
JESUH LE ISRAEL

Jesuh phungchim hram aa thawk cangka in Farasi a cheu, Herod bawi hna nih tlangbawi hna le phungbia cawnpiaktu hna he khan Jesuh kha hloh awkah khua an khan. (Cf. Mk. 3:6, 14:1). Cucu khuachia a ṭhawl, misual a ngaihthiam, nizarhpi ah mizaw a dam ter, thiannak kong ah nawlbia sullam a phuan i misual hna le ngunkhuai khawltu hna he aa khawmh caah a si. (Cf: Mt. 12:24, Mk. 2:7, 14:17, 3:1-6:7, 14-23). Jesuh kha khuachia a ngei, a timi hmanh an um. (Cf. Mk. 3:22, Jn. 8:48, 10:20).
Nawlbia phung ah lung in thihlak cheh awk a tlakmi sualnak, Pathian cawhdehnak le a hman loin profet bia chimnak hna kha an puh. (Cf. Mk. 2:7, Jn. 5:18, 7:12, 52, 8:59).
Jesuh a tuahmi le a chimmi tampi hna hi, “ralnak hmelchunhnak” ah an cang. (Lk. 2:34). Mah hi Jerusalem khua ah a ummi biaknak lei nawlngeitu pawl, Johan nih Thawngṭhabia chungah “Judah mi” tiah a timi hna kha an si deuh. (Jn. 1:19, 2:18, 5:10, 7:13, 9:22, 18:12, 19:38, 20:19).
Pathian miphun sawhsawh hna caah cu tluk a si lo. (Jn. 7:48-49). Sihmanhsehlaw Jesuh nih Farasi hna he anni kawmhnak cu a zapi in ralnak a si dih lo. Farasi a cheukhat cu Jesuh kha ralrinnak an pek. (Cf. Lk. 13:31). Jesuh nih Farasi cheukhat kha phungbia cawnpiaktu a thangṭhat bangin a thangṭhat hna. (Mk. 12:34). Anmah he zanriah zong an ei lengmang. (Cf. Lk. 7:36, 14:1). Jesuh nih hi mi hna an cawnpiaknak kha aa lakmi zong an um ve. Mithi thawhṭhannak (Cf. Mt. 22:23-34, Lk. 20:39) ahlu peknak, rawl ulhnak le thlacamnak, (Mt. 6:18) Pathian kha “Kan Pa” tiah an auhnak le Pathian le innpa dawtnak a biapi, tiah an cawnpiaknak hna kha an si. (Cf. Mk. 12:28-34).
