Ami hna a Daw zungzal tu Siangpahrang

Bible Thiang relding: Ezekiel 34:11-12, 15-17; 1 Corinthians 15:20-26, 28; Maṭhew 25:31-46)

Nihin ni ah Bupi nih Khrih Siangpahrang Puai tiin a kan tuahpiak. Hi puai nih a langhter mi cu Jesuh Khrih cu Siangpahrang sawhsawh hna nih ṭhawnnak, chawva le nawlngeihnak in an uk hna nak bang si loin Amah cu dawtnak, zaangfahnak in a kan uk zungzal tu a sinak kha a si.

Nihin kan relmi cathiang hna chungin phun 3 in thazaang pek kan duh hna.

  1. Khrih cu Tuukhaal ṭha, a mi hna a veng zungzal tu a si.

Voikhat Bible relnak chungah Pathian nih a tluami, aa ṭhenṭhek mi a tuu hna, a mi hna kha a kawl ṭhan hna lai nak, a mi hna kha a pumh ṭhan hna lai nak kong a chim. Pathian cu a hlaatpi ah a ummi Pathian si loin a mi hna he aa naih te in a um zungzal tu Pathian, a miphun hna kha a zohkhenh zungzal tu, cun nunnak le ṭhatnak pek awk ah bia a kan kamhtu a si kha a langhter.

Kannih Khrihfa mi hna, Pathian hnu zultu hna zong nih Pathian nih a kan zohkhenh bantukin pakhat le pakhat i zohkhenh ding, i hlawt lo ding, cun mi pakhatkhat nih a herh taktak mi cungah siannak lungthin he bawmh ve dingin a kan sawm.

  • Thihnak a teitu Siangpahrang

Voihnih Bible thiang relnak ah Khrih cu thihnak in a tho hmasabiktu, thihnak a tei tu, cun Amah thawngin nunnak thar kan hmuh nak kong a langhter. Khrih nih sualnak le thihnak a tei cang a ti. A Pennak cu vawlei pennak bantuk si loin zungzal a hmun mi Pennak a si a ti.

A langher duh mi cu “Khrih thawh ṭhannak nih harnak, fahnak hna chungin nunnak a um taktak ko timi ruahchannak a kan pek.” Khrih nih zungzal nunnak innka, lam a kan hunpiak cang a ti. 

Cuasicaah, zumhnak, ruahchannak le ralṭhatnak he nun ding, cun zungzal a hmun ding mi Pathian Pennak a um taktak ko timi kha kan hngalh zungzal ding a si.

  • Siangpahrang a simi Khrih nih Dawtnak in bia a kan ceih te lai

Thawngṭhabia chungah caan dongh ni ah biaceihnak a um te lai a ti. Cu ahcun tuu le meheh ṭhen an si bangin Siangpahrang a simi Khrih nih minung hna kha a ṭhen te hna lai nak; cun khuaruahhar thil pakhat a simi cu Khrih nih amah le amah sifak, harsa, mizaw, thazaang dermi pakhat bantukin tahchunhnak bia a lak i cu bantuk mi hna cungah ṭhatnak a tuah mi hna le thleidannak a ngei lomi hna kha thluachuah a pek te hna lai nak kong a chim.

“Ka rawl a ṭam i ei ding nan ka pek, ka ti a hal i din awk ti nan kan pek” tiah a ti.

A kan cawnpiak duhmi cu Pathian dawtnak kha kan nunnak ah midang cung dawtnak kan ngeihnak in langhter ve ding a simi kha a si. Pathian kan dawt ti ko lio ah kan hmuh khawhmi midang minung hna cungah dawtnak lungthin kan ngeih khawh lo a si ahcun zeitin dah Pathian hmai ah dawtnak kong kan chim ngam lai.

Pathian rianṭuan timi ah thlacam, Missa kai, biaknak rianṭuannak ah i tel lawng hi kan ruah ding a si lo. Nifatin kan tonmi hna cungah dawtnak lungthin zeitluk in dah kan ngeih khawh i dawtnak kan langhter khawh ve timi kha a biapi mi cu a si.

Dawtnak hme te tiah ruahmi mizaw va zoh, va len, sifak hna kha bawmh, a ngeihchia mi hna kha hnemh, midang sualnak kha ngaihthiam timi tete hi Pathian nih tuah hna seh tiin a kan duh piak ve mi cu a si ko.

Dawtmi u le nau hna, zeibantuk Pennak dah kan kawl i zeibantuk Pennak dah kan ser ve? Ruat ṭhan hna u sih. Vawlei nih ṭhawnnak, chawva, reng ngeihnak le mi nih thangṭhatnak kawl dingin a kan lem lio ah Van lei thil sining nih cun dawtnak in midang hna cungah bawmh thiam ding le bulṭawl piak hna dingin a kan sawm.

Thazaang petu /- Fr. Fidelis Maung Sein

Leave a Reply

Your email address will not be published. Required fields are marked *