December 12 – Reflection
Reading 1, Zechariah 2:14-17/ Responsorial Psalm, Judith 13:18, 19
Gospel, Luke 1:26-38
1. Catholic Khrihfabu Liturgical calendar ah, nihin cu Guadalupe Bawinu Puai, aa dawh tukmi Marian puai a si.
Kan rel hmasa bikmi cu Hebru Cathiang chung i profet hmete pakhat a simi Zekhariah cauk chungin lakmi a si. Zekhariah timi min sullam cu “Pathian nih a philh lo” tinak a si. Judah miphun sal an um lio ah ṭialmi, hi cauk chungah Bawipa nih a miphun hna cu saltannak in ka luatter hna lai i saltannak in ka kirter hna lai tiah bia a kamh hna. Mah ah Messiah, Siangpahrang pakhat, laa fate aa cit i a ra laimi biakamnak aa tel. (Zekh 9:9 zoh)
Hmasa Khrihfa hna nih mah biakamnak le Jesuh Jerusalem i a luhnak pehtlaihnak kha an rak suai colh. A ngaingai ti ahcun, Jesuh Khrih a rat tikah hi biakamnak hi tlinter a si ti kha kan hmuh. Atu cu, Bawipa nih “a hninh hna, tiah Profet nih mipi sinah a chim – cun voikhatte cu Jerusalem cu a hleiin a thimmi ah a ser ṭhan lai. Mi vialte cu a mi an si lai. Hi Advent caan chungah kan Bawipa chuahnak caah timhtuahnak kan ngeih lio ah, cucu philh hlah u sih Kan Bawipa nih a biakam vialte a tlinh dih.
2. Kan Responsorial Salm cu Judith cauk chungin lakmi a si.
Hi cauk chungah, Khaldi siangpahrang Nebukhadnezzar nih a duhnak a zul lomi Israel hmun pawl dantat awkah ralkap he Assiria ralbawi pakhat a thlah hna. A rammi hna nih an tuah khawh lo tikah Judith nih a cawlcang, cun amah tein Assiria ralbawi kha a hloh. Mah ralṭhatnak in Judith nih a mi hna kha ruahchannak a pekṭhan hna. Kan pawngkam ummi hna caah Pathian ruahchannak ngeihter ṭhannak ah ralthatnak ngeih dingin kawh kan si. Thlacamnak le Thawngṭha chimnak ah ralthatnak he kan cawlcangh a hau. Kan Bawipa caan cu a nai cang caah Judith zohchunh awk le ruahchannak serṭhan awkah auh kan si.
3. Nihin i St. Luke Thawngṭha ah a chim bantukin Mary sinah Vancungmi thawngthanhnak kong a chim tthan. Hi khuaruahhar Bible chung i vancungmi bia hna nih hin Catholic biaknak ah a sunglawi bikmi thlacamnak pakhat a simi Hail Mary tiah auhmi a hramthawknak bia a ser. Catholic Khrihfabu ah hi biafang hna – le an aw chuahmi thlacamnak – cu ahleiin mi an zaw, harnak an ton tikah, asiloah thihnak an ton tikah hnemhnak nganpi an si ti kha ka hmuh.
Thawngṭha cauk nih a chimmi Mary cu velngeihnak in a khat, Pathian nunnak le umpinak taktak in a khat tiah a kan chimh. Cucu zangfahnak timi cu a si. Catholic Khrihfabu Catechism nih, “Zaangfahnak cu mithmai ṭha a si, Pathian fa, cawmkenmi fapa, Pathian sinak le zungzal nunnak aa hrawmmi si awkah a kan auhnak lehnak caah Pathian nih man loin a kan pekmi le kan i tlak lomi bawmhnak a si. Pathian nunnak ah zaangfahnak cu i telnak a si.” (Catechism of the Catholic Church #1996,1997)
Mary cu, cu dawtnak in a khat. Pathian he a thukmi, a hmunmi le a naihmi pehtlaihnak ah a kal. Amah sawmnak hmanh a leh hlanah a sinah a um.
Mary nih Pathian a thim hlan hmanh in Pathian nih Mary cu a thim cang. Thlarau nunnak sullam thuk deuh hngalh kan duh ahcun hi ningcang hi a biapi tukmi a si.
Vancungmi nih Mary cu zangfahnak in a khatmi tiah a ti. Mary cu mithmai ṭha a hmu taktak i velngeihnak in a khat. Van le vawlei Bawipa nih a bia thlaici a cinnak vawlei ttha ah a rak timhtuah i a rak thim.
Bawipa bia kan leh tikah, velngeihnak in kan khat ve – cun Jesuh cu, thlarau lei in, kan chungah ser a si. Cuticun, kannih zong mithmai ṭha kan hmu ve. A tthencheu lomi Khrihfabu a hmasabik pa, Nyssa khuami Gregory nih voikhat cu hitin a rak tial:
“Mary ah pumsa sining in a chuakmi cu, Thluachuah Petu Ngaknu chung i Khrih thawngin a ceumi Pathian sinak tling cu, a thiangmi thlarau paohpaoh ah cu bantuk cun a cang. Bawipa cu pumsa sining in a ra lo, zeicahtiah ‘kannih titsa ningin Khrih kha kan hngal ti lo’, sihmanhsehlaw thlarau lei in kan chungah a um i Pa nih a sinah a um, tiah Thawngṭha nih pakhat cio kha a kan chimh.”