Monday Reflection (Ordinary Time)
January 13, 2025 caah ruahnak cheuhnak caah biahalnak
1. Roman Catholic Liturgical calendar ah Christmas caan in Ordinary Time ah kan i ṭhial cang. A taktak tiah cun caan sawhsawh taktak a um lo.
Khrihfabu calendar chung i caan sawhsawh nih ahmaan mi thil sining ruahṭhannak caanṭha a kan pek. Khrihfa nunnak nih nifatin nunnak ah Bawipa he ton awkah a kan auh.
A rianṭuannak hmuh khawhnak mit, a aw theih khawhnak hna le a velngeihnak laksawng cohlan khawhnak lungthin a ngeimi hna caah cun, caan sawhsawh cu khuaruahhar thil ah a cang kho.
Khrihfa timi min aa putmi vialte cu Amah ah pehzulh tein thlennak tuah awkah auh an si. Nunnak thianhlimnak ah kawh kan si dih. Zaangfahnak he rianṭuan ṭiding le kan chungah a umnak le kanmah thawngin a rianṭuannak a pehzulhtu Bawipa sinah kan nunnak dihlak pek dingin sawm kan si. Hihi kan zum maw? Cu zumhnak cu kanmah le kan caan hmanning ah hmuhkhawh a si maw?
2. Ordinary Time kan thawk tikah, Khrihfabu hmasa lio i Khrih zumtu Judah mi hna sinah abikin ṭialmi cawnpiaknak Hebru cakuat in hram kan thawk.
Hi hramthawknak nih cakuat cu a konglam ah a chiah i a hramthawknak phunkhat a pek. Hi cakuat a tialtu nih Jesuh Khrih a cawisannak kong a fianter. Amah cu Israel Profet vialte nih an rak langhtermi a si. Amah cu Hebru Cathiang, Biakam Hlun chung i biakamnak vialte a tlintertu a si.
Hi Judah zumtu hna, le a ngaingai ti ahcun zumtu vialte hna cu, hi cakuat chungah hin Pathian nih Profet hna a thlahnak le Israel a thimnak ah a thuk deuhmi tinhmi kong kha cawnpiak an si. Jesuh cu minung phun dihlak caah Pathian khamhnak phuannak tlamtling a si. A ngaingai ti ahcun, sermi thil vialte caah! Amah cu a tlingmi le lonh khawh lomi Pa i Bia a si.
St. John of the Cross nih a tial bantukin: “A Fapa, a Bia pakhat lawnglawng a kan pek tikah (zeicahtiah a dang pakhat hmanh a ngei lo), hi Bia pakhat lawnglawng ah hin zeizong vialte kha voikhat ah a kan chimh – cun a dang chimding a ngei ti lo. . . zeicahtiah ahlan i profet hna sinah a cheuchum in a rak chimmi kha, atu cu a Fapa a simi vialte kha a kan peknak thawngin voikhat ah a chim dih cang.” Biaphuan dang a herh tilo. Jesuh Khrih nih Pathian cu ahodah a si i, amah cu kan Khamhtu ah kan cohlan i velngeihnak nunnak ah Amah hnu zulh kan i thim tikah ahodah kan si khawh lai timi a tlingmi kha a langhter.
Hihi kan zum maw? Khrihfa kan si timi sullam taktak cu kan ruat cang maw? Hi vialte hi nifatin kan zumhnak kan nunpi ning ah a lang maw? Jesuh Khrih cu kan Nunnak i Bawi a si maw?
3. Mark Thawngtha chungah, Jesuh nih mipi hmai ah a rianṭuannak thawngin Pennak thawknak kong Thawngthabia kha a kan theihter.
Cun, nihin ah Simon le Andrew auhnak kong kan theih.
Hi pahnih hna nih hin, “Ra law ka zul” timi bia an theih tikah an sur, an rian le an pa kha an hlawt i Amah kha an zulh (Mk 1: 14-20). Annih cu Bawipa bia a theimi nga tlaitu sawhsawh an si. Cu aw cu, an theih tikah an dir lo. Zultu sinak hrampi ah a ummi risk (ngamhnak) kha an lak. An sur, an hnangamnak le himnak hmun kha an kaltak i zumhnak khualtlawnnak ah an zulh.