Reflection for December 28

Innchungkhar Puaini (Feastday of The Holy Family)

1. Hlanlio piin Khrihfa chungkhar cu innchungkhar Khrihfabu tiah a dikthliar in auh a si. Khrihfa chungkhar chung kan nunnak ah Jesuh Khrih cu a um taktak. Sihmanhsehlaw, a rianṭuannak hmuh khawhnak ding caah mit, a cawnpiaknak theih khawhnak ding caah hna le a umnak ding hmun ser khawhnak ding caah thinlung hna kan herh. Pope Paul VI nih Nazareth Sianginn tiah a timi kan chungkhar ah min cazin peknakin mah zawnruahnak dawtnak lam kha kan cawn khawh.

Jesuh nih vawleicung i a kum 33 chungah kum 30 cu Nazareth khua ah a hman. Thlarau kong ṭialtu cheukhat nih mah kum hna kha a thupmi kum hna tiah an auh hna, zeicahtiah Thawngṭha cauk chung i an kong ṭialmi a tlawmtuk caah a si. Sihmanhsehlaw, mi sawhsawh i nunnak thianghlimnak kha an langhter i Khrih chungah tipil a ingmi hna caah zeitindah khuaruahhar a si ti kha an kan hmuhsak.

Kan lak i a caan caantawite paoh ah Jesuh nih vawlei kha a khamh, a tlanh i a serṭhan. A hrinnak in, a khamhnak nunnak, thihnak le thawhṭhannak chung vialteah, cathiang nih Adam Thar tiah a timi nih thil vialte kha a thar in a ser.

Pathian sawmnak lehrulhnak lam pakhat in upatnak le cohlannak an hmuh tikah, a chuakmi chungkhar pehtlaihnak nih khuaruahhar velngeihnak caah hmun a pek. Chungkhar cu thianhlimnak auhnak ah zeitindah kan hngalh?

2. Bawipa chungah tipil kan ing i atu cu a thothanmi a pum chungah member bantukin kan nung cang. Khrihfabu cu Khrih chung i hawikomhnak, pehtlaihnak a si. Khrihfa chungkhar cu, cu Khrih Pum chung i ahmebik cell (thahri) a si. A kauhmi Khrihfabu cu chungkhar chungkhar a si.

Hi hngalhthiamnak cu Pathian ṭihzahnak nakin a tam deuh – a fekmi Khrihfabu kong le a fekmi minung sining kong a si. A taktak a si. Chungkhar nunnak cu Khrihfa tamdeuh caah lam a pah tawnnak hmun a si. Hika ahhin thianhlimnak caah vawleicung pumpi auhnak, minung sinak le mi sawhsawh sinak vialte ah, a chuah hmasa biknak hmun a si. Hika ahhin zultu sinak lam kan cawn.

Chungkhar cu Khrihfa nunnak ah thanchonak, thianhlimnak lam nih a hrampi a hmuh khawhnak hmun a si. Zaangfahnak lehrulh ding kan i thim zongah – cun hmuh khawhnak mit, theih khawhnak hna, le nifatin thil sining tangah dawtnak cawn awkah a thupmi sawmnak cohlan awkah lungthin kan ṭhanchoter zongah – minung zalonnak biathli ah aa khumh dih. Kan thimnak nih kan pawngkam vawlei lawng a hnorsuan lo, kan si dingmi minung ah a kan ser.

Mithiang Paul nih Khrihfa hmasa hna sinah hitin ca a ṭial: “U le nau hna, Pathian nih a thimmi hna, a thiangmi le a dawtmi nan si bantukin, zaangfahnak, toidornak, nemnak le lungsaunak kha i hruk u law intuar khawhnak kha i hruk u. Pakhat le pakhat i ngaithiam u law, pakhat le pakhat lungfahnak nan ngeih ahcun; Bawipa nih an ngaihthiam hna bantukin nannih zong nih nan tuah ve awk a si. Cun hi thil vialte cungah hin dawtnak kha i hruk u, cucu tlamtling tein a funtomtu kha a si,” (Kol. 3).

Thlacamnak le tuahsernak sianginn hmasabik, hi nunning thar kan cawnnak hmun cu Khrihfabu i a hmasabik cell, Khrihfa chungkhar innchungkhar Khrihfabu a si.

Khrihfa chungkhar dirh ding auhnak hi Khrihfa kawhnak a si ti kan hngalthiam maw?

3. Luke Thawngṭha Dal hnihnak ah, Jesuh, Mary le Josef chungkhar nunnak ah a biapimi hmelchunhnak dang pakhat kan hmuh (Luka 2:22-40). Nazareth khua ah kirṭhan dingah A Thiang Chungkhar nih biakinn in an chuahtak hnuah hitin kan rel:

“Bawipa nawlbia nih a fialmi vialte kha an tuahdih hnuah Galilee ram, anmah khua Nazareth ah khan an kir. Ngakchia cu a hung ṭhang i a hung ṭhawng i fimnak in a khat; Pathian velngeihnak cu a cungah a um.”

Hi tuanbia hna nih Nazareth le cuka ah a cangmi thil kong a thukmi biatak kha a kan hmuhsak. Luka nih A Thiang Chungkhar nunnak ah a biapituk mi hmuhnak a kan pek. Cuka, Nazareth khua ah, A Thiang chungkhar cu a thiangmi nunnak an ngei, zeicahtiah Jesuh cu, cu vialte lakah a biapibik ah a um caah a si.

Kannih zong cutin tuah ve dingin sawm kan si.

Hi Puai sullam le biathli hi kan cawn i kanmah chungkhar nunnak ah kan hman awk a si. Kanmah le kanmah thianhlimnak lam cu Bawi Jesuh a hrampi ah chiah in kan chungkhar nunning sawhsawh nunnak ah hmuhkhawh a si. Kan tuah tikah, a sining tein khuaruahhar thil ah a cang.

December 28, 2011, Nithumni ah Pope Emeritus Benedict XVI nih Nazareth khua i A Thiang Chungkhar nunnak kong bia dawh ngaiin a chim. Hihi a tawinak in lakmi a si:

“Nazareth inn cu thlacamnak sianginn a si i cuka ahcun ngaih, ruahnak ngeih, Pathian Fapa langhnak sullam thukbik luh khawhnak kan cawn, Mary, Joseph le Jesuh sinin kan zohchunh awk kan lak.”

Kan innchungkhar cu a thiangmi innchungkhar ah aa cang maw? Jesuh Khrih cu a laifang ah a um maw? A silo ahcun thlen a herhmi vel cu Amah sinah hal ko hna usih.