Hakha Catholic mino hna nihnih chung cawnpiaknak

2026 Nov 13 ni ah Hakha, St. Charbel Biakinn, Edmond Kap Thuan Hall ah Hakha Diocesan Catholic Youth Commission – HDCYC nih a tuah mi mino cawnpiaknak ah minung 40 leng an i tel kho. Cu cawnpiaknak i a tinh mi cu mino hna i zumhnak a fehnak hnga, i tthithruainak a tthanchonak hnga le Catholic Bupi kong an theih deuhnak hnga a si. Cu cawnpiaknak ahcun Hakha Diocese Mino Hruaitu Fr. Michael Yaw Chaing nih ‘Nihin kan thil tuah mi hi tuanbia pakhat kan ttial a si i a sunglawi tuk mi a si’ a ti. Cun mino hna cu Catholic Bupi chungah pakhat le pakhat rualrem tein um ding kha a forhfial hna. Catholic mino pakhat kan sinak kha man kan ngeihter a hau. Nannih cu pakhat le pakhat nan i thei lai, nan i bawmchan lai, hmunkhat ah nan dir tti lai, thazaang nan i pe lai, pakhat le pakhat nan i upat lai tiah a chim chap.

2026 Nov 14 ni ah Hakha St. Joseph Cathedral Biakinn ah World Youth Day Missa Raithawinak an ngei. Cu Missa Raithawinak ahcun Siangbawi 10 lengah mino 65 hrawng an i tel kho. Missa a dih in HDCYC le St. Joseph Cathedral Mino zungkhaan thar onnak an ngei i Msgr. Jerome Hlawn Khawl nih thluachuah a pek. Hi nihnih chung cawlcanghnak hi cawnpiaknak sawhsawh a si lo. Hihi cu Catholic mino hna pakhat le pakhat i theihhngalhnak, zumhnak fehter deuhnak le lungrualnak, Pathian rianttuannak le dawtnak hna a langhter mi tuanbia pakhat kha hmunkhat ah a ttialmi mino cawnpiaknak a si tiah Fr. Michael Yaw Chaing nih a chim.

Leave a Reply

Your email address will not be published. Required fields are marked *