Reflection for Thursday
December 19, 2024 – (Luke 1:5-25)
Nihin ni caah kan relmi Thawngṭhabia – Luka 1:5-25 cu fa a ngei kho lomi nuva a simi Elizabeth le Zechariah hna nih fapa an ngeih te lainak kong a si. Hi Bible thiang chung hin tlawmte ruatṭi hna u sih.
Pathian thil tuahmi hi ruahlo piin a si tawn. Zakhariah le Elizabeth kong ah Pathian thil tuahning hi minung ruahning bantuk siloin ruahlopi in thil a canning kha Luke nih a thawngṭhabia thiang ah a langhter. Vancungmi Gabriel sinin kum khua a upa cangmi nuva hna nih fa an hrin lai timi thawngpang cu Abraham le Sarah hna tuanbia he zong aa lo ngaingai.
Zekhariah le Elizabeth tuanbia – nunning ah thil a cangmi kan zoh tikah minung sining, taksa sinakin thil ti khawhnak le ruahchannak a um tilo nain, Pathian thil ti khawhnak le Pathian cu ruahchannak vialte tlinnak, cun a biakam hna cungah zumhawktlak a sinak kha i bochan zungzal ding a si timi kha fiang tein kan hmuh khawh.
Zechariah nih Pathian vancungmi bia kha a zumhlo caah holh thiam loin a um. Sihmanhsehlaw, Pathian biakam a simi fapa Johan (tipil petu) a chuah hnu ah a zumhnak cu a hung ṭhawngṭhan i a zumhnak nih bia chim khawh ṭhannak tiang a phanhter ṭhan. Hi zawn ahhin zumhnak nih mi kha midang he i hawikomhnak a ngeihter hna i, mit-hmuh a simi thluachuah- fale nih mi kha zumhnak ah an hruaiṭhan hna timi kha kan hmuh khawh. Hi zawn ah, mi tampi nih an nunnak ah Pathian thluachuah khuaruahhar thil hna kha tehte an khaan i Pathian cungah an nun a donghtiang zumhfek tein a ummi hna zong vawlei cung hmun tampi le pawngkam ah tampi hmuh khawh a si ko.
Elizabeth zong cu, nau a pawi tikah midang hna nih a cung i an rak ngeihmi nautatnak le nehsawhnak hna zong kha an lo i, Pathian an thangṭhat hlei ah Elizabeth nau a ngeihnak thawngpang a theimi vialte hna cung zongah lunglawmhnak a um timi zong kan hmuh khawh.
Zakhariah le Elizabeth tuanbia cu Abraham le Sarah sinah bia rak kamnak in aa thawkmi, Pathian nih Israel he biakamnak a tuahmi a tlinnak ah aa telmi zong a si. Cu asicaah Pathian thil tuahning cu minung khuaruahning le khuakhaan thil tining hna he i lawh loin minung hna I, ruahlo ningin a cang kho zungzal mi a si. “Ka ruahning cu nan ruahning a si lo, ka thil tining zong nan thil tining he an i khat lo.” (Isaiah 55:8)