Meithal in hliamhma a tuar hnuah ṭhutnak leng cungah a nunnak caan a hmang ko nain ngaihthiamnak tu aa thimmi Pope Leo XIV a hawi Siangbawipa

Peru khua, Chiclayo Diocese chungum Santo Toribio de Morgrovejo sianginn uktu Fr. Edwin Santa Cruz Perez i a nunnak cu ngaihthiamnak, zumhnak le dawtnak hna i tehte pakhat a si. Shalom World News nih November (17) ni ah a langhtermi thawngpang ningin Fr. Edwin cu meithal in kahnak a ton hnuah kum saupi ṭhutnak leeng cungah a nunnak a rak hmangmi a si. Asinain amah cung i ṭhatlonak a tuahtu kha a ngaihthiam i, Jesuh Khrih kong kha pehzulh in a phuan i tehte a rak khaan.

Fr. Edwin i a nunnak ah a biapi ngaimi pakhat cu atu lio Pope Leo XIV hi a si i, cu lio ahcun Bishop Robert Prevost a rak si. 2026 April thla Catholic Review ah an langhtermi capar chungah Fr. Edwin cu Bishop Prevost he a voikhatnak an i ton lioah miniute (4) leng an ni chawnh biaknak kong, cu tonnak ahcun Bishop nih a caan tampi a ngaih piaknak kong a rak chim ṭhan. Fr. Ewin nih, “amah nih keimah cu ngaih piak thiamnak le hngak thiamnak ngeih dingin a ka cawnpiak,” tiah a rak chim.

Fr. Edwin chim ningin Bishop Prevost cu amah he a herh tik caan paoh ah i ton dingin timhcia a si i a biapi in a nunnak ah harnak a ton lio caah ah a rak bawmchantu a si. Amah nih, “keimah cu amah i naihniamnak a rak ingtuarmi ka rak si. Amah kha hmuh ka duh tik caan paoh ah hmuh tonnak nawl cohlan piak dingin timhcia tein a um peng ko,” tiah a rak chim. Cu ruangah Pope Leo XIV le Fr. Edwin hna hmuh tonnak cu a sawhsawh hmuh tonnak nakin a sang deuh i pakhat le pakhat cungah zumhnak le i hawikomhnak chungah hram a bunhmi i pehtlaihnak a si kha kan hmuh khawh.

Kum saupi a rauh hnu ah Pope Leo XIV cu Peru khua ah lamkaltu khual a tlawn lio Chiclayo khuapi ah a rak phanh lioah Fr. Edwin he ton ṭhannak an rak ngei. Fr. Edwin nih Pope Leo XIV cu, “Vawlei cung um a tlummi Khrih Jesuh,” (the sweet Christ on earth) tiah a rak auh. Cu hnu ah Jesuh Khrih a Bupi a hruaitu dingah a liannganmi ṭuanvo kha a cohlang i a ṭuanmi Pope Leo XIV caah thlacam piak ding zong in forhfialnak a rak ngei.

Fr. Edwin cu a nunnak cu harnak le intuarnak karlak hna zongah ngaihthiamnak, zumhnak le midang hna kha bawmhchanhnak in Jesuh Khrih kong tehte a khaan kho nak kong a langher khomi siangbawi pakhat a si. cu hnu ah nihin vawlei pumpi nih Pope Leo XIV tiah an theihmi cu khua tuan ah Chiclayo ah Bishop sinak in ṭuanvo a rak lak lioah minung pakhat cio an harsatnak kha a rak ngaih piak hna i niahniam tein a rak bawmchantu a sinak kong zong kha mah hawikom siangbawipa ih a hmuhtonnak nih hin a langhter.

Source News:

Catholic Zotung News / Shalom World News / Catholic Review (OSV News) 

Leave a Reply

Your email address will not be published. Required fields are marked *