah i tlak lonak lungthin, tangdornak lungthin kan ngeih lo a si ahcun kan tuahmi, kan sakmi, kan relmi, kan sakmi inn pipi hna zong hi pakpalawng menmen an si ko lai.
Gospel thawngṭha chungah kan Bawipa Jesuh Khrih khual a tlawng i, khuavang nih a tuahmi pahnih, khua pakhat i a ummi hna a damter hna timi kha kan hmuh. Nihin kan relmi thawngṭhabia a si. Mipa pahnih, mah mi hna, khuavang nih a tuah mi hna cu damnak an hmuhṭhan tikah khuami hna nih zeitindah an ti; Bawipa cungah kan i lawm tiah ti loin anmah i an (စီးပွားရေး), an pawcawmnak lawng kha an zoh tikah kan Bawipa Jesuh Khrih kha kan khua in kan chuahtak ko an ti. Jesuh Khrih nih minung a kan dawt i, harsatnak a tong cuahmah mi, minung pakhat dirhmun in a dir ti lomi khuavang nih a tuahmi hna pahnih hi minung sining te, (သိက္ခာ) te kha kan Bawipa Jesuh Khrih nih a thar in a pekṭhan hna, a damter hna tikah mah pawcawmnak lawng, mah zawn lawng a ruatmi khuami hna nih kan Bawipa Jesuh Khrih kha kan khua in kan chuahtak ko, kal ko, tiah a ti. Zeicaah; mipa pahnih i, mi hna pahih chungin khuavang kha a chuahter i, an saṭil, an vok chungah luhnak nawl a pek tik hna ah, an vok, an ngeihmi hna cu tiva chungah an i paih i an thi. Khakha mah khuami hna nih (နှမျော) nak an ngeih deuh.
Minung pakhat le pakhat cungah ngeih dingmi, zawnruah dingmi, dawtnak kan ngeih dingmi kha philh in mah ca lawngah khua an ruah tikah Pathian fa sinak kha an hmuh lo tikah Bawipa nih a kaltak hna. Cuasicaah, kan biaknak, kan phunglam, kan tuahsernak hna hi zeitluk hmanh in va i dawh ko hmanhsehlaw, Pathian sermi minung pakhat le pakhat cungah dawtnak lungthin kan ngeih khawh lo, zawnruah piak thiamnak lungthin kan ngeih khawh lo, zaangfahnak lungthin kan ngeih khawh lo, bawmh duhnak lungthin kan ngeih lo a si ahcun Khrihfa kan sinak ahhin bia hal ding tete a um.
Khrihfa, Jesuh hnuzul taktak ka si maw? timi te hi i ruat cio hna usih. India ram i, Calcutta tiin hrambunh in Pathian mission, Pathian rian a ṭuantu Mother Theresa nunzia te kha kan zoh tikah, amah miphun a si lomi, Mother Theresa nih amah a zumhmi biaknak aa lo lomi mi hna sinah khan va kal in, Bawipa thawngṭha kha a va nunpi tikah, mikip nih an dawt i an cohlan, thangṭhat a si. Nihin ah Bupi nih Mithiang pakhat sinak dirhmun in thangṭhatnak a pek, (တံဆိပ်) title lianpi a pek. Cu a si caah, hi a nunzia te cu zeidah a si? Minu, mipa pakhat kha Pathian sining, serning tein amah (သိက္ခာ) ning tein a cawm, a zohkhenh tikah mi hna nih upatmi, dawtmi, minu, Sister nu pakhat a si kha kan hmuh. Amah nih zeitindah a rak ti ti a si ahcun; minung zakhat kha rawl na dangh khawh lo hna hmanh ah, mi pakhatte kha rawl dangh khawh i zuam tiah a ti. Nihin ni ah mi vialte sinah ṭhatnak kan tuah khawh len lo hmanh ah, kan pawng i a ummi tete hna, kanmah bawmh a herhmi tete hna cungah khan ṭhatnak kan tuahmi tete hna kha a biapi ngaingai mi a si.
Cuasi caah, nihin Bupi nih a kan timhpiakmi kan Cathiang hna chungin thazaang hrawmhṭi kan duh mi hna cu pakhat le pakhat cungah, dawtnak lungthin, bawmh duhnak lungthin ngeih kha a herh zungzal ko e timi kha a kan cawnpiak. Cucu Khrihfa hna i kanmah identity (သိက္ခာ) a si. Jesuh Khrih nih a kan pekmi, amah muisam in (တံဆိပ်) a kan khenhmi, a hnuzul tu hna i kan ngeih dingmi (ပုံစံ), (နမူနာ), muisam te kha a si timi te kha nihin ni ah hrawmh kan duhmi hna a si. Nan dihlak in nihin ni ah Bawipa nih thluachuah in pe ko hna seh.
Thazang petu /- Fr. Fidelis Maung Sein