
Europe ram ah Khrihfa hna hremnak 44% a karh

Nov 20, 2026
Europe ram ah Khrihfa hna hremnak le tlerhkhonhnak cu 2025 kum nakin 44% a zual deuh tiah (OIDAC Europe) nih an chuah. Cu cathanh cu Nov 16 ah an chuah mi a si i EWTN News nih Nov 18 ah a thanh chin. OIDAC i 2026 cathanh langhter ning ah 2025 kum chungah Europe ram chung Khrihfa hna hremnak thil sining 2465 a um. Cu hna lakah minung hna dohnak, velhnak, tlerhkhonhnak le hnahnawh peknak cu a tlawmbik 395 aa tel i, 2025 lio he tahchunh ahcun 44% a zual chin. Asinain cathanh nih a langhter mi ahcun Biakinn hna le Khrihfa hmunhma hna hrawh le mei khanghnak, Khrihfa hmelchunhnak a ngeimi inn le lo tibantuk hrawknak an si tiah a langhter. Ramkip acozah langhter ning zongah France, England, Germany, Austria ram hna ah, a bik in France ram ah Siangbawi te le Khrihfa hruaitu upa hna cungah mithmuh kuttongh in dohnak hna cu let li tiang a zual tiah theih a si. Cathanh ah France ram Lyon khua um, online cungin Khrihfa zumhnak kong a chim lioah namte in sawhnak a tongmi Iran ram in a ra zaammi Assyrian Khrihfa Ashur Sarnaya i sining le Poland ram um, mahte umnak Siangbawi inn ah hremnak a tong i thah a ingmi Catholic Siangbawipa hna sining zong a langhter. OIDAC Europe i director Anja Tang nih hi cazin hna cu mah le zumhnak ruangah hremnak a ingmi hna sining kha a langhter mi a si a ti. OIDAC Europe nihcun Europe acozah nih Khrihfa hna hremnak an innak kha khampiak dingah ttuanvo ngeitu pakhat chiah ding, hremnak a ingmi Khrihfa hna bawmhchanh ding kha forhfialnak a tuah.
Source EWTN News
