Reflection For 4th Sunday of Advent
December 22, 2024
1Rd Micah 5:1-4/ Psalm 79:2-3, 15-16, 18-19/ 2nd Rd Hebrew 10:5-10/ Gospel Luke 1:39-44
1. Jesuh, Messiah a chuah tikah, Mikah cauk chungin hi cacang ah a langhtermi chimchungbia biakamnak cu a tling cang.
Bethlehem khua in “Hmailei Israel uktu ” a chuak cang. Khrihfabu nih, zumhnak mitnung in Biakam Hlun kha a zohṭhan tikah, Nazareth i ngaknu Mary nih nau a pawi i a hrinmi zong kha a hmuh. Nihnih a rauh hnuah Bawipa Jesuh Khrih, Messiah chuahnak puai kan tuah cang lai. Amah chungah Hebru Cathiang chung i biakamnak vialte “A si” kha an hmuh. Lamkaltu Paul nih Korin khuami hna sin a cakuat hmasabik ah a chim bantukin, “Pathian nih a kamhmi vialte cu a si ko” (1 Kor. 1:20).
Asinain, mah hi hngalhthiam awkah a nungmi zumhnak a herh. Zumhnak cu laksawng zong a si i theipar zong a si. Christmas lawmhnak kan naih cang tikah, cu bantuk zumhnak he hmuhtonnak thar a kan pek dingin Bawipa sinah kan hal cang maw? Hi puai tuahnak hi zeidah a si taktak ti hngalh khawhnak ding caah kan mit le kan thinlung kan hun cang maw?
2. Hebrew cakuat cu Judah Khrihfa hna caah tialmi a si. Catialtu nih Khrihfa hmasa hna nih khan Jesuh Khrih cu Pathian nih Judah miphun hna he a tuahmi biakamnak tlintertu a si ti hngalhter ding ca a si, cun Hebru profet hna zong nih an chimmi Biakam thar zong a si. Abraham sinah biakamnak a tuahmi tlinternak ah nu le pa pawl kha a hruai hna. Atuah Jentail Khrihfa hna cu, cu biakamnak hna rocotu an si cang, mitsur ruang ah an i peh cang, zeicahtiah Jesuh hrimhrim cu mitsur ruang a si. Mithiang Johan Thawngṭha chung i a thukmi bia ah, Bia cu titsa ah a cang ti a si.
Minung sinak a thukmi sining kha thuk deuh in hngalhthiam awkah Bawipa sinah bawmhnak kan hal cang maw? Atu cu cutin tuah caan a si.
3. Kan Bawinu Mary nih a rualchan Elizabeth a va tlawn tikah, amah nih Bia Minung cannak (Incarnate Word) a put i Elizabeth nih John cu a put ve.
Luka Thawngṭha nih hitin a kan chimh: “Elizabeth nih Mary i a chawnhbiakmi a theih tikah, a paw chung i naute cu a cawlcang i, Thiang Thlarau in a khatmi Elizabeth cu aw thangpi in a au i, “Nu vialte lakah thluachuakbik na si i thluachuakbik cu na paw chungin a chuakmi theitlai.” a si a ti.
“Zeicahdah ka Bawipa nu nih hin kei tehna hi na hung ka tlawn? Zeicahtiah na ka biakchwnhnak ka theih cangka khan pei, ka chung i ka fate cu lunglawmhnak in aa hlawh len cu. Bawipa bia na sinah a rami kha a tling taktak lai ti zumh cu na caah lunglawmh awk a va si hringhran dah” tiah a ti
Cun Mary nih: “Ka thlarau nih Bawipa lianhngannak kha a chim; ka thlarau cu ka khamhtu Pathian cungah aa lawm,” tiah a ti (Luka 1: 41-47).
Miphun vialte i a hmasabik inn, a nu pawchung ah a ummi, Biakam Hlun i a donghnakbik Profet le Biakam Thar i Profet Pakhatnak nih Khamhtu Jesuh a rat tikah nu paw chungin lawmhnak laam in a lehrulh,
Christmas ca i kan i timhtuah lio ah hi tonnak kong hi ruahṭhan dingin sawm kan si. Cutin kan tuah cang maw?