Reflection for Tuesday

December 17, 2024 – (Matthew 1:1-17)

Nihin ni caah kan relmi Thawngṭhabia (Matthai 1:1-17) hi Jesuh hrinsornak cazin a si i lam tampi in fianter khawh zong a si.

Jesuh cu Pathian nih Abraham le David sinah bia a rak kamhmi a tlintertu a si ti kha nihin kan relmi tefa cazin nih a langhter. Jesuh cu Pathian nih miphun vialte thluachuah a pek hna nak ding caah bia kamhmi Abraham fapa a si. Jesuh cu Pathian nih vawlei ah daihnak le dinnak a umter lai tiah bia a kamhmi David fapa zong a si.

Zumhnak in Khrih innchungkhar ah aho paoh luh khawh a si caah, Jesuh khamhnak Thawngṭha cu mi vialte sin ah chim awk a si. Chungkhar a simi hna cu pakhat le pakhat an i theihthiam, an i ruah piak thiam bantukin Jesuh chungkhar a simi kan nih hna zong kan u nau a simi hna caah ṭhatnak kan tuah zungzal a herh.

Tefa cazin zoh tikah zeibantuk mi hna kha dah upat awk tlak an si i aho hna kha dah upat awk tlak lo an si timi theihthiamnak le hmuh thiamnak zong a um. I uanthlar pi tlak a simi hna an um bantukin zangdernak a ngeimi hna zong tampi an um kho ve.

Thawngṭha chung kan relmi Tefa cazin nih Pathian bia rel peng awk le Khrih kha kawl zungzal awk a sinak kong kha fiang tein a langhter.

Tefa cazin cu min cazin a si bantukin min pakhat cio nih nunnak tuanbia kha a aiawh, a langhter. Mi nih mah min pawl kong kha upatnak he an rel awk a si i (min) mi pakhat cio nih an rak hmuhton mi thil hna zong kha an upat awk a si.

Nihin relmi min cazin ah a cheu pa hna min kha kan hmu hna lo. An hrelhmi maw a si, asiloah hramhram in langhter awk an tlak lo ruangah maw a si hnga? Pathian tefa min cazin ah langhter lo kan si sual a si ahcun ngaihchiat awk ngai a si ko lai. Kan min le kan tuanbia hna Pathian tefa cazin ah aa tel khawh ve nak hnga Jesuh cawnpiak mi kha fek tein kan zulh a herh.