
A thimi hna Pathian a si lo, a nungmi hna Pathian a si

Nihin caanṭha caan sunglawi a kan petu kan Pathian a min thangṭhat si ko seh. RVA in Pathian bia thazaang a latu nan dihlak cungah Bawipa nih taksa thlarau damnak in pe ko hna seh.
Thawhṭhannak a zummi le a zum lomi phuhnih kan um. Sadusi mi hna cu thawhṭhannak a zum lomi, Mithiang mi hna pumkhat sinak an zum lo, Messiah a zum lomi an si. Cucaah nihin Sadusi mi hna nih Jesuh sinah an ra i Jesuh cu thihnak in thawhṭhannak kong kha an hal. Unau pasarih nih an thihtak ni minu hi thawhṭhan ni ah aho nupi dah a si lai. An pasarih ning tein an ṭhit ṭung an ti. Jesuh nih tuchan mi hna cu an i ṭhi i an i um, sihmanhsehlaw thihnak in thawhter ṭhan a simi hna le a ra lai dingmi chan i um awkah aa tlakmi hna cu an i ṭhi, an i um lo. Annih cu vancungmi bantuk an si i an thi kho lo. Annih cu thihnak in thawhter mi an si cang.
Moses zong nih a thimi hna cu nunnak ah thawhter an si lainak kong kha fiang tein a chim. Bawipa cu Abraham Pathian, Isak Pathian, Jacob Pathian a si a ti. Cu nih cun Pathian cu a nungmi hna Pathian a si i a thimi hna Pathian a si lonak kha a langhter. Kannih cu thawhṭhannak a zummi kan si. Jesuh thihnak in a thawhṭhannak nih kanmah vialte kan zumhnak a fehter chinchin. Jesuh thihnak in a thawhṭhannak nih Jesuh cu Pathian taktak a sinak le minung taktak a sinak a langhter.
1Cor 15:17 ah Jesuh cu thawhter a si lo ahcun kan zumhnak cu pakpalawng a si lai i sualnak chungah kan um ko rih lai a ti. Jesuh thihnak in a thawhṭhan bantukin Jesuh a zummi vialte cu nunnak ah thawhter an si lai. Kannih cu thawhṭhannak a zummi, thawhṭhan nun ngeimi kan si. Col 3:1-4 ah nannih cu Khrih sinah nunnak ah thawhter nan si cang.
Hi vawlei thil kha si ti loin Vancung khua i a ummi thil tu kha nan lung chungin i seh chih hna uh. Nan nunnak taktak cu Khrih kha a si cang. A thimi hna Pathian a si lo, a nungmi hna Pathian a si.
Thazaang petu /- Saya Francis Khua Pheng
