December 8 – 2nd Sunday of Advent

Ramcar Ni Hna

Baruch 5:1-6 /Psalm 126:1-2ab, 2-3, 4-5, 6

Philippians 1:4-6, 8-11 /Luke 3:1-6

Thawngṭha ṭialtu Mithiang Luka nih nihin ah a thawngṭha chimmi chungah tuanbia sullam le hmunhma a pek. Vawlei lei le biaknak vawlei leiin hruaitu pasarih hna kong a chim. Cu mihna cu, Tiberius Sizar, Pontius Pilat, Herrod, Filip, Lisanias, Annas le Kaifas hna an si. Hi, mi lianngan hna lakah pakhat hmanh nih Pathian bia cu a phan lo. Sihmanhsehlaw, Pathian bia cu Johan sin lawngah a ra. Hi, mi lianngan pasarih hna he tahchunh ahcun, Johan cu an dihlak in theih lomi a si.

Jerusalem Biakinnpi i a tleunak le a sunparnak vialte ah si loin Johan sinah Pathian bia cu a daihnak le amah lawng umnak ramcar ah a phan. Prophet le Pathian i mipa/nu hna cu ramcar lakah pungsan sersiam (ပုံသွင်း) an si. Pathian nih a miphun Israel mi hna kha biakammi ram a hruai hna lioah kum sawmli chung kha ramcar chung ah a cawnpiak hna.

Ramcar lakah Israel mi hna nih an lung a buaitertu zeihmanh an ngeih lo lioah Pathian bia ngaih awkah an lung a kau deuh. Cubantukin, kan nunnak zongah cuticun a si ve tawn.  Ramcar lak kan um tikah, kan nunnak cu a rocar i theipar a tlai lobik caan asi tawn. Hlawhtlin lonak le lungdonghnak nih a kan den tikah; harnak le zawtnak nih bawmtu ngeilo le pum tlamtlinglo ah a kan ser tikah; Pathian bia cu kan sinah a ra.

Pathian nih kan thinlung ah biachim a duh tikah thetse ram ah a kan hruai. Ramcar ni hna kha ṭih hna hlah. Zeicahtiah, cu ni hna cu nangmah caah an sunglawi kho. Cu hna cu hawikom ṭha le thluachuah hmuhnak ni hna an si.